Read Sehwi 1 Aberɛso Dwirɛ 14 Bible Online

1 Aberɛso Dwirɛ 14 - Sehwi bible

1 Aberɛso Dwirɛ 14

¹Tiro hene Hiram tuli mmenia maa bɛhɔle Dawide berɛ. Bɛfale sida mmakaa, suasilɛfoɛ ne bakaa dwumvoɛ mɔ bɛbokale so yeɛ bɛhɔle ɔ, kyɛ beesi awuro bɛma Dawide.

²Afei Dawide nwuni ye kyɛ AWURADE afa ye asi Yisrael so hene, na ɔnate AWURADE maen Yisrael ti, AWURADE ama ye, Dawide ahennie atindim.

³Dawide sa gyigyale mmraa pee wɔ Yerusalem, na Dawide wole mmaa mmienzua ne mmaa mmrasua pee.

⁴Ye mma mɔ bɔ ɔwole bɛ wɔ Yerusalem ne, bɛ ɛhe: Samua, Sobabo, Natan, Solomon,

⁵Yibare, Elisua, Elpelete,

⁶Noga, Nefege, Yafia,

⁷Elisama, Beeliada, yeɛ Elifalɛte.

⁸Filistifoɛ tele kyɛ bapopa Dawide ngoo bafa ye basi Yisrael so hene ne, bɛboale bɛ koɛhonɛfoɛ amukoraa noa kyɛ bɛkwaapena Dawide (bedi ye so ngonim). Dawide tele sɔ dwirɛ ne, yiti ɔfale koɛ ɔɔtetale bɛ.

⁹Ne Filistifoɛ baatetɛ wɔ Refaim bɔnza ne anu.

¹⁰Na Dawide bisale Nyameɛ kyɛ, “Mva koɛ ngɔndoa Filistifoɛ anaa? Aso ɛkɔfa bɛ kowura me sa?” Na AWURADE buale ye kyɛ, “Kɔ na ngɔfa bɛ ngowura wɔ sa.”

¹¹Yiti Dawide hɔle Baal Perasim, na olili bɛ so ngonim wɔ berɛ. Na ɔhane kyɛ, “Nyameɛ nate me so wahwi wafa me pɔfoɛ mɔ so kyɛbɔ asue yi twi fa nningyein so ɔ.” Yiti bɛfrɛle berɛ Baal Perasim.[8]

¹²Filistifoɛ nwatili bɛyakyili bɛ nyameɛ mɔ berɛ, na Dawide maa bɛyerale bɛ nyameɛ nemɔ.

¹³Filistifoɛ nemɔ sa wale bieku bɛɛtetɛle wɔ bɔnza ne anu.

¹⁴Na Dawide sa bisale Nyameɛ nen, Nyameɛ buale ye kyɛ, “Nnɛkɔ wɔ nyunu tee, na mmom kakyi wɔ nwo kɔfa bɛ si, ná kɔ bɛ so wɔ mmakaa bɔ bɛfrɛ ye basam ne ndendeneɛ so.

¹⁵Sɛ ɛte ebie gya boso nga wɔ basam mmakaa nemɔ aso a, ye de kɔ bɛ so. Na ɛhe kyire kyɛ Nyameɛ ali wɔ nyunu moa okũkũ Filistifoɛ koɛhonɛfoɛ nemɔ.”

¹⁶Dawide yɔle kyɛbɔ Nyameɛ hyɛle ye ne ala, na ohuhuni Filistifoɛ nemɔ toonn ofi Gibeon oodwuli Gɛsɛre.

¹⁷Dawide lele dumaa wɔ maen nemɔ amukoraa so, na AWURADE mane ye nwo suronyi tɔle maen maen ne amukoraa so.