Read Sehwi 1 Aberɛso Dwirɛ 22 Bible Online

1 Aberɛso Dwirɛ 22 - Sehwi bible

1 Aberɛso Dwirɛ 22

¹Afei Dawide sele kyɛ, “AWURADE Nyameɛ sua ne, ɔne Yisrael naen yeralɛ afɔleɛ bokyea ne, ɛwa yeɛ odi kyɛ besi ye ɔ.”

²Ɛwɔfoɛ mɔ bɔ baatena Yisrael aseɛ so ne, Dawide hyɛle mmeraa maa bɛboaboale bɛ noa. Na nyɔboɛ bɔ bɛkɔfa bekosi Nyameɛ sua ne, ye dwalɛ ne, ɔmaa bɛfale ye nwo adwuma bewurale bɛ sa.

³Nnadowaa bɔ bɛkɔfa bɛkɔbobɔ pambim anoa nemɔ anu, ɔne bɔ bɛkɔfa bekomiamia anoa nemɔ anu ne, Dawide penane buralɛ pee ne kɔɔbere pee bɔ ɛkari a, ennwu ye noa ɔ siele berɛ, kyɛ bɛfa bɛyɔ.

⁴Afei koso, ɔpenane sida mmakaa bɔ ɛka a, ennwu ye noa ɔ guale berɛ, ofikyɛ Sidonfoɛ ne Tirofoɛ bɛbrɛle ye sida pee paa.

⁵Na Dawide hane kyɛ, “Mma Solomon te kãa, yeɛ afei onnya onnwuni nningyein nye so yé. Awuro bɔ yɛsi yɛma AWURADE ne koso, odi kyɛ ɔyɛ nyemene paa bɔ okole dumaa maa bɛkɔkamvo ye wɔ maen amukoraati so ɔ. Yiti odi kyɛ mepena ye silɛ nwo nningyein megua berɛ.” Yiti Dawide penane suasilɛ nningyein pee guale berɛ koraka yeɛ owu ɔ.

⁶Afei Dawide frɛle ɔwa Solomon, na ɔhã hyirele ye kitii kyɛ osi sua ɔma AWURADE Yisrael Nyameɛ.

⁷Dawide sele Solomon kyɛ, “Mma, nyɛle m’adwene kyɛ ahaa mesi sua mefa AWURADE me Nyameɛ dumaa meto so.

⁸Nakoso AWURADE lale ye dwirɛ ali hyirele me kyɛ, ‘Ahã mogya agua soma, yeɛ afei aho koɛ mbiri pee. Yiti nnɛsi sua fa me dumaa to so, ofikyɛ aseɛ ye aso, ahã mogya agua pee bɔ me bɔbɔ me nye tua ɔ.

⁹Tie, ɛkɔwo baa bienzua bie, na ɔkɔyɛ sona bɔ okuro asomdwee ɔ. Ngɔmaa okonya asomdwee kofi ye pɔfoɛ mɔ sa nu wɔ nekaa biala; ofikyɛ bɛkɔfrɛ ye Solomon,[10] na ye aberɛ so, ngɔma Yisrael konya asomdwee ná Yisrael nwo atɔ ye.

¹⁰Ye yeɛ okosi sua kɔfa me dumaa kɔto so ɔ. Ɔkɔyɛ mma, ná me koso mayɛ ye baba, na ngɔma ye ahennie bo kotindim wɔ Yisrael afebɔɔ.’

¹¹Yiti mma, AWURADE ogyina wɔ si, amaa ɔnate so ahora asi AWURADE wɔ Nyameɛ sua ne, kyɛbɔ wahã wafa wɔ nwo ne ala.

¹²Mesrɛ AWURADE kyɛ ɔ́ma wɔ nworɛ ne ndeaseɛ, amaa sɛ ɔfa Yisrael maen ne wura wɔ sa a, anea ali AWURADE wɔ Nyameɛ mmeraa ne aso.

¹³AWURADE ahyɛdeɛ ne nhyehyɛleɛ bɔ ɔnate Mose so fa mane Yisrael ne, sɛ ɛnea ná edi so a, okoyie wɔ yé. Gyina pindinn ná ma wɔ hue yɛ se. Nnɛsuro, yeɛ nnɛma wɔ kunu tete wɔ.

¹⁴Mabɔ mmɔden paa mapena sɔ nningyein hemɔ bɔ ɛkɔfa kosi AWURADE awuro ne ɔ magua berɛ: esikaa kɔkorɛ talɛnde apee ɛyaa ko, ɛdwetɛ talɛnde apepesrala ko, kɔɔbere ne buralɛ bɔ ɛkari a ennwu ye noa ɔ. Ofikyɛ mapena sɔ nningyein nemɔ pee, yeɛ afei mapena mmakaa ne nyɔboɛ magua berɛ. Sɔ nningyein nemɔ, odi kyɛ ɛpena bieku boka so.

¹⁵Ele sɔ adwumayɔlɛfoɛ hemɔ pee paa: nyɔboɛdwalɛfoɛ, suasilɛfoɛ, bakaa dwumvoɛ, yeɛ dwumvoɛ ahoroɔ bɔ ɛka bɛ a ennwu bɛ noa, bɔ bɛfa sɔ nningyein hemɔ bedi adwii ɔ:

¹⁶esikaa kɔkorɛ, ɛdwetɛ, kɔɔbere yeɛ buralɛ. Yiti hyɛ adwuma ne abo, na mesrɛ kyɛ AWURADE ogyina wɔ si.”

¹⁷Afei Dawide fale ahyɛdeɛ mane Yisrael mbanyi kyɛ bɛboka ɔwa Solomon. Dawide sele bɛ kyɛ,

¹⁸“AWURADE ɛmɔ Nyameɛ, aso oggyi ɛmɔ si anaa? Maen mɔ bɔ bapɛ ɛmɔ nwo bayia ye, aso ɔmmane asomdwee ɔwwale ɛmɔ ne bɛ b’afia? Ofikyɛ wafa mmenia bɔ bɛte aseɛ ne aso wawura me sa, na AWURADE ne ye mmenia bali aseɛ ne aso ngonim.

¹⁹Yiti ɛ́mɔfa besie ɛmɔ nye so kyɛ ɛmɔkɔfa ɛmɔ adwene ne ɛmɔ ahone bekoli AWURADE ɛmɔ Nyameɛ si ɔ. Ɛmɔɔsi AWURADE Nyameɛ nekaa krongron ne, amaa ɔnate so ɛmɔafa AWURADE apam alaka ne, ɔne Nyameɛ nningyein krongron ne, basie awuro bɔ ɛmɔkosi bɛkɔfa AWURADE dumaa bɛkoto so ne anu.”