Read Sehwi 1 Aberɛso Dwirɛ 19 Bible Online

1 Aberɛso Dwirɛ 19 - Sehwi bible

1 Aberɛso Dwirɛ 19

¹Ye si ye, Amonfoɛ hene Nahase wuli, na ɔwa bienzua lili ye bia.

²Na Dawide sele kyɛ, “Hanun baba Nahase wayɔ me paa, yiti me koso ngɔyɔ Hanun paa ne bie.” Yeɛ Dawide tuli ɛbɔfoɛ kyɛ bɛɛyɛ ye yaakɔ, ɔnate ɔse wue ne ati. Na Dawide bɔfoɛ nemɔ beedwuli Amonfoɛ aseɛ so kyɛ bɛkwaayɛ Hanun yaakɔ nen,

³Amon mbanyi sele Hanun kyɛ, “Dawide somanɛ bɔ wasoma mmenia kyɛ bɛɛyɛ wɔ yaakɔ ye, ɛnwa nzɛ anidie yeɛ ɔfa ma wɔ baba ɔ? Aso nna kuro ye anu neanealɛ, ye tetɛlɛ, ɔne so ngonimlilɛ ti yeɛ ye bɔfoɛ nemɔ bawa wɔ wa ye?”

⁴Yiti Hanun hyele Dawide ɛbɔfoɛ nemɔ, ɔpoane ebiala kanza, ɔpepɛle bɛ ndaadeɛ nemɔ nekaa bɔ ɔkata bɛ bo ne guale, na ɔfoane bɛ maa bɛhɔle.

⁵Ɛbɔfoɛ nemɔ fili berɛ bɛhɔle. Na Nana Dawide tele edwirɛ bɔ wasi nen, ɔsomane mmenia maa beeyiale bɛ, ofikyɛ né Hanun agua bɛ nyunu ase paa. Dawide hã hyirele bɛ kyɛ, “Ɛ́mɔtena Yeriko ma ɛmɔ kanza ne ofu koraka né ɛmɔasa bawa.”

⁶Amonfoɛ nwuni kyɛ Dawide ahone ahu bɛ so paa. Yiti Hanun ne Amonfoɛ bɛmaa bɛfale ɛdwetɛ talɛnde apee ko bɛɛfale teaseɛnam mɔ ne pɔngɔhanɛfoɛ befili Mesopotamia, Aram Maaka ne Soba bɛwale.

⁷Bɛfale teaseɛnam apee aburasa ne nyɔ yeɛ Maaka hene ne ye koɛhonɛfoɛ, na bɛɛkyekyele asikyeleɛ bepingyele Medeba. Na bɛboaboale Amonfoɛ noa befili bɛ nguro mɔ so maa bɛwale koɛ noa.

⁸Na Dawide tele porɛ bɔ babɔ nen, ɔmane Yoabo ne koɛhonɛfoɛ ne amukoraa bɛhɔle kyɛ bɛ ne bɛ bɛɛho.

⁹Amonfoɛ befili berɛ befitele begyinagyinane kuro berɛ pambim ne anyunu. Bɛmane bɛ lɔen ne te gyinane, yeɛ ahemvo ngaa bɔ bawa ne de, beegyinagyinane eburo.

¹⁰Yoabo nwuni kyɛ koɛ ne afite ye nyunu ne ye si, yiti ɔyele Yisrael koɛhonɛfoɛ paa paa nemɔ nu bie, kyɛ ɔkwaafa bɛ toa Siriafoɛ ɔne bɛ bɛko.

¹¹Ɔmane oliɛma Abisae lale ye koɛhonɛfoɛ ngaa nemɔ noa, kyɛ ɔɔfa bɛ ɔtoa Amonfoɛ ɔne bɛ bɛho.

¹²Na Yoabo sele kyɛ, “Sɛ Siriafoɛ b’anwoserɛ bo me so a, baaboka me; yeɛ sɛ Amonfoɛ koso b’anwoserɛ bo wɔ so a, ngɔɔboka wɔ.

¹³Gyina pindinn. Na ɔnate yɛ maen, ɔne yɛ Nyameɛ nguro nemɔ ati, ɛ́mɔma yɛhyire yɛ bienzua. Mesrɛ kyɛ AWURADE ɔyɔ bɔ okuro ɔ.”

¹⁴Yiti Yoabo ne ye koɛhonɛfoɛ bɛhɔle bɛ nyunu bɛ ne Siriafoɛ bɛɛfa bɛtetale so, na Siriafoɛ nwati fili ye nyunu.

¹⁵Na mmerɛ bɔ Amonfoɛ benwuni kyɛ Siriafoɛ banwati nen, bɛ koso bɛnwati befili Yoabo aliɛma Abisae nyunu, na beewurale kuro ne anu. Afei Yoabo sa wale Yerusalem.

¹⁶Mmerɛ bɔ Siriafoɛ nwuni kyɛ Yisrael ali bɛ so ngonim nen, betuli mmenia maa bɛɛfale Siriafoɛ bɔ bɛwɔ asue Yufreti si dɔ ne bɛwale. Né Hadadesa safohene Sopake yeɛ ɔla bɛ noa ɔ.

¹⁷Dawide tele sɔ dwirɛ nen, ɔboaboale Yisrael koɛhonɛfoɛ amukoraa noa, na ɔɔpɛle asue Yɔɔdan. Ɔɔtole Siriafoɛ, na ɔne ye koɛhonɛfoɛ ne, bɛ ne Siriafoɛ bɛhone. Dawide fale koɛ toale Siriafoɛ nemɔ, na bɛ koso bɛ ne ye hone.

¹⁸Siriafoɛ nwati fili Yisrael nyunu; na Dawide huhuni Siriafoɛ teaseɛnamhanɛfoɛ apee nzoo, ɔne koɛhonɛfoɛ bɔ bɛnate ase ɔ apee aburanna. Ohuni bɛ safohene Sopake.

¹⁹Na ahemvo amukoraa bɔ né bewura Hadadesa bo ne, benwuni kyɛ Yisrael ali bɛ so ngonim ne, bɛ ne Dawide yɛle asomdwee apam, na bɛɛyɛle Dawide ngoaa. Na Siriafoɛ banguro kyɛ bɛkɔɔboka Amonfoɛ bieku ɔ.