Read Sehwi 2 Ahemvo 20 Bible Online

2 Ahemvo 20 - Sehwi bible

2 Ahemvo 20

¹Sɔ mmerɛ ne, anwonyerɛ bɔle Hesekia bɔ né ɔla awusu ɔ. Na ngɔmhyɛlɛniɛ Yesaya bɔ ye baba ole Amoso ne, ɔwale Hesekia berɛ oosele ye kyɛ, “AWURADE nwa nyoo, ‘Toto wɔ si yé, ofikyɛ ɛbaawu, na ɛngɔte apɔ.’ ”

²Yeɛ Hesekia fale ye nye hyirele terɛ bɔle mbaeɛ hyirele AWURADE kyɛ,

³“Ao AWURADE, kyɛbɔ mafa m’ahone amukoraa mali wɔ dwirɛ so nahorɛ nu, ɔne kyɛbɔ mayɔ bɔ ɔtengyɛ wɔ wɔ nyunu ne, mesrɛ wɔ, fa wɔ nye to.” Na Hesekia suni hahii.

⁴Anzana Yesaya ɔbaafi ahemvie aluo berɛ ofite kɔ ne, AWURADE lale ye dwirɛ ali hyirele ye kyɛ,

⁵“Sa wɔ si kɔhã kyire Hesekia bɔ odi hene wɔ me mmenia so ne kyɛ, AWURADE wɔ nana Dawide ye Nyameɛ ne, ɔnwa nyoo: Matie wɔ mbaeɛ ne, na manwu ɛmoen bɔ ɛte ne. Nahorɛ nu, ngɔsa wɔ anwonyerɛ na ɛlɛsa ne aso, ɛkɔhɔ AWURADE asɔneyɛɛ sua nu berɛ.

⁶Ngɔto wɔ ngoa nu afoɛ buru ne nnu. Ngɔpepɛ ngole wɔ ne kuro ye ngofi Asiria hene sa nu. Ɔnate me bɔbɔ me ti, ɔne me somvoɛ Dawide ti, ngɔbɔ kuro ye anwo waen.”

⁷Yeɛ Yesaya sele kyɛ, “Ɛ́mɔbrɛ me borɔdoma bɔ babɔ ye kunguma ɔ. Ɛ́mɔfa bɛyɛ mbɔmbɔ ne aso, na ɔkɔte apɔ.”

⁸Yeɛ Hesekia bisale Yesaya kyɛ, “Nzikyɛ sɛngyerɛnneɛ yeɛ okyire kyɛ AWURADE kɔsa me anwonyerɛ, ná afei mahɔ AWURADE asɔneyɛɛ sua ne anu ɛlɛsa ne aso ɔ?”

⁹Na Yesaya buale kyɛ, “Nikyee bɔ AWURADE ahyɛ wɔ ye nwo bɔ ne, ye nwo sɛngyerɛnneɛ bɔ ɔfa kyire wɔ ɛhe: Ekuro kyɛ wawoɛ ɔkɔ ye nyunu agyirɛ buru, anaakyɛ osa ye si agyirɛ buru?”

¹⁰Na Hesekia buale kyɛ, “Kyɛ wawoɛ ɔkɔ ye nyunu agyirɛ buru de, ɔnyɛ se, yiti maa osa ye si agyirɛ buru.”

¹¹Yeɛ ngɔmhyɛlɛniɛ Yesaya sũ frɛle AWURADE, na AWURADE mane wawoɛ ne sale ye si agyirɛ buru, wɔ atweleɛ bɔ Nana Ahase sili ne aso.

¹²Sɔ mmerɛ ne, Babilɔn hene Merodake Baladan bɔ ye baba ole Baladan ne, otuli ɛbɔfoɛ mɔ fale krataa ne akyɛdeɛ maa bɛɛmane Hesekia, ofikyɛ né wate kyɛ anwonyerɛ abɔ Hesekia.

¹³Hesekia lele bɛ nyemene so, na ye sua bɔ osie nningyein hemɔ amukoraa nu ne, obukye hyirele bɛ: ɛdwetɛ, esikaa kɔkorɛ, ayirefona ne ngoo paa. Ye koɛhonɛ nningyein sua, ɔne nningyein amukoraa bɔ bɛwɔ ye sua mɔ bɔ osie nningyein nu ne koso, obukye hyirele bɛ. Na nikye fee nne Hesekia ahemvie berɛ anaa ye ahennie ne anu amukoraa bɔ wamva wangyire bɛ ɔ.

¹⁴Yeɛ ngɔmhyɛlɛniɛ Yesaya hɔle Nana Hesekia berɛ oobisale ye kyɛ, “Mmenia hemɔ befi nisua yeɛ bɛwale wɔ berɛ ɔ, na b’amaneɛ? Hesekia buale kyɛ, “Befi maen bie anu dedeede yeɛ bɛwale ɔ. Befi Babilɔn.”

¹⁵Yesaya bisale kyɛ, “Nzikyɛ yeɛ beenwuni ye wɔ w’awuro wa ɔ?” Na Hesekia buale kyɛ, “Banwu nningyein bɔ ɔwɔ m’awuro wa amukoraa, na me sua mɔ bɔ mesie nningyein nu ne, nu nikyee biala nne berɛ bɔ mamva mangyire bɛ ɔ.”

¹⁶Yeɛ Yesaya sele Hesekia kyɛ, “Tie, AWURADE noa dwirɛ ɛhe:

¹⁷Nningyein bɔ ɔwɔ w’ahemvie wa, ɔne agyapadeɛ bɔ wɔ nana mɔ bapena bagua berɛ maa waadwu ɛnɛ ye, tie, mmerɛ bie ɔ́ba bɔ bɛkɔsoa ye mukoraa bɛkɔhɔ Babilɔn ɔ. AWURADE nwa nyoo, bɛngɔyakyi nikye fee.

¹⁸Wɔ bɔbɔ wɔ boso ama nemɔ bie, bɛkɔsesa bɛ bɛkɔhɔ, na bɛkɔyɛ bɛ sayɛɛ wɔ Babilɔn hene ahemvie.”

¹⁹Yeɛ Hesekia sele Yesaya kyɛ, “AWURADE noa dwirɛ bɔ ahã ahyire mene, ɔte paa.” Ɔhane sɔ, ofikyɛ onyane adwene kyɛ, “Sɛ me mmerɛ so maen ne konya asomdwee, ná edwirɛ tɛɛ biala ngosi de a, ye de edwirɛ ye paa nu ɔ.”

²⁰Afei Hesekia nwo dwirɛ ngaa ne, ye koɛhonɛ nu anwoserɛ, kyɛbɔ ɔpɛle ɛkwaa fale dodobɛen tole nu mane nzue fale nu hɔle Yerusalem kuro ne anu ne, amba, bahyerɛ ye wɔ Yuda ahemvo nwo dwirɛ nwomaa ne anu.

²¹Hesekia toale ye mbanyi mɔ, na ɔwa bienzua Manase lili ye bia.