Read Sehwi 1 Aberɛso Dwirɛ 12 Bible Online

1 Aberɛso Dwirɛ 12 - Sehwi bible

1 Aberɛso Dwirɛ 12

¹Mmerɛ bɔ né Dawide ɔnwati ɔfa ye nwo fea Kise awa Sɔɔlo ne, koɛhonɛfoɛ bɔ bɛɛbokale Dawide so wɔ Siklage ne, bɛ ɛhe. Koɛhonɛfoɛ ahoneserɛfoɛ bɔ bɛ ne Dawide hɔle koɛ ne, bɛboka so.

²Bɛte agyaentolɛfoɛ, na né bɛkora bɛfa bɛ sa bɛen anaa famaa bɛto agyaen anaa taya. Sɔɔlo abusuafoɛ Benyaminfoɛ koso bɛboka so.

³Ahiesa yeɛ né ɔla bɛ noa ɔ. Sɛ ɔnne berɛ a, Yoase yeɛ né ɔwɔ berɛ ɔ. Bɛ munyɔ bɛte Semaa bɔ ofi Gibea ne, ye mma mmienzua. Afei ɛhemɔ koso bɛboka so: Asimawete mma mmienzua Yesiɛl ne Pelete; Beraka ne Yehu bɔ ofi Anatote ne,

⁴Yismaya bɔ ofi Gibeon, bɔ ɔboka koɛhonɛfoɛ ahoneserɛfoɛ aburasa nemɔ aso, ná osa la bɛ noa ne; Yeremia, Yahasiɛl, Yohanan, Yosabade bɔ ofi Gedera ne,

⁵Elusae, Yerimote, Bealia, Semaria, Sefatia bɔ ofi Harufi ne,

⁶Ɛlkana, Yisia, Asarel, Yowesa ne Yasobeam bɔ bɛte Kora boso ama ne,

⁷yeɛ Yeroham bɔ ofi Gedɔ ne, ye mma mmienzua Yowela ne Sebadia.

⁸Gade abusua kure nu, koɛhonɛfoɛ ahoneserɛfoɛ bɔ babe wɔ koɛhonɛ nu ne, bɛɛbokale Dawide so wɔ anwoserɛ afealeɛ bɔ ɔwɔ ɛserɛ so ne anu. Né bɛkora bɛfa akokyɛm ne pealɛɛ bɛko paa. Bɛ nye yɛ se kyɛ gyata, yeɛ bɛ nwo koso yɛ nyera kyɛ bokaa so ɛwanzane.

⁹Esere yeɛ ɔla bɛ noa ɔ, Obadia tɔ so nyɔ, Eliabo tɔ so nza,

¹⁰Misimana tɔ so nna, Yeremia tɔ so nnu,

¹¹Ataye tɔ so nzia, Eliɛl tɔ so nzoo,

¹²Yohanan tɔ so mmɔtwɛ, Elsabade tɔ so ngona,

¹³Yeremia tɔ so buru, yeɛ Makebanae tɔ so buru ne ko.

¹⁴Sɔ Gadefoɛ nemɔ, né bɛte koɛhonɛfoɛ nemɔ anu mbanyi. Bɔ ye dibea te kãa ne po, né ɔnea koɛhonɛfoɛ ɛyaa ko so, yeɛ bɔ ye dibea te piri ne koso, ɔnea koɛhonɛfoɛ apee ko bɛ so.

¹⁵Bosome bɔ oli moa ne anu, mmerɛ bɔ né asue Yɔɔdan wayi wabu wafa ye boo ne anu ne, sɔ mmenia hemɔ pɛle asue ne, na bɛfoane bɛ bɔ bɛte bɔnza ne anu amukoraa, wɔ eyia afiteleɛ so ne eyia atɔleɛ so.

¹⁶Benyaminfoɛ ne Yudafoɛ biemɔ bɛhɔle Dawide berɛ wɔ anwoserɛ afealeɛ ne anu.

¹⁷Dawide fitele ooyiale bɛ, na osele bɛ kyɛ, “Sɛ ɛmɔawa me berɛ abiɛngoɛ so, kyɛ ɛmɔbaaboka me de a, ye de mene ɛmɔ kɔyɛ ko. Nakoso sɛ ɛmɔawa kyɛ ɛmɔbaaye me bɛma me pɔfoɛ mɔ, wɔ aberɛ bɔ nnyɔle bɔne biala a, ye de yɛ nana mɔ Nyameɛ ne, wanwu ye, na okotua ɛmɔ kerɛ.”

¹⁸Yeɛ Amasae bɔ ɔla koɛhonɛfoɛ aburasa nemɔ noa ne, Sunzum ne wale ye so ɔ, na ɔhane kyɛ, “O Dawide, yɛte wɔ deɛ; O Yese awa, yɛne wɔ ala! Asomdwee, asomdwee ɔ́yɛ wɔ deɛ, ná ebiala bɔ ɔkɔboka wɔ ne koso, ónya asomdwee! Ofikyɛ wɔ Nyameɛ yeɛ ogyi wɔ si ɔ.” Yiti Dawide maa bɛɛbokale ye so, na ɔmaa bɛlelale ye koɛhonɛfoɛ nemɔ noa.

¹⁹Mmerɛ bɔ Dawide ne Filistifoɛ bɛfale koɛ bɛɛtoale Sɔɔlo ne, Manase koɛhonɛfoɛ nemɔ bie nwati fili Yisrael koɛhonɛ kure ne anu bɛɛbokale Dawide so. (Nakoso Dawide wammoka Filistifoɛ nemɔ, ofikyɛ Filisti mbanyi dwenene ye nwo bɛfoane Dawide. Bɛnwa, “Sɛ Dawide yakyi yɛ nu kodi ye mene Sɔɔlo si a, ɔkɔmaa yɛkɔfa yɛ ngoa yɛkɔpɛ so.”)

²⁰Na osili nu kyɛ ɔkɔ Siklage ne, Manasefoɛ hemɔ nwatili bɛɛbokale ye so: Adena, Yosabade, Yediayɛl, Mikayɛl, Yosabade, Elihu ne Siletae, na bɛ yeɛ né bɛlela koɛhonɛfoɛ apee nemɔ anoa ɔ.

²¹Bɛbokale Dawide maa ɔho tiale apaabɔlɛfoɛ ne, ofikyɛ né bɛ mukoraa bɛte koɛhonɛfoɛ ahoneserɛfoɛ, na bɛɛyɛle ye koɛhonɛfoɛ nu safohene.

²²Alehyeleɛ biala, né mmenia baboka Dawide lɔen ne aso kɔpem kyɛ ye lɔen ne yɛle piri te kyɛ Nyameɛ lɔen ɔ.

²³Koɛhonɛ bɔ baboa bɛ nwo kyɛ bɛkɔ koɛ bɔ bɛɛbokale Dawide lɔen so wɔ Hebron ne, bɛ ɛhe. Bɛyɛle adwene kyɛ bɛkakyi Sɔɔlo ahennie ne bewura Dawide sa, kyɛbɔ AWURADE hane ne ala.

²⁴Yuda koɛhonɛfoɛ bɔ betira akokyɛm ne pealɛɛ ne, bɛ somaa te apee nzia ɛyaa mmɔtwɛ.

²⁵Simeon koɛhonɛfoɛ ahoneserɛfoɛ ne, bɛ somaa te apee nzoo ɛyaa ko.

²⁶Lewi koɛhonɛfoɛ ne, bɛ somaa te apee nna ɛyaa nzia.

²⁷Né Yehoada bɔ ɔla Aarɔn awuro ama noa ne ɔboka so, na né ɔnea koɛhonɛfoɛ apee nza ɛyaa nzoo so.

²⁸Sadoke bɔ ɔte koɛhonɛniɛ aberandeɛ ne, ɔne safohene aburanyɔ ne nyɔ bɔ befi ye bɔbɔ ye abusua nu ɔ, bɛboka so.

²⁹Benyaminfoɛ mɔ bɔ bɛte Sɔɔlo bɔbɔ ye abusuafoɛ ne, né bɛte koɛhonɛfoɛ apee nza. Ɔbaadwu ɛnɛ ye, bɛ nu pee b’ahone tɛ la Sɔɔlo nwo.

³⁰Efraimfoɛ nemɔ, bɛ nana mɔ sasofoɛ nu, né bele koɛhonɛfoɛ apee aburanyɔ ne ɛyaa mmɔtwɛ.

³¹Manase abusua kure ne bue, bɛyele koɛhonɛfoɛ apee buru ne mmɔtwɛ kyɛ bɛɛboka maa bɛfa Dawide besie bia so.

³²Yisakafoɛ ne, bele mbanyi ɛyaa nyɔ bɔ bɛnea bɛ mmusuafoɛ so ɔ. Sɔ mbanyi nemɔ, bɛ yeɛ bɛte nningyein bɔ ɔkɔ so ne abo, na afei bɛse bɔ ɔsɛ kyɛ Yisrael bɛyɔ ɔ.

³³Sebulɔnfoɛ ne, bele koɛhonɛfoɛ nimdeɛfoɛ apee aburannu bɔ bafa akodeɛ ahoroɔ amukoraa baboaboa bɛ nwo kyɛ bɛkɔ koɛ ɔ. Bɛ mu bɛyɛle b’adwene ko kyɛ bɛboka Dawide.

³⁴Nafetali le safohene mɔ apee ko. Bɛnea koɛhonɛfoɛ apee aburasa ne nzoo bɔ betira akokyɛm ne pealɛɛ so.

³⁵Danfoɛ koɛhonɛfoɛ mɔ te apee aburanyɔ ne mmɔtwɛ, ɛyaa nzia bɔ baboaboa bɛ nwo kyɛ bɛkɔ koɛ ɔ.

³⁶Asɛfoɛ le koɛhonɛfoɛ nimdeɛfoɛ apee aburanna bɔ baboaboa bɛ nwo kyɛ bɛkɔ koɛ ɔ.

³⁷Rubenfoɛ, Gadefoɛ ne Manase abusua kure ne bue bɔ bɛwɔ asue Yɔɔdan si ne, bele koɛhonɛfoɛ apee ɛyaa ko ne aburanyɔ bɔ betiratira akodeɛ amukoraati bie ɔ.

³⁸Sɔ koɛhonɛfoɛ nemɔ, bɔ basiesie bɛ nwo bama koɛ ne, bɛ mukoraa bɛwale Hebron kyɛ bɛbaafa Dawide besie Yisrael amukoraa so hene. Sɔ ala yeɛ né Yisrael ngaa ne amukoraa bayɛ adwene ko kyɛ bɛfa Dawide besi hene ɔ.

³⁹Bɛ ne Dawide tenane berɛ ɛlɛsa, bɔ bedidili bɛnone, ofikyɛ né b’eliɛma mɔ basiesie bɛ si.

⁴⁰Afei koso, b’eliɛma mɔ bɔ befi dede te kyɛ Yisaka, Sebulɔn ne Nafetali ne, bɛ koso bɛfale aleɛ pee beguale afunum, afupɔngɔ ne nandwie mɔ so bɛwale, ofikyɛ né anigye awa Yisrael. Aleɛ nemɔ ole esam, borɔdoma bɔ babobɔ ye kunguma, bobe bɔ babobɔ ye kunguma, nzaa, ngoo, nandwie yeɛ mmoaen.