Read Sehwi 2 Ahemvo 19 Bible Online

2 Ahemvo 19 - Sehwi bible

2 Ahemvo 19

¹Nana Hesekia tele sɔ dwirɛ nen, osunzuale ye bɔbɔ ye ndaadeɛ nu, ɔherale ɛsɛen tena, na ɔhɔle AWURADE awuro berɛ.

²Ɔsomane Eliakim bɔ ɔnea ahemvie berɛ ne, ahyerɛlɛniɛ Sebena yeɛ asɔfo mbanyi mɔ maa bɛhɔle Amoso awa ngɔmhyɛlɛniɛ Yesaya berɛ. Bɛherale ɛsɛen tena yeɛ bɛhɔle ɔ.

³Besele ye kyɛ, “Hesekia nwa: Ɛnɛ kyẽa ye te aworabɔlɛ, asohwenɛ ne animguaseɛ kyẽa. Mmrasua nemɔ afo aworɛ so, nakoso bennya anwoserɛ bɛmva bɛndwe bɛ nwo.

⁴Edwirɛ amukoraa bɔ Rabesake ne, ye mene Asiria hene wafa wasoma ye kyɛ ɔfa ɔɔgoro Nyameɛ teasefoɛ nwo ne, ebiaa AWURADE wɔ Nyameɛ wate. Na AWURADE wɔ Nyameɛ kɔhwe ye so wɔ edwirɛ bɔ wate ne anwo. Yiti mbaeɛ bɔ ɛbɔ ma yɛ bɔ yaha ne, ma nu ɔ́yɛ se.”

⁵Hesekia ye mbanyi nemɔ hɔle Yesaya berɛ ne,

⁶Yesaya sele bɛ kyɛ, “Ɛmɔhã behyire ɛmɔ mene kyɛ, ‘AWURADE nwa: Musue dwirɛ bɔ Asiria hene ye mbanyi baha batia me maa ate ne, nnɛmaa wɔ kunu tete wɔ wɔ ye nwo.

⁷Me bɔbɔ ngɔfa ahunundetelɛ adwene bie ngowura ye ti anu. Ngɔmaa ɔkɔte ngraa bie bɔ ɔkɔmaa okosa ye si kɔhɔ ye kuro ɔ. Ngɔmaa ɔkɔtɔ wɔ ngrandɛ noa wɔ ye bɔbɔ ye maen nu.’ ”

⁸Afei Rabesake ne tele kyɛ Asiria hene wafi Lakise. Na osale ye si hɔle nen, onwuni kyɛ Asiria hene wafa koɛ waateta Libina.

⁹Mmerɛ bɔ Asiria hene tele kyɛ Yitiopia hene Tihaka waboaboa ɛlɔen noa ɔbaafa koɛ toa ye ne, otuli ɛbɔfoɛ mɔ maa bɛhɔle Yuda hene Hesekia berɛ.

¹⁰Ɔmaa beesele Hesekia kyɛ, Wɔ Nyameɛ bɔ afa wɔ nwo ato ye so ne, nnɛmaa ɔlakalaka wɔ, ná ɔhyɛ wɔ bɔ kyɛ ɔngɔfa Yerusalem ngowura Asiria hene sa.

¹¹Tie, nna ate bɔ Asiria hene mɔ bafa bayɔ maen maen amukoraa ɔ? Ate kyɛ bahũhũ bɛ pasaa ne? Aso ebie kɔpepɛ kole wɔ anaa?

¹²Maen maen mɔ bɔ me nana mɔ bɛbɔle bɛ, bɔ bɛ ole Gosan, Haran ne Resefe ne Edenfoɛ bɔ né bɛwɔ Telasa ne, aso sɔ maen nemɔ bɛ nyameɛ mɔ bɛhora bɛpepɛ belele bɛ?

¹³Hamate hene, Apade hene, kuro Sefawim hene, Hena hene, ɔne Yiwa hene, bɛwɔ nisua?

¹⁴Hesekia sa hane krataa ne fili ɛbɔfoɛ nemɔ berɛ, na ɔkengale. Afei ɔhɔle AWURADE awuro berɛ, na ɔtrɛle krataa ne anu wɔ AWURADE nyunu.

¹⁵Na Hesekia bɔle mbaeɛ wɔ AWURADE nyunu kyɛ, “Ao AWURADE Yisrael Nyameɛ bɔ ɛte w’ahennie bia so wɔ kɛrubim mɔ b’afia ɔ, wɔ wiase ahennie amukoraati nu, wɔ ngome yeɛ ɛte Nyameɛ ɔ. Wɔ yeɛ ɛbɔle anwuro ne aseɛ ɔ.

¹⁶Ao AWURADE, mesrɛ wɔ, tie ná nea. Ao AWURADE, tie edwirɛ bɔ Senakeribo ɔkã ɔ, bɔ wafa wasoma kyɛ bɛfa bɛɛgoro Nyameɛ teasefoɛ nwo ɔ.

¹⁷Ao AWURADE, ɔte amba kyɛ Asiria ahemvo mɔ babɔ maen maen mɔ tɔɔ.

¹⁸Bagyi maen maen nemɔ bɛ nyameɛ ne bagua see nu, ofikyɛ bɛ de bɛtte nyameɛ biala, na mmom bɛte kuro sona sa noa adwuma bɔ wafa bakaa ne nyɔboɛ wayɔ ɔ. Ye sɔ ne ati basɛkye bɛ.

¹⁹Yiti afei, ao AWURADE yɛ Nyameɛ, mesrɛ wɔ, pepɛ de yɛ fi ye sa nu, amaa ɔnate so aseɛ ye aso ahennie amukoraa banwu ye kyɛ AWURADE, wɔ ngome yeɛ ɛte Nyameɛ ɔ.”

²⁰Yeɛ Amoso awa Yesaya somane maa beesele Hesekia kyɛ, “AWURADE Yisrael Nyameɛ nwa, ‘Mate wɔ mbaeɛ bɔ abɔ ahyire me afa Asiria hene Senakeribo nwo ne.

²¹Edwirɛ bɔ AWURADE ahã afa ye nwo ɛhe: ‘Sion awa brasua bɔ onnwuni biaa le ne, obu wɔ animtia, yeɛ ɔgoro wɔ nwo; Yerusalem awa brasua ne, ɔsere ɔbɔ wɔ tutue di wɔ si.

²²‘Nwa yeɛ agoro ye nwo ná abɔ ye alapaa ne? Nwa yeɛ adwudwo atia ye, bɔ ama wɔ nye atra wɔ ndo nwiaa ye? Yisrael Krongronniɛ ne yeɛ ayɔ ɛhe atia ye ɔ!

²³Ɛnate wɔ bɔfoɛ mɔ so agoro AWURADE nwo, na ahã kyɛ, Mafa me teaseɛnam pee nemɔ, mafo mahɔ mmokaa nemɔ ti afia, mahɔ Lebanon ɛhɔayeɛ ne anu dɔ paa. Ye sida ndendenn nemɔ, ɔne ye ɛframmire nyemenenyemene nemɔ, mabubu bɛ magua. Mahɔ bokaa ne ti afia dɔ paa, ɔne so ɛhɔayeɛ too ne anu.

²⁴Matutu abura mɔ, na mano maen maen mɔ bɛ so nzue, Misraim asue amukoraa bɔ me gya atia nu ne, mafa me koɛhonɛfoɛ so mamaa bawewe.

²⁵‘Aso ande, kyɛ sɔ dwirɛ ne ndwenene ye nwo ahyɛ ɔ? Fi tete yeɛ nikyee bɔ meyɔ ye kekesaala ye ne, nhyehyɛ ndole berɛ ɔ, kyɛ nguro bɔ bato bɛ nwo fasue nemɔ, odi kyɛ ɛsɛkye bɛ maa bɛkakyi kurofoen ɔ.

²⁶Ɔnate sɔ ati so ama nemɔ b’anwoserɛ te kãa, besuro na bɛ nyunu agua ase; bakakyi kyɛ eburo ndire, bɛyɛ mmerɛ kyɛ ɛserɛ bɔ wafifi foforɛ ɔ, bayɛ kyɛ ndire bɔ wafifi wɔ sua so anwuro ɔ, bɔ ɔkese ná onnyi ɔ.

²⁷“ ‘Nakoso mese wɔ nyunu ne wɔ si, mese wɔ hɔlɛ ne wɔ walɛ, ɔne wɔ yaa piri bɔ afɛ ye me so ne.

²⁸Ɔnate wɔ yaa piri bɔ afɛ ye me so, ɔne w’anwomasoɛ bɔ mate ne ati, ngɔfa me kaa ngosina wɔ bonyi anu, ná matofi wɔ noa nu mafa me nyamaa mawura nu; na ngɔmaa ɛkɔkakyi wɔ nye, ɛkɔfa atee bɔ ɛnate so wale ne aso ekosa kɔhɔ.

²⁹“ ‘Na Hesekia, ɛhe yeɛ ɔkɔyɛ sɛngyerɛnneɛ kɔma wɔ ɔ: Afoɛ he, ɛmɔkoli aleɛ bɔ ye bɔbɔ wafifi wɔ aseɛ ne aso ɔ. Afoɛ bɔ ɔtɔ so nyɔ ne, ɛmɔkoli aleɛ bɔ okofifi ye si ne. Na afoɛ bɔ ɔtɔ so nza ne, ɛmɔkolua nningyein, ná ɛmɔafa so aleɛ; ɛmɔkolua bobe, na ɛmɔkoli so mmaa.

³⁰Yuda awuro ama bɔ banya bɛ ti badidi nu ne, bɛ bo kosa kotira ndii, ná bata pee.

³¹Bɛ bɔ baha ne bie bɛ boso kɔtrɛ kofi Yerusalem, na bɛ bɔ banya bɛ ti badidi nu ne, bɛ boso kɔtrɛ kofi Sion bokaa ne aso. Asafo AWURADE ye nungunɛhwenɛ ne yeɛ ɔkɔyɔ ɛhe ɔ.

³²“ ‘Yiti bɔ AWURADE kã fa Asiria hene nwo ɛhe: Ongowura kuro he anu, ɔngɔto agyaen wɔ nu, ɔngɔfa akokyɛm ngɔwa ye nyunu, yeɛ ongotua kuro ye.

³³Atee bɔ ɔnate so wale ne, sɔ atee ne ala yeɛ okosa kɔfa so kɔhɔ ɔ. AWURADE nwa Asiria hene ngowura kuro ne anu.

³⁴Ofikyɛ ngɔbɔ kuro he anwo waen ngɔpepɛ ngole ye, ɔnate me bɔbɔ me ti ɔne me somvoɛ Dawide ti.’ ”

³⁵Sɔ kɔngɔen ne ala, AWURADE abɔfo hɔle Asiria asikyeleɛ ne anu oohuhuni koɛhonɛfoɛ apee ɛyaa ko aburawɔtwɛ ne nnu. Aleɛ hyene ne, né efuin ngome yeɛ begua berɛ ɔ.

³⁶Yeɛ Asiria hene Senakeribo fili berɛ hɔle ye kuro, na ɔɔtenane Ninewe.

³⁷Na mmerɛ bɔ ɔsɔne wɔ ye nyameɛ Nisroke asɔneyɛɛ so ne, ye mma mmienzua Adramelɛke ne Saresa bɛfale ngrandɛ behuni ye, na bɛnwati bɛhɔle Ararate maen nu. Na ɔwa bienzua Esa Hadon lili ye bia.