Read Sehwi 1 Aberɛso Dwirɛ 10 Bible Online

1 Aberɛso Dwirɛ 10 - Sehwi bible

1 Aberɛso Dwirɛ 10

¹Afei Filistifoɛ fale koɛ bɛɛtoale Yisrael. Yisraelfoɛ nwati fili Filistifoɛ nyunu, na behuhuni Yisraelfoɛ beguale Gilboa bokaa ne aso.

²Filistifoɛ pole Sɔɔlo ne ye mma mmienzua nemɔ aso, na behuhuni Sɔɔlo mma mmienzua Yonatan, Abinadabo ne Malkisua.

³Koɛ ne anu yɛle se mane Sɔɔlo. Filisti agyaentolɛfoɛ nemɔ nwuni ye, na bɛtole agyaen besinane ye maa opurale.

⁴Na Sɔɔlo sele ye somvoɛ bɔ otira ye akodeɛ ne kyɛ, “Twe wɔ ngrandɛ ne fa wɔ me. Anyɔ a, mmenia hemɔ bɔ bɛmbɛ bɛ bienzua ye, bɛkɔɔgoro me nwo.” Nakoso ye somvoɛ bɔ otira ye akodeɛ ne ambene so kyɛ ɔkɔyɔ sɔ ɔ, ofikyɛ ɛserɛ piri hane ye. Yiti Sɔɔlo fale ye bɔbɔ ye ngrandɛ ne, na ɔtole ye nwo yele so huni ye nwo.

⁵Mmerɛ bɔ Sɔɔlo somvoɛ bɔ otira ye akodeɛ ne nwuni kyɛ Sɔɔlo awu nen, ye koso ɔtole ye nwo yele ye ngrandɛ ne aso huni ye nwo.

⁶Yiti Sɔɔlo ne ye mma mmienzua nza ne, ɔne ye awuro ama amukoraa bɛtotɔle wɔ koɛ ne anu.

⁷Na Yisrael koɛhonɛfoɛ amukoraa bɔ né bɛwɔ bɔnza ne anu ne, mmerɛ bɔ benwuni kyɛ Yisrael koɛhonɛfoɛ nemɔ banwati, ná Sɔɔlo ne ye mma mmienzua nemɔ koso bawuwu nen, bɛnwatili befili bɛ nguro nemɔ aso, na Filistifoɛ wale bɛɛfale nguro nemɔ bɛtenatenane so.

⁸Aleɛ hyene ne, Filistifoɛ hɔle kyɛ bɛkwaayeye Yisraelfoɛ bɔ bawuwu nemɔ bɛ nwo nningyein, na benwuni kyɛ Sɔɔlo ne ye mma nemɔ batotɔ wɔ Gilboa bokaa ne aso.

⁹Bɛyele ye nwo akodeɛ ne, bɛpɛle ye ti bɛfa bɛhɔle, na betuli bɔfoɛ mɔ maa bɛhɔle Filistifoɛ aseɛ so amukoraa, kyɛ bɛɛbɔ ndɛenvɛen ne nwo amaneɛ behyire bɛ mmosoen nemɔ ne maen ne anu mmenia.

¹⁰Bɛfale ye akodeɛ ne beeguale mmosoen nemɔ asɔneyɛɛ sua nu, na bɛfale ye ti ne besinzele bosoen Dagɔn asɔneyɛɛ sua nu.

¹¹Na mmerɛ bɔ Yabese Gileadefoɛ amukoraa bɛtele nikyee amukoraa bɔ Filistifoɛ bafa bayɛ Sɔɔlo nen,

¹²bɛ koɛhonɛfoɛ ahoneserɛfoɛ nemɔ besili nu bɛɛfale Sɔɔlo ne ye mma nemɔ bɛ fuin bɛhɔle Yabese. Besiele bɛ mmowue wɔ eluii bie abo wɔ Yabese, na bebua bɛlale ɛlɛsoo.

¹³Ɔnate Sɔɔlo asoserɛ ti owuli. Wanni nahorɛ wamma AWURADE, ɔnate kyɛ wanni AWURADE dwirɛ so. Afei koso, ɔhɔle nzamangɔmhyɛlɛniɛ berɛ abisa,

¹⁴na wammisa mmokalɛ wamvi AWURADE berɛ. Yiti AWURADE huni ye, na ɔkakyili ahennie ne wurale Yese awa Dawide sa.