Read Sehwi 2 Ahemvo 4 Bible Online

2 Ahemvo 4 - Sehwi bible

2 Ahemvo 4

¹Ngɔmhyɛlɛfoɛ fekue ne, bɛ nu ko aye oosuni hyirele Elisa kyɛ, “Me hu, bɔ ɔte wɔ somvoɛ ne, wawu. Ɛse kyɛ wɔ somvoɛ, né osuro AWURADE. Nakoso ebie bɔ yɛma ye kerɛ ɔ, wawa kyɛ ɔbaafa me mma nyɔ nemɔ yɛ nganga sie kerɛ ne anoa.”

²Elisa bisale ye kyɛ, “Nzikyɛ yeɛ nyɔ mma wɔ ɔ? Ka kyire me, nzikyɛ yeɛ ele ye wɔ awuro ɔ.” Braa ne buale kyɛ, “W’afaneɛ, nnne nikye fee wɔ awuro, sana ngoo bua ko ala.”

³Na Elisa sele ye kyɛ, ‘‘Fite kɔsrɛsrɛ bua fi wɔ mmango mɔ amukoraa bɛ berɛ. De bua bɔ hwee nne nu ɔ; pena pee.

⁴Afei ɛne wɔ mma mɔ, ɛmɔhɔ sua nu ná ɛ́mɔto ɛmɔ nwo anoa nu. Hwiehwie ngoo ne gua bua nemɔ amukoraa nu. Bɔ okoyi biala, fa sie ahameɛ.”

⁵Yiti braa ne fili Elisa nwo berɛ hɔle, na ɔne ye mma mɔ bɛɛtole bɛ nwo anoa nu. Bɛhɔle so bɛsesale bua bɛmane ye, na ye koso ɔhɔle so ohwiehwiele ngoo ne guaguale nu.

⁶Bua nemɔ yiyili ne, osele ɔwa ne ko kyɛ, “Fa bua bieku brɛ me.” Nakoso obuale ye kyɛ, “Bua ko nne berɛ.” Yeɛ ngoo bɔ ohwie ne ɔpɛle ɔ.

⁷Braa ne ɔɔbɔle Nyameɛ sona ne amaneɛ, na osele braa ne kyɛ, “Kɔtɔne ngoo ne fa tuatua wɔ nwo kerɛ. Na bɔ ɔkɔha ne, ɛne wɔ mma mɔ, ɛ́mɔfa bɛnea bɛ nwo.”

⁸Ɛlɛho bie, né Elisa ɔpɛ nu wɔ Sunem. Né braa sikaniɛ bie te kuro berɛ. Ɔtole ye sa frɛle Elisa srɛle ye maa oodidili. Yiti mmerɛ biala, sɛ Elisa ɔpɛ nu kuro berɛ a, né wafa braa ne berɛ waadidi.

⁹Nziɛ ye, braa ne sele ohu kyɛ, “Tie, mede medi kyɛ biaa ye bɔ ɔtaa ba yɛ wa ye, ɔte Nyameɛ sona krongron.

¹⁰Mesrɛ wɔ, sua bɔ yasamo so ne, maa yɛsi sua kaaba ko yɛsie so yɛma ye, ná yɛfa mba, ɛpoen, bia ne kanea yɛsiesie nu, amaa mmerɛ biala bɔ ɔkɔwa yɛ wa ne, né waala nu.”

¹¹Ɛlɛho bie, Elisa hɔle kuro berɛ, na ɔhɔle aborɔsaen ne aso ɔɔlale sua ne anu.

¹²Osele ye somvoɛ Gehasi kyɛ, “Kɔfrɛ Sunamniɛ braa ne ma me.” Ɔɔfrɛle braa ne maa oogyinane Elisa nyunu berɛ.

¹³Elisa sele Gehasi kyɛ, “Bisa ye ma yɛ kyɛ, ‘Ɛfɛɛ wora bɔ afɛ yɛ nwo ye, nzikyɛ yeɛ ekuro kyɛ yɛyɔ yɛma wɔ ɔ? Yɛɛfa wɔ dwirɛ yɛto nana anaa koɛhonɛfoɛ safohene nyunu yɛma wɔ anaa?’ ” Na braa ne buale ye kyɛ, “Nde me bɔbɔ me maen nu.”

¹⁴Yeɛ Elisa bisale kyɛ, “Nzikyɛ yeɛ yɛkɔyɔ yɛkɔma braa ye ɔ?” Na Gehasi buale kyɛ, “Braa ne olle ba, yeɛ ohu koso wayɛ aworowaa.”

¹⁵Elisa sele kyɛ, “Frɛ ye bra.” Na Gehasi frɛle braa ne maa oogyinane anoa ne anyunu berɛ.

¹⁶Na Elisa sele kyɛ, “Afoɛ bieku bekye sua, ɛkɔfa ɛwa kɔto wɔ gya so.” Yeɛ braa ne buale kyɛ, “Daabi, me mene, Nyameɛ sona, nnɛlakalaka w’afaneɛ.”

¹⁷Braa ne nwonzɛle, na mmerɛ ne dwuli ne, ɔwole baa bienzua, kyɛbɔ Elisa hã hyirele ye ne ala.

¹⁸Akwadaa ne nyini, na ɛlɛho bie, ɔpole ye baba so wɔ nekaa bɔ biaa ne ɔne mmenia bɛte ayuo ɔ.

¹⁹Ɔhã hyirele ye baba kyɛ, “Aa, me ti pakye me, me ti pakye me!” Na biaa ne sele ye bɔbɔ ye somvoɛ kyɛ, “Pagya ye kɔma ye maame.”

²⁰Ɔpagyale ye ɔɔmane ye maame. Akwadaa ne lale ye maame gya so toonn maa oodwuli eyia, na owuli.

²¹Braa ne fole aborɔsaen ne na ɔɔfale akwadaa ne tole Nyameɛ sona ne mba so. Ɔtole ye anoa nu, na ɔyakyili ye berɛ hɔle.

²²Yeɛ braa ne somane ma beesele ohu kyɛ, “Mesrɛ wɔ, ma somvoɛ nemɔ anu ko ɔfa afunum beleɛ nemɔ anu ko ɔbrɛ me, na ngɔ Nyameɛ sona ne berɛ kekesaala ye nza mmra.”

²³Ohu bisale kyɛ, “Ɛnɛ kyẽa ye, nna ɛsraen foforɛ aluolue kyẽa ɔ, yeɛ nna afofikyẽa ɔ,[1] nzu ati yeɛ ɛkɔ ye berɛ ɔ? Na braa ne buale kyɛ, “Ɔte bɔkɔɔ”

²⁴Yeɛ braa ne siesiele afunum ne, na ɔhã hyirele ye somvoɛ ne kyɛ, “Ma kaka ne ɔhã ye nwo; nnɛmaa ogyina, sana mahã mahyire wɔ kyɛ maa ogyina.”

²⁵Yiti osili nu hɔle Nyameɛ sona ne berɛ wɔ Kamɛl bokaa ne anwo. Nyameɛ sona ne nwuni kyɛ braa ne ba ne, osele ye somvoɛ Gehasi kyɛ, “Nea, Sunamniɛ braa ne yeɛ ɔba ne.

²⁶Tu amirika koyia ye, na bisa ye kyɛ, “Wɔ nwo te paa? Ehu nwo te paa? Akwadaa ne nwo te paa? Na braa ne buale kyɛ, “Yɛ nwo te paa.”

²⁷Braa ne oodwuli Nyameɛ sona ne anwo berɛ wɔ bokaa ne aso ne, ɔkotole sɔle ye gya. Gehasi hɔle braa ne anwo berɛ kyɛ ɔkwaapia ye fi berɛ. Nakoso Nyameɛ sona ne sele kyɛ, “Yakyi ye, ofikyɛ odi aworabɔlɛ piri; AWURADE afa afea me bɔ wanga wangyire me ɔ.”

²⁸Yeɛ braa ne nwa, “Me mene, aso nzrɛle wɔ dɔ baa anaa? Manga kyɛ nnɛlakalaka me?”

²⁹Na Elisa sele Gehasi kyɛ, “Bɔ w’abɔsoɛ, fa me pɔmaa ne tira, na si nu kɔ. Sɛ eyia ebiala wɔ atunu a, nnebisa ye ahye; na sɛ ebiala bisa wɔ ahye a, nnesuro. Fa me pɔmaa ne kɔto akwadaa ne aso.”

³⁰Yeɛ akwadaa ne maame sele kyɛ, “Kyɛ AWURADE te ase ye, ɔne kyɛ wɔ koso ɛte ase ye, sɛ ɛne me angɔ a, mengɔhɔ.” Yiti Elisa dwɔsole lili braa ne asi.

³¹Gehasi lili bɛ nyunu moa, na ɔɔfale pɔmaa ne tole akwadaa ne aso, nakoso akwadaa ne wangekã ye nwo. Gehasi sa ooyiale Elisa, na ɔbɔle ye amaneɛ kyɛ, “Akwadaa ne andingye.”

³²Elisa wurale awuro berɛ ne, onwuni kyɛ akwadaa ne wawu. Né ɔla Elisa mba ne aso.

³³Yiti ɔworole sua nu berɛ, na ɔtole ye nwo ne akwadaa ne anoa nu, na ɔbɔle mbaeɛ hyirele AWURADE.

³⁴Ɔfole mba ne aso, na obutuli akwadaa ne aso. Ɔmane ye noa hane akwadaa ne noa, ye nye hane akwadaa ne nye, yeɛ ye sa fuafuale akwadaa ne asa nu. Na ɔtɛ butu akwadaa ne aso ne, akwadaa ne anwo yɛle hye.

³⁵Elisa dwɔsole, ɔhɔle sua ne ti wale ye ti, na osa fole mba ne oobutuli akwadaa ne aso. Akwadaa ne pɛle yaen pɛen nzoo, na ɔtetele ye nye.

³⁶Elisa frɛle Gehasi na osele ye kyɛ, “Frɛ Sunamniɛ braa ne maa ɔbra.” Yiti ɔfrɛle ye. Braa ne wale Elisa nwo berɛ, na Elisa sele ye kyɛ, “De ɛwa ne.”

³⁷Braa ne wurale nu, ɔtole ye nwo yele Elisa gya bo, ɔfale ye nyunu butuli ase, na afei ɔfale ɔwa ne fitele.

³⁸Elisa sa wale Gilgal. Sɔ mmerɛ ne, né ɛhɔen ape maen ne anu. Mmerɛ bɔ ngɔmhyɛlɛfoɛ fekue ne bɛtete Elisa nyunu berɛ ne, osele ye somvoɛ ne kyɛ, “Fa turonzemaa piri ne sie see so, na yɛ turoo ma ngɔmhyɛlɛfoɛ fekue ne.”

³⁹Bɛ nu ko hɔle buro kyɛ ɔkwaatete kwaanzusuaa. Onwuni eburo nyamaa bie, na ɔtetele ye mma ne bie guale ye tena nu maa oyili. Osa wale ɔɔpepɛle guale turo ne anu, wɔ aberɛ bɔ né ɔnze nikye horɛ ɔ.

⁴⁰Bɛsale bie bɛmane ngɔmhyɛlɛfoɛ nemɔ kyɛ beli. Nakoso begu so bedidi ne, bɛteane nu kyɛ, “O Nyameɛ sona, ɛborɔ wɔ turo ne anu!” Na bangora ye di.

⁴¹Yeɛ Elisa sele kyɛ, “Nzaade ɛ́mɔma me esam kãa.” Ɔfa guale turonzemaa ne anu, na ɔhane kyɛ, “Sa bie maa beli.” Na turoo bɔ ɔwɔ turonzemaa ne anu ne, ɛborɔ ne fili nu.

⁴²Biaa bie fili Baal Salisa wale. Na aleɛ bɔ ofi fieso aleɛ bɔ bali moa bapɛ nu ne, ɔfa brɛle Nyameɛ sona ne. Ɔte ayuo paanoo aburanyɔ, yeɛ aburoo monɛ. Né ye mukoraa wɔ ye bɔtɔ nu. Elisa sele kyɛ, “Fa ma mmenia ne maa beli.”

⁴³Nakoso ye somvoɛ ne bisale kyɛ, “Aso ɛhe kɔso mmenia ɛyaa ko di?” Yeɛ Elisa sa sili so kyɛ, “Fa ma mmenia ne maa beli, ofikyɛ AWURADE nwa, ‘Bekoli maa ebie kɔha.’ ”

⁴⁴Ɔfa siele bɛ nyunu, na belili maa ebie hale, kyɛbɔ AWURADE hane ne ala.