Read Sehwi 2 Ahemvo 25 Bible Online

2 Ahemvo 25 - Sehwi bible

2 Ahemvo 25

¹Sedekia lili hene ne, ye afoɛ ngona ne anu, bosome buru ne anu, ye eleburu ne aso, Babilɔn hene Nebukadenesa fale ye koɛhonɛfoɛ amukoraa ɔɔfale koɛ tetale Yerusalem, na otuale kuro ne. Bɛkyekyele nyinasoɛ bɔ bɛkɔfo so bɛkɔhɔ kuro ne anu ɔ bɛpɛle kuro berɛ fasue ne anwo beyiale.

²Yiti betuale kuro ne ala maa oodwuli mmerɛ bɔ Sedekia nyane afoɛ buru ne ko wɔ bia ne aso ɔ.

³Bosome nna ne anu, ye ɛlɛhona ne aso, ɛhɔen pohonandafe bie bɔ né wawa kuro ne aso ne, nu yɛle se paa bɔ né aseɛ ne aso ama bennya aleɛ benni ɔ.

⁴Na Babilɔnfoɛ ɛlɔen ne bɛbɔngyele kuro berɛ fasue ne anu tokuro. Ɔwɔ nu kyɛ né Babilɔn ɛlɔen ne bapɛ kuro ne anwo bayia de, nakoso kɔngɔen, Nana Sedekia ne ye koɛhonɛfoɛ amukoraa bɛnwati bɛfale pambim bɔ ɔwɔ fasue bɔ ɔbɔ ye nwo nyɔ ne anu bɛhɔle. Pambim ne pingye Nana Sedekia turo ne. Bɛfale bɛ nye behyirele asue Yɔɔdan bɔnza ne anu dɔ.

⁵Nakoso Babilɔn koɛhonɛfoɛ ne, bɛpole Nana Sedekia so bɛɛtole ye wɔ Yeriko aseɛ frɛtɛɛ ne aso, na ye koɛhonɛfoɛ nemɔ amukoraa bɛbɔle aya bɛyakyili ye nu.

⁶Bɛhyele Nana Sedekia bɛfale ye bɛbrɛle Babilɔn hene wɔ Ribla, na obuale ye foɛ.

⁷Behuhuni Sedekia mma mmienzua bɔ ye bɔbɔ ye nye tua ɔ, na betutuli Sedekia nye. Beguale ye ngɔnzɔngɔnzɔ bɛfale ye bɛhɔle Babilɔn.

⁸Nebukadenesa lili Babilɔn hene ne, ye afoɛ bɔ ɔtɔ so buru ne ngona ne anu, bosome bɔ ɔtɔ so nnu ne anu, ye ɛlɛsoo ne aso, Nebusaradan bɔ ɔte Babilɔn hene awɛmvoɛ nemɔ aso safohene, ná osa te ye mbanyi nemɔ anu ko ne, ɔhɔle Yerusalem.

⁹Ɔyerale AWURADE awuro ne, ahemvie ne, yeɛ Yerusalem sua amukoraa. Ɔyerale sua biala bɔ odi mu ɔ.

¹⁰Babilɔnfoɛ koɛhonɛfoɛ amukoraa bɔ né bɛboka awɛmvoɛ nemɔ safohene ne aso ne, bebuli Yerusalem nwo fasue ne beguale.

¹¹Mmenia ngaa bɔ baha kuro ne aso ne, ɔne Yuda koɛhonɛfoɛ bɔ né banwati bafa bɛ nwo baabɔ Babilɔn hene ne, yeɛ mmenia ne amukoraa, Nebusaradan bɔ ɔte awɛmvoɛ nemɔ aso safohene ne, ɔhyele bɛ nnure fale bɛ hɔle.

¹²Nakoso awɛmvoɛ nemɔ aso safohene ne, ɔyakyili aseɛ ne aso mmenia bɔ bɛngɔhora ko bɛngora hute nemɔ bie berɛ kyɛ bɛyɔ bobe boo ne eboo ngaa nemɔ aso adwuma.

¹³AWURADE awuro berɛ kɔɔbere bonima nemɔ, yeɛ nyinasoɛ nemɔ ne kɔɔbere nzim bɔ bɛwɔ AWURADE awuro berɛ ne, Babilɔnfoɛ bubuli bɛ, na bɛsesale kɔɔbere ne bɛhɔle Babilɔn.

¹⁴Bɛsesale ɛhemɔ koso bɛhɔle: ngukue nemɔ, sofi nemɔ, akapɛ bɔ bɛfa bɛtengyɛtengyɛ kanea nyamaa noa nemɔ, ɛyɛɛ kulie nemɔ, ɔne kɔɔbere nningyein amukoraa bɔ bɛfa bɛyɔ asɔneyɛɛ sua nu ɛsɔnenɛ adwuma,

¹⁵yeɛ ngukue bɔ bɛfa see begua nu ɔ ɔne ayaa nemɔ. Nikyee biala bɔ bafa esikaa kɔkorɛ bayɔ ne, yeɛ nikyee biala bafa ɛdwetɛ bayɔ koso, awɛmvoɛ nemɔ aso safohene ne sesale hɔle.

¹⁶Na bonima nyɔ nemɔ, nzim ko ne, yeɛ nyinasoɛ bɔ Solomon yɔle siesiele AWURADE awuro berɛ ne, sɔ nningyein nemɔ, kɔɔbere bɔ bɛfa bɛyɔle ne, né bɛkari a, bennwu ye noa.

¹⁷Bonima ko biala, fi ye aseɛnwo bɔ ɔkwaadwu ye anwuro ne, ɔte agyirɛ buru ne mmɔtwɛ. Né kɔɔbere abotire wɔ so. Abotire ne ko biala, fi ye aseɛnwo bɔ ɔkwaadwu ye anwuro ne, ɔte agyirɛ nza. Né bafa kɔɔbere bali akengaa adwii ne ɛtɛen adwii bapɛ abotire ne anwo bayia. Bonima bɔ ɔtɔ so nyɔ ne koso, sɔ ala yeɛ belili adwii beguale ye nwo ɔ.

¹⁸Nebusaradan bɔ ɔte awɛmvoɛ nemɔ aso safohene ne, ɔhyele ɛhemɔ nnure: ɔsɔfo panyi Seraya, Sefania bɔ ɔsɔfo panyi nne berɛ a, yeɛ ɔwɔ berɛ ne, yeɛ mmenia nza bɔ bɛwɛne asɔneyɛɛ sua anoa ne.

¹⁹Osa hyele ɛhemɔ koso nnure fili Yerusalem: safohene ko bɔ né ɔnea Yuda koɛhonɛfoɛ nemɔ aso ne, Nana Sedekia foɛtulɛfoɛ nemɔ anu nnu bɔ onwuni bɛ wɔ kuro berɛ ɔ, safohene bɔ ɔte ahyerɛlɛniɛ bɔ ɔboaboa maen ne anu koɛhonɛfoɛ nemɔ anoa, yeɛ maen ne anu mmenia aburasia bɔ onwuni bɛ wɔ kuro berɛ ɔ.

²⁰Nebusaradan bɔ ɔte awɛmvoɛ nemɔ aso safohene ne, ɔhyele bɛ nnure fale bɛ ɔɔmane Babilɔn hene wɔ Ribla.

²¹Babilɔn hene maa befini bɛ mbire, na ɔmaa behuhuni bɛ wɔ Ribla bɔ ɔwɔ Hamate aseɛ so ne. Yiti bɛhyele Yudafoɛ nnure befili bɛ maen nu bɛhɔle.

²²Mmenia bɔ né baha Yuda aseɛ so, bɔ Babilɔn hene Nebukadenesa yakyili bɛ maa bɛhale berɛ ne, Nebukadenesa fale Gedalia bɔ ye baba ole Ahikam, bɔ ye baba ole Safan ne, olili bɛ so amrado.

²³Na Yuda safohene nemɔ amukoraa bɛ ne bɛ koɛhonɛfoɛ tele kyɛ Babilɔn hene abɔ Gedalia amrado ne, bɛ ne bɛ koɛhonɛfoɛ hɔle Gedalia berɛ wɔ Misepa. Bɛ ole: Netania awa Yismael, Karea awa Yohanan, Netofaniɛ Tanhumete awa Seraya, yeɛ Yaasania bɔ ɔse te Maakatiniɛ ne.

²⁴Gedalia tale ndaen hyirele bɛ ne bɛ mmenia kyɛ, “Nnɛma ɛmɔsuro Babilɔn mbanyi nemɔ. Ɛ́mɔtena maen ye anu ná ɛ́mɔso Babilɔn hene, na okoyie ɛmɔ yé.”

²⁵Nakoso bosome nzoo ne anu, Yismael bɔ ɔte dehyeɛ bɔ ye baba ole Netania bɔ ye baba ole Elisama ne, ɔfale mmienzua buru bokale ye nwo so, na beehuni Gedalia ne Yudafoɛ ne Babilɔnfoɛ bɔ né bɛboka ye so wɔ Misepa ne.

²⁶ Yeɛ mmenia ne amu, atitire ne kwahweabaa mɔ, bɛ ne safohene nemɔ bɛnwati bɛhɔle Misraim, ofikyɛ né besuro kyɛ Babilɔnfoɛ kootua bɛ so kerɛ.

²⁷Bɛhyele Yuda hene Yehoakyin nnure bɛhɔle ne, ye afoɛ aburasa ne nzoo ne anu, bosome buru ne nyɔ ne anu, kyẽa bɔ ɔtɔ so aburanyɔ ne nzoo ne aso, afoɛ bɔ Babilɔn hene Ewile Merodake lili hene ne ala, ɔyele Yuda hene Yehoakyin fili kuku nu.

²⁸Ɔne Yehoakyin belili ngitahoɛ paa, na ahemvo bɔ bahye bɛ nnure bahɔ Babilɔn baboka Yehoakyin so ne, ɔmane ye dibea bɔ ɔtra bɛ mukoraa ɔ.

²⁹Yiti Yehoakyin puropurole ye kuku nu ndaadeɛ ne guale wurale ndaadeɛ paa, na mmerɛ amukoraa bɔ né ɔte ase ne, né ɔne Ewile Merodake yeɛ bɛtena poen nwo bedidi ɔ.

³⁰Na Babilɔn hene mane Yehoakyin nikyee bɔ okohia ɔ daa biala bɔ né Yehoakyin te ase ɔ.