Read Sehwi 1 Aberɛso Dwirɛ 15 Bible Online

1 Aberɛso Dwirɛ 15 - Sehwi bible

1 Aberɛso Dwirɛ 15

¹Dawide sisili ye bɔbɔ ye sua wɔ Dawide kuro. Na osiesiele nekaa bie sili ɛtena sua bɔ ɔkɔfa Nyameɛ alaka ne kosie nu ɔ.

²Na Dawide fale ahyɛdeɛ mane bɛ kyɛ nnɛma ebiala soa Nyameɛ apam alaka ne, sana Lewifoɛ angome, ofikyɛ AWURADE atu bɛ asie berɛ kyɛ bɛsoa AWURADE alaka ne, na bɛsɔne wɔ ye nyunu afebɔɔ.

³Dawide mane Yisrael maen ne amukoraa bɛbɔle dwaa wɔ Yerusalem kyɛ bɛɛfa AWURADE alaka ne bɛbra nekaa bɔ basiesie bama ye ne.

⁴Yeɛ Dawide boaboale Aarɔn boso ama ne amukoraa, ɔne Lewifoɛ nemɔ bɛ noa.

⁵Kohate boso ama mɔ: Yuriɛl bɔ ɔla bɛ noa, yeɛ ye nwo ama ɛyaa ko aburanyɔ;

⁶Merari boso ama mɔ: Asaya bɔ ɔla bɛ noa, yeɛ ye nwo ama ɛyaa nyɔ aburanyɔ;

⁷Gɛsɔm boso ama mɔ: Yowel bɔ ɔla bɛ noa, yeɛ ye nwo ama ɛyaa ko aburasa;

⁸Elisafan boso ama mɔ: Semaya bɔ ɔla bɛ noa, yeɛ ye nwo ama ɛyaa nyɔ;

⁹Hebron boso ama mɔ: Eliɛl bɔ ɔla bɛ noa, yeɛ ye nwo ama aburawɔtwɛ;

¹⁰Yusiɛl boso ama mɔ: Aminadabo bɔ ɔla bɛ noa, yeɛ ye nwo ama ɛyaa ko buru ne nyɔ.

¹¹Dawide tole ye sa frɛle asɔfo Sadoke ne Abiata, yeɛ Lewifoɛ Yuriɛl, Asaya, Yowel, Semaya, Eliɛl ne Aminadabo.

¹²Osele bɛ kyɛ, “Lewifoɛ mmusua mmusua ne, ɛmɔ yeɛ ɛmɔlela bɛ noa ɔ. Ɛ́mɔte ɛmɔ nwo, ɛmɔ ne ɛmɔ abusuafoɛ, ná ɛmɔɔfa AWURADE Yisrael Nyameɛ ye alaka ne bɛbra nekaa bɔ masiesie mama ye ne.

¹³Ɔnate kyɛ nna ɛmɔ yeɛ ɛmɔsoale ye mmerɛ bɔ oli moa ne ati, AWURADE yɛ Nyameɛ fɛle yɛ so yaa paa, ofikyɛ yannea alaka ne aso yé.”

¹⁴Yiti asɔfo nemɔ ne Lewifoɛ ne, bɛpetene bɛ nwo kyɛ bɛkwaafa AWURADE Yisrael Nyameɛ alaka ne bɛba.

¹⁵Na Nyameɛ alaka ne, Lewifoɛ bɛfale ye mbuna bɔ owurawura nu ne bɛtole bɛ kɔme anwo bɛsoale alaka ne, kyɛbɔ Mose gyinane AWURADE dwirɛ so fale ahyɛdeɛ mane bɛ ne ala.

¹⁶Dawide sa fale ahyɛdeɛ mane Lewi abusua kure mbanyi ne, kyɛ bɛye edweintolɛfoɛ maa bɛbɔ sangoo, adengum ne firikyiwa bɛto anigye dwein.

¹⁷Yiti Lewifoɛ tuli Yowel awa Heman ne ye nwoniɛ Asafe bɔ ye baba ole Berekia ne, Merari boso ama nemɔ ne bɛ nwofoɛ, yeɛ Kusaya awa Etan.

¹⁸Bɛ nwo ama hemɔ bɔ bɛtɔ so nyɔ wɔ dibea nu ne, né bɛboka bɛ so: Sakaria, Yaasiɛl, Semiramote, Yehiel, Yuni, Eliabo, Benaya, Maaseya, Matitia, Elifelehu, Mikenia, yeɛ Obɛde Edom ne Yeyiɛl bɔ bɛte pambim wɛmvoɛ nemɔ.

¹⁹Bɛyele edweintolɛfoɛ Heman, Asafe ne Etan kyɛ bɛbɔ kɔɔbere firikyiwa ne.

²⁰Afei bɛyele Sakaria, Asiɛl, Semeramote, Yehiel, Yuni, Eliabo, Maaseya ne Benaya kyɛ bɛbɔ adengum, kyɛbɔ edweintolɛ bɔ bɛfrɛ ye Alamote ne, ɔte ne ala.

²¹Na bɛyele Matitia, Elifelehu, Mikenia, Obɛde Edom, Yeyiɛl ne Asasia kyɛ bɛbɔ sangoo bɛto dwein, kyɛbɔ bɛto Seminite dwein ɔ.

²²Kenania bɔ odi Lewifoɛ nemɔ nyunu wɔ edweintolɛ nu ne, ye yeɛ odi kyɛ odi maen ne anyunu maa bɛto edwein ne ɔ, ofikyɛ ye yeɛ né ole ye nwo nimdeɛ ɔ.

²³Nekaa bɔ alaka ne gyi ne, Berekia ne Ɛlkana yeɛ odi kyɛ bɛwɛne pambim ne ɔ.

²⁴Sebania, Yosafate, Netanɛl, Amasae, Sakaria, Benaya ne Eliesa bɔ bɛte asɔfo ne, odi kyɛ behu totorobɛndo nemɔ wɔ Nyameɛ alaka ne nyunu. Na nekaa bɔ alaka ne gyi ne, né Obɛde Edom ne Yehia bɛboka bɛ bɔ bɛwɛne pambim nemɔ aso.

²⁵Yiti Dawide ne Yisrael mbanyi ne koɛhonɛfoɛ apee so safohene nemɔ, bele ahurusi bɛhɔ bɛɛfale AWURADE apam alaka ne befili Obɛde Edom awuro bɛwale.

²⁶Na ɔnate kyɛ Nyameɛ bokale Lewifoɛ bɔ né bɛso AWURADE apam alaka ne ati, bɛfale nandwie nyii nzoo ne mmoaen nyii nzoo bɛbɔle afɔleɛ.

²⁷Né Dawide hera nwera tena nyemene. Lewifoɛ amukoraa bɔ bɛso alaka ne, edweintolɛfoɛ nemɔ, ɔne Kenania bɔ ɔkenga edwein ma edweintolɛfoɛ ne, sɔ tena ne ala bie yeɛ né ɔhera bɛ ɔ. Na Dawide wurale asɔfo ataadeɛ bɔ ɔte nwera ɔ.

²⁸Yiti Yisrael mukoraa bele esebɔlɛ, awɛenhulɛ, totorobɛndohulɛ ne firikyiwabɔlɛ bɛɛfale AWURADE apam alaka ne bɛwale, na né bɛbɔ adengum ne sangoo bɛto dwein serɛserɛ paa.

²⁹Mmerɛ bɔ AWURADE alaka ne oodwuli Dawide kuro berɛ nen, Sɔɔlo awa Mikal tole ye nye neane mboma nu. Onwuni kyɛ Nana Dawide ohuru pepe go abilie, na obuli Dawide animtia wɔ ye ti anu.