Read Sehwi 1 Aberɛso Dwirɛ 17 Bible Online

1 Aberɛso Dwirɛ 17 - Sehwi bible

1 Aberɛso Dwirɛ 17

¹Afei Nana Dawide tenane ye awuro asomdwee nu ne, osele ngɔmhyɛlɛniɛ Natan kyɛ, “Nde awuro bɔ bafa sida basi ɔ nu, nakoso AWURADE apam alaka ne de, ogyi ɛtena sua nu.”

²Na Natan buale Dawide kyɛ, “Bɔ adwene ye nwo kyɛ ɛkɔyɔ biala ne, yɔ, ofikyɛ Nyameɛ gyi wɔ si.”

³Nakoso sɔ kyẽa ne kɔngɔen, AWURADE lale ye dwirɛ ali hyirele Natan kyɛ,

⁴“Kɔhã kyire me somvoɛ Dawide kyɛ, AWURADE nwa nyoo: Nna wɔ yeɛ ɛbaasi sua maa metena nu ɔ.

⁵Ofikyɛ ofi kyẽa bɔ nyele Yisrael mvili Misraim mmale bɔ ɔbaadwu ɛnɛ ɔ, nndenane awuro nu le, na mmom ɛtena sua ne nyianu sua yeɛ medi nu tutena ɔ.

⁶Nekaa biala bɔ mali tutena mene Yisraelfoɛ amukoraa yahɔ ne, Yisrael mbanyi bɔ maye bɛ kyɛ bɛnea me maen so ne, aso mabɔ bɛ nu bie somoɛ kyɛ, ‘Nzu ati yeɛ ɛmɔamva sida banzi awuro bamma me ɔ?’

⁷Yiti kã kyire me somvoɛ Dawide kyɛ, Asafo AWURADE nwa nyoo: Me yeɛ nyele wɔ mvili mmoaen nealɛ nu, ɔne mmoaen si lilɛ nu, ná mvale wɔ nzili hene wɔ me maen Yisrael so ɔ.

⁸Magyina wɔ si wɔ nekaa biala bɔ ahɔ ɔ, mali wɔ pɔfoɛ amukoraa so ngonim mama wɔ, na ngɔpagya wɔ dumaa maa ɔkɔyɛ kyɛ aseɛ ye aso atitirefoɛ bɛ dumaa.

⁹Ngɔma me maen Yisrael nekaa maa ɔkɔtena. Ngɔbɔ bɛ atenaseɛ wɔ bɛ bɔbɔ b’aseɛ so, bɔ ebiala ngɔha bɛ ko, bɔ amumuyɛɛfoɛ ngɔhyɛ bɛ so ko ɔ, kyɛbɔ bɛyɔle ye daa,

¹⁰ofi mmerɛ bɔ nyele maenbulɛfoɛ maa beelili me maen Yisrael so ne ala. Ngoli wɔ pɔfoɛ amukoraa bɛ so ngonim. Asa koso, me AWURADE, mekã mekyire wɔ kyɛ, ngɔma wɔ boso ama bɛkɔhɔ so bekoli hene.

¹¹Sɛ wɔ mmerɛ so kyɛ ɛkɔtoa wɔ mbanyi mɔ a, ngɔpagya wɔ bosofoɛ nemɔ ko, bɔ ɔte wɔ kunu ba, na ngɔma ye ahennie kotindim.

¹² Ye yeɛ okosi sua kɔma me ɔ, na ngɔma ye ahennie kotindim afebɔɔ.

¹³ Ngɔyɛ ye baba, ná ye wora wayɛ mma. Na me ɔdɔ bɔ onni ngasi ne de, mengɔmaa ɔngɔbɔ ye, kyɛbɔ mmaa ɔbɔle sona bɔ olili bia koraka yeɛ ɛbaali bia nen.

¹⁴ Na mmom, ngɔma ye bo kotindim afebɔɔ wɔ m’awuro ne m’ahennie nu, na ye ahennie bia bo kotindim afebɔɔ.”

¹⁵Na Natan hane edwirɛ ne amukoraa ne nyekyire ne amukoraa pɛpɛɛpɛ hyirele Dawide.

¹⁶Afei Nana Dawide ɔɔtenane AWURADE nyunu, na ɔhane kyɛ, “Ao, AWURADE Nyameɛ, me ole nwa, yeɛ m’abusua gyi ye sɛ, bɔ apagya me amaa manya dibea sɔa ye?

¹⁷Nakoso, ao Nyameɛ, bɔ ayɔ ne po, ɔte wɔ nye so nikyee kaaba bie, ofikyɛ asa ahã kyɛ ɛkɔma wɔ somvoɛ ne ye boso ama yɛkoli hene yɛkɔhyɛ. Ao, AWURADE Nyameɛ, wɔ yeɛ ɛma sona so ɔ!

¹⁸Animnyam bɔ ahyɛ me, wɔ somvoɛ Dawide ye, nzikyɛ dwirɛ bieku koraa yeɛ nga ngyire wɔ ɔ? Wɔ yeɛ ɛse wɔ somvoɛ ɔ.

¹⁹Ao AWURADE, ɔnate wɔ somvoɛ ti, ɔne wɔ ti anu dwirɛ ti, yeɛ ayɔ anwanwadeɛ hemɔ amukoraa, ná ala nningyein mbiri hemɔ amukoraa ali ɔ.

²⁰O AWURADE, edwirɛ amukoraa bɔ yate ye wɔ yɛ so anu ne, okyire kyɛ ebiala nne berɛ bɔ ɔte kyɛ wɔ ɔ, yeɛ nyameɛ biala nne berɛ kyɛ wɔ.

²¹ Nyameɛ, aseɛ ye aso maen beni yeɛ ɔte kyɛ wɔ maen Yisrael ɔ? Yisrael bɔ ɛɛpɔle ye fa yɛle wɔ maen, bɔ ɔnate so ɛyɛle anwanwadeɛ ne nningyein mbiri mbiri mane wɔ dumaa trɛle ne. Ɛfoane maen maen mɔ fili wɔ mmenia nyunu, na ɛpepɛ lele wɔ maen fili Misraim sa nu.

²²Afa wɔ maen Yisrael ayɛ wɔ bɔbɔ deinn wɔ maen afebɔɔ, na wɔ, AWURADE, ayɛ bɛ Nyameɛ.

²³“Afei, ao AWURADE, kyɛbɔ ahã afa wɔ somvoɛ ne ye boso ama nwo ne, maa ɔbra nu afebɔɔ. Kyɛbɔ ahyɛ bɔ ne, yɔ sɔ ala.

²⁴Na bɛkɔbɔ wɔ dumaa bɛkɔkamvo wɔ daa kyɛ, ‘Asafo AWURADE, Yisrael Nyameɛ ne, ɔte Nyameɛ bɔ odi Yisrael so ɔ.’ Na wɔ somvoɛ Dawide awuro ama kotindim wɔ wɔ nyunu.

²⁵Ofikyɛ wɔ, me Nyameɛ, aye ahyire wɔ somvoɛ kyɛ ɛkɔma ye boso ama bɛkɔhɔ so bekoli hene. Na ɛhe yeɛ wahyɛ wɔ somvoɛ nguraen bɔ ɔmaa ɔbɔ sɔ mbaeɛ he kyire wɔ ye.

²⁶O, AWURADE, wɔ yeɛ ɛte Nyameɛ ɔ, na afa sɔ ndɛenvɛen he ahyɛ wɔ somvoɛ bɔ.

²⁷Yiti mesrɛ wɔ ala, yira wɔ somvoɛ boso ama, ná maa b’ahennie ɔhɔ so otindim wɔ wɔ nyunu afebɔɔ. Ofikyɛ, AWURADE, bɔ ayira ye ne, né ayira ye afebɔɔ.”