Read Sehwi 1 Aberɛso Dwirɛ 11 Bible Online

1 Aberɛso Dwirɛ 11 - Sehwi bible

1 Aberɛso Dwirɛ 11

¹Afei Yisrael amukoraa bɛboale bɛ noa bɛhɔle Dawide berɛ wɔ Hebron. Na besele kyɛ, “Nana, yɛte wɔ bɔbɔ wɔ nnehyeɛ.

²Daa ne, bɔ né Sɔɔlo di yɛ so hene ne po, sɛ Yisrael ɔkɔhɔ oo, sɛ ɔkɔwa oo, wɔ yeɛ né ɛla ye noa ɔ. Na AWURADE wɔ Nyameɛ wahã wahyire wɔ kyɛ, ‘Wɔ yeɛ ɛkɔyɛ me maen Yisrael so neafoɛ ɔ, na wɔ yeɛ ekoli me mmenia Yisraelfoɛ so hene ɔ.’ ”

³Yiti Yisrael mbanyi amukoraa bɛwale Nana Dawide berɛ wɔ Hebron, na Dawide ne bɛ yɛle apam wɔ AWURADE nyunu wɔ Hebron. Na bɛpopale Dawide ngoo bɛfale ye besili Yisrael so hene, kyɛbɔ AWURADE dwirɛ bɔ ɔnate Samuel so hane ne, ɔte ne ala.

⁴Yerusalem bɔ né besa bɛfrɛ ye Yebusi, bɔ ɔte nekaa bɔ né Yebusifoɛ bɛte ne, Dawide ne Yisrael amukoraa bɛfale koɛ bɛɛtoale kuro ne.

⁵Na Yebusifoɛ ne sele Dawide kyɛ, “Ɛngɔhora wa ba.” Nakoso Dawide lili Sion anwoserɛ afealeɛ ne aso ngonim. Na kekesaala ye de, bɛfrɛ berɛ Dawide kuro.

⁶Na Dawide sele kyɛ, “Sona bɔ okoli moa kɔfa koɛ kɔɔtoa Yebusifoɛ ne, ye yeɛ ngɔbɔ ye safohene panyi paa ɔ.” Na Seruya awa Yoabo lili moa fale koɛ toale bɛ, yiti bɛbɔle ye safohene panyi paa.

⁷Dawide kyekyele ye atenaleɛ wɔ anwoserɛ afealeɛ berɛ, yiti bɛfrɛle berɛ Dawide kuro.

⁸Ɔkyekyele kuro ne bra yiale, fi sua bɔ bɛfrɛ ye Milo ne maa ye noa ooyiale, na Yoabo siesiele kuro berɛ sua ngaa bɔ basɛkye nemɔ.

⁹Dawide hɔle so nyane ngɔsoɛ, ofikyɛ Asafo AWURADE gyinane ye si.

¹⁰Dawide koɛhonɛfoɛ ne, bɛ nu atitire mɔ ɛhe. Bɛ ne Yisrael amukoraa begyinane ye si pindinn wɔ ye ahennie nu, kyɛ bɛmaa odi hene, kyɛbɔ AWURADE dwirɛ bɔ ɔhã fale Yisrael nwo ne, ɔte ne ala.

¹¹Dawide koɛhonɛfoɛ ahoneserɛfoɛ nemɔ, bɛ nwo dwirɛ ɛhe: Hakemoni awa Yasobeam yeɛ ne ɔla atitirefoɛ nza nemɔ noa ɔ. Mmerɛ bie, ɔfale ye pealɛɛ huni mmenia ɛyaa nza wɔ koɛ komapɛ anu.

¹²Sɔ koɛhonɛfoɛ nza ne, Dodo awa Eleasa bɔ ɔte Ahohiniɛ ne, sɛ Yasobeam nne berɛ a, ye yeɛ ɔwɔ berɛ ɔ.

¹³Mmerɛ bɔ Filistifoɛ bɛkyekyele asikyeleɛ wɔ Pase Damim kyɛ bɛ ne Yisraelfoɛ bɛbaaho ne, né ɔboka Dawide so. Né ayuo boo bie wɔ berɛ, na Yisraelfoɛ nwati befili Filistifoɛ nemɔ nyunu.

¹⁴Nakoso Eleasa ne Dawide begyinane pindinn wɔ ayuo boo ne afia bɛho belele aseɛ ne, na behuhuni Filistifoɛ nemɔ. AWURADE pepɛ lele bɛ, na ɔmaa belili ngonim piri paa.

¹⁵Mmerɛ bie, né Dawide wɔ Adulam nyɔboɛ bɔ wasi sua ne anu. Né Filistifoɛ koɛhonɛfoɛ nemɔ koso bakyekye asikyeleɛ wɔ Refaim bɔnza ne anu. Na koɛhonɛfoɛ atitire aburasa nemɔ, bɛ nu nza hɔle Dawide berɛ.

¹⁶Sɔ mmerɛ ne, né Dawide wɔ anwoserɛ afealeɛ ne anu, na né Filistifoɛ koɛhonɛfoɛ atenaleɛ ne wɔ Betlehem.

¹⁷Na Dawide le aworadɔlɛ hane kyɛ, “Abura bɔ ɔwɔ Betlehem kuro berɛ pambim ne anwo ne, sɛ ebie sa nu nzue brɛ me maa meno a, ahaa mekuro.”

¹⁸Yiti koɛhonɛfoɛ ahoneserɛfoɛ nza nemɔ sili bɛ hue bɛhɔle Filistifoɛ asikyeleɛ ne anu. Na abura bɔ ɔwɔ Betlehem kuro berɛ pambim ne anwo ne, bɛsale nu nzue ne bie bɛbrɛle Dawide. Nakoso wanno, na mmom ohwie guale mane AWURADE.

¹⁹Na Dawide hane kyɛ, “Me Nyameɛ pa gua kyɛ ngɔno nzue ye ɔ. Sɛ meno a, mmenia bɔ bɛfale bɛ ngoa bɛtole serewa bɛɛsale nzue ne bɛwale ne, né mano bɛ mogya!” Yiti wanno. Sɔ koɛhonɛfoɛ ahoneserɛfoɛ nza ne yeɛ bɛyɔle sɔ nikyee ne ɔ.

²⁰Yoabo aliɛma Abisae, né ɔla koɛhonɛfoɛ ahoneserɛfoɛ aburasa[6] nemɔ noa. Ɔhwene ye pealɛɛ ɔne mmenia ɛyaa nza bɛhone. Ohuhuni bɛ, na olele dumaa kyɛ koɛhonɛfoɛ ahoneserɛfoɛ nza nemɔ ala.

²¹Koɛhonɛfoɛ ahoneserɛfoɛ nza ne, ye yeɛ olele dumaa piri paa trale nyɔ ne ɔ, ofikyɛ ɔyɛle bɛ so safohene. Nakoso wando koɛhonɛfoɛ ahoneserɛfoɛ nza bɔ beli moa ne.

²²Yehoada awa Benaya bɔ ofi Kabeseel ne, né ɔte koɛhonɛniɛ ahoneserɛniɛ bɔ ye hue yɛ se paa wɔ nningyein pee anu ɔ. Ohuni Moabofoɛ nyɔ bɔ bɛ hue yɛ se ɔ. Asa koso, oohuni gyata wɔ kumaa bie anu ɛlɛho bie bɔ né asukɔtwea tɔ gua ɔ.

²³Osa huni Misraimniɛ biaa branoa bie bɔ ye tendenn te agyirɛ nnu ɔ. Né Misraimniɛ ne tira pealɛɛ bɔ ɔte kyɛ mbuna bɔ bɛfa nyamaa bɛsosɔ nu bɛnwo ɛtena ɔ. Nakoso Benaya fale abopura hɔle ye so. Ofotili pealɛɛ ne fili Misraimniɛ ne sa nu, na ɔfale Misraimniɛ ne bɔbɔ ye pealɛɛ ne huni ye.

²⁴Ahoneserɛ nningyein bɔ Yehoada awa Benaya yɔle ɛne. Na olele dumaa kyɛ koɛhonɛfoɛ ahoneserɛfoɛ nza nemɔ ala.

²⁵Olele dumaa paa wɔ koɛhonɛfoɛ ahoneserɛfoɛ aburasa nemɔ anu, nakoso wando koɛhonɛfoɛ ahoneserɛfoɛ nza nemɔ. Na Dawide nwo ɛwaenbɔlɛfoɛ nemɔ, ɔbɔle ye bɛ so panyi.

²⁶Koɛhonɛfoɛ nemɔ, bɛ nu ahoneserɛfoɛ paa ole Yoabo aliɛma Asahel, Betlehemniɛ Dodo ɔwa Ɛlhanan,

²⁷Samote bɔ ofi Harode, Helese bɔ ofi Pelon,

²⁸Yira bɔ ye baba Yikese fi Tekoa, Abiesa bɔ ofi Anatote,

²⁹Sibekae bɔ ofi Husa, Yilae bɔ ofi Ahohi,

³⁰Maharae bɔ ofi Netofa, Helede bɔ ye baba Baana fi Netofa,

³¹Yitae bɔ ye baba Ribae fi Gibea bɔ ɔwɔ Benyamin aseɛ so, Benaya bɔ ofi Piraton,

³²Hurae bɔ ofi Gaase bɔnza ne anu ne, Abiɛl bɔ ofi Abati,

³³Asimawete bɔ ofi Baharum, Eliaba bɔ ofi Saabon,

³⁴Gisonniɛ Hasem ye mma mɔ, Sagyee bɔ ofi Harari ɔwa Yonatan,

³⁵Saka bɔ ofi Harari ɔwa Ahiam, Yure awa Elifal,

³⁶Hefa bɔ ofi Mekera, Ahiya bɔ ofi Pelon,

³⁷Hesro bɔ ofi Kamɛl, Esebae awa Naarae,

³⁸Natan aliɛma Yowel, Hagri awa Mibare,

³⁹Seleke bɔ ofi Amon, Naharae bɔ ofi Beerote bɔ né otira Seruya awa Yoabo ye akodeɛ ne,

⁴⁰Yira bɔ ofi Yitri, Garebo bɔ ofi Yitri,

⁴¹Hitiniɛ Yuria, Ahelae awa Sabade,

⁴²Rubenniɛ Sisa ɔwa Adina bɔ ɔte Rubenfoɛ mbanyi nemɔ anu ko, bɔ koɛhonɛfoɛ aburasa boka ye so ne,

⁴³Maaka awa Hanan, Yosafate bɔ ofi Miti,

⁴⁴Yusia bɔ ofi Aseterate, Hotam bɔ ofi Aroye ye mma mmienzua Sama ne Yeyil,

⁴⁵Simri awa Yediayɛl ne oliɛma bienzua Yoha bɔ ofi Tisi,

⁴⁶Eliɛl bɔ ofi Mahawi, Elnaam mma mmienzua Yeribae ne Yosawia, Yitima bɔ ofi Moabo,

⁴⁷Eliɛl ne Obɛde, yeɛ Yaasiɛl bɔ ofi Mesoba.