Read Sehwi 2 Ahemvo 3 Bible Online

2 Ahemvo 3 - Sehwi bible

2 Ahemvo 3

¹Yuda hene Yehosafate lili bia ne, ye afoɛ buru ne mmɔtwɛ ne anu, Ahabo awa Yehoram lili Yisrael so hene wɔ Samaria. Olili hene afoɛ buru ne nyɔ.

²Ɔyɔle bɔ ɔte bɔne wɔ AWURADE nyunu ɔ. Na mmom, ye bɔne ando bɔ ye baba ne ye maame bɛyɔle ɔ, ofikyɛ otuli Baal bonima bɔ ye baba gyinane ne abo fili berɛ.

³Nakoso Nebate awa Yeroboam ye bɔne bɔ ɔnate so ɔhwene Yisrael hɔle bɔne nu ne de, ɔtoale so yɔle bie, na wandwe ye nwo wamvi ye nwo.

⁴Né Moabo hene Mesa osie mmoaen. Na ɔyɛ a, né ɔfa mmoaen akrɔngrɔma apee ɛyaa ko otua toɔ ma Yisrael hene. Né osa ɔfa mmoaen nyii apee ɛyaa ko bɛ nwo nwiaa otua toɔ ma ye.

⁵Nakoso Ahabo wuli ne, Moabo hene yɛle Yisrael hene nwo lɔen.

⁶Yiti sɔ mmerɛ ne, Nana Yehoram sili nu fili Samaria ɔɔboaboale Yisrael koɛhonɛfoɛ amukoraa noa.

⁷Ɔkɔ ne, ɔmaa bɛɛbɔle Yuda hene Yehosafate amaneɛ kyɛ, “Moabo hene ayɛ me nwo lɔen. Ɛkɔɔboka me maa me ne Moabo yɛkɔho anaa?” Yehosafate buale kyɛ, “Ngɔhɔ, ngyi wɔ si. Me lɔen te wɔ lɔen, yeɛ me mbɔngɔ te wɔ deɛ.”

⁸Osa bisale kyɛ, “Nisua atee yeɛ yɛfa so yɛkɔ ɔ?” Na Yehoram buale kyɛ, “Yɛkɔfa Edom ɛserɛ so atee ne aso.”

⁹Yiti Yisrael hene, Yuda hene yeɛ Edom hene besili nu. Na bɛpɛle atee bɔ ɔkondo ɔ ɛlɛsoo ne, né bennya nzue bɛmma koɛhonɛfoɛ nemɔ ne bɛ ngaka bɔ bɛboka bɛ so ne.

¹⁰Yeɛ Yisrael hene sele kyɛ, “Aworabɔlɛ dwirɛ! Eh, ahemvo nza ye, aso AWURADE aboaboa yɛ noa, kyɛ ɔbaafa yɛ wura Moabo hene sa anaa!”

¹¹Nakoso Yehosafate bisale kyɛ, “Aso AWURADE ngɔmhyɛlɛniɛ nne wa, bɔ yɛkɔhora yɛkɔfa ye so yɛkobisa AWURADE noa dwirɛ ɔ?” Yeɛ Yisrael hene somvoɛ nemɔ nu ko buale kyɛ, “Safate awa Elisa bɔ né ɔte Elia somvoɛ ne, ɔwɔ berɛ.”

¹²Yehosafate sele kyɛ, “Amba AWURADE fa ye so dwudwo.” Yiti Yisrael hene ne Yehosafate ne Edom hene besili nu bɛhɔle Elisa berɛ.

¹³Elisa sele Yisrael hene kyɛ, “Ɛpena nzu me dɔ? Kɔ ɛse ngɔmhyɛlɛfoɛ ne eni ngɔmhyɛlɛfoɛ nemɔ dɔ.” Nakoso Yisrael hene buale ye kyɛ, “Daabi, ɔyɛ me kyɛ AWURADE yeɛ waboa yɛ ahemvo nza ye yɛ noa kyɛ ɔbaafa yɛ wura Moabo sa ɔ.”

¹⁴Elisa sele kyɛ, “Kyɛbɔ Asafo AWURADE bɔ ngyi ye nyunu ye ɔte ase ye, sɛ nna Yuda hene Yehosafate yeɛ mefa me nye meto ye a, ahaa mengɔnea wɔ nyunu po anaa mengɔtɛ wɔ so.

¹⁵Nakoso ɛ́mɔpena edweintolɛniɛ bɛ́ma me.” Na edweintolɛniɛ ne gu so ɔto dwein ne, AWURADE tumi wale Elisa so.

¹⁶Na osele kyɛ, “AWURADE nwa, ‘Sɔ bɔnza bɔ nu ayɛ wosee ye, ngɔmaa nzue koyi nu.’

¹⁷Ofikyɛ AWURADE nwa, ‘Ɛmɔngonwu kyɛ mvrama tu ɔ, yeɛ ɛmɔngonwu kyɛ esue tɔ ɔ, nakoso nzue koyi bɔnza ne anu tɛkyɛ, amaa ɔnate so ɛmɔ ne ɛmɔ nyɛmmoa ne ɛmɔ ngaka banya bie bano.’

¹⁸Ɛhe te nikyee kaaba koraa wɔ AWURADE nye so, ofikyɛ ɔkɔfa Moabo kowura ɛmɔ sa koso.

¹⁹Kuro biala bɔ bato ye nwo fasue, ɔne kuro titire biala, ɛmɔkoli so ngonim. Bakaa bɔ bedi ye mma biala ɛmɔkobu ye bɛkɔto ase. Mbombonzue biala, ɛmɔkotua nekaa bɔ nzue ne ofi opu ba ɔ, na aseɛ bɔ ɔkye aleɛ biala, ɛmɔkɔhwe nyɔboɛ bekogua so bɛkɔsɛkye ye.”

²⁰Aleɛ hyene ne, ngyerɛmɔ afɔleɛbɔlɛ mmerɛ dwuli ne, mvum nu, nzue fi Edom bue nu dɔ pu wale alaa, kɔpem kyɛ nzue buli aseɛ ne aso nekaa biala ɔ.

²¹Moabofoɛ amukoraa bɛtele kyɛ ahemvo nemɔ bafa koɛ batoa bɛ ne, bɛfrɛfrɛle bɛ mmenia bɔ baso koɛhonɛ amukoraa, fi mmerandeɛ so kɔpem mbanyi so maa bɛboale bɛ noa wɔ ɛwɛen ne aso.

²²Moabo koɛhonɛfoɛ nemɔ dwɔsole ngyerɛmɔ tutuutu, na eyia bɔle nzue ne aso ne, benwuni nzue bɔ ɔwɔ bɛ ndendeneɛ so ne kyɛ ɔte kɔɔ kyɛ mogya.

²³Yeɛ bɛteanene nu kyɛ, “Mogya ɛne! Bekye ahemvo nemɔ bapɛ bɛ nwo baho bahũhũ bɛ nwo. Moabofoɛ ee, ɛ́mɔma yɛɛsesa koɛ nu nzesadeɛ ne!”

²⁴Nakoso Moabo koɛhonɛfoɛ beedwuli Yisrael koɛhonɛfoɛ asikyeleɛ ne anwo ne, Yisraelfoɛ dwɔsole bɛfale koɛ bɛtetale bɛ. Moabofoɛ nwatili fili Yisraelfoɛ nyunu. Na Yisraelfoɛ foane Moabofoɛ behuhuni bɛ toonn wɔ Moabo aseɛ so.

²⁵Bɛsɛkyele nguro nemɔ anu nningyein pasaa, na aseɛ bɔ ɔkye aleɛ biala koso bɛ nu biala gyili nyɔboɛ tole so, kɔpem kyɛ nyɔboɛ katale aseɛ ne aso amukoraa ɔ. Mbombonzue biala, nekaa bɔ ye nzue ne ofi opu ɔba ne, betuale ye, na bakaa bɔ bedi ye mma biala koso, bebu bɛtole ase. Kire Haresete angome yeɛ ɔte kuro bɔ bammubu ye nyɔboɛ fasue ɔ, kɔpem kyɛ koɛhonɛfoɛ bɔ bɛto nyɔboɛ ne, bɛɛpɛle ye nwo beyiale bɛfale koɛ bɛtetale ye ɔ.

²⁶Moabo hene nwuni kyɛ ɔpena di ngoguo ne, ɔfale koɛhonɛfoɛ ɛyaa nzoo bɔ betiratira ngrandɛ, kyɛ bɛkwaatutu bɛfa Edom hene ndendeneɛ so dɔ bɛnwati bɛkɔ, nakoso bangora.

²⁷Yiti Moabo hene hyele ye bamuɛbaa bienzua bɔ kyẽa bie okoli ye bia ɔ, na ɔfale ye bɔle naen yeralɛ afɔleɛ wɔ fasue ne aso. Na ɛyaafɛlɛ piri wale Yisrael so. Yiti bandoa koɛ ne aso ko, na besale bɛ si bɛhɔle bɛ bɔbɔ bɛ maen nu.