Read Sehwi 1 Aberɛso Dwirɛ 23 Bible Online

1 Aberɛso Dwirɛ 23 - Sehwi bible

1 Aberɛso Dwirɛ 23

¹Dawide nyini yɛle aworowaa paa ne, ɔfale ɔwa Solomon sili Yisrael so hene.

²Dawide tole ye sa frɛle Yisrael mbanyi amukoraa ne asɔfo ne Lewifoɛ maa beeyiale.

³Bɛhale Lewifoɛ bɔ bali ofi afoɛ aburasa bɔ ɔkɔ ne, né bɛ somaa te apee aburasa ne mmɔtwɛ.

⁴Dawide nwa, “Bɛ nu apee aburanyɔ ne nna, yeɛ bɛkɔnea AWURADE awuro berɛ adwuma ne aso ɔ, na apee nzia kɔyɛ awuro berɛ ahyerɛlɛfoɛ ne bɛ bɔ bedi dwirɛ ɔ.

⁵Bɛ nu apee nna kɔyɛ pambim wɛmvoɛ, na edweintolɛ nningyein bɔ mayɔ kyɛ bɛfa bɛye AWURADE ayɛ ne, bɛ nu apee nna kɔfa kɔye AWURADE ayɛ.”

⁶Na Dawide boaboale Lewi boso ama nemɔ noa kure kure. Lewi mma nemɔ Gɛsɔm, Kohate ne Merari yeɛ ogyinane so boaboale bɛ noa kure kure ɔ.

⁷Gɛsɔnfoɛ nemɔ ole Ladan ne Simei.

⁸Ladan mma mmienzua nemɔ, Yehiel yeɛ ɔla bɛ noa ɔ, yeɛ afei Setam ne Yowel. Bɛte nza.

⁹Simei mma mmienzua mɔ ole Selemote, Hasiɛl ne Haran. Bɛte nza. Bɛ yeɛ bɛlela Ladan mmusua nemɔ noa ɔ.

¹⁰Simei mma mmienzua mɔ ole Yahate, Sina, Yeyuse yeɛ Beria. Bɛ mmɛnna bɛte Simei mma mmienzua.

¹¹Yahate yeɛ né ɔla bɛ noa ɔ. Sɛ ɔnne berɛ a, Sisa yeɛ ɔwɔ berɛ ɔ. Nakoso Yeyuse ne Beria de, bɛ boso ama banzo, yiti bɛfale bɛ munyɔ kyɛ abusua komapɛ twe.

¹²Kohate mma mmienzua mɔ ole Amram, Yisare, Hebron ne Yusiɛl; bɛte nna.

¹³Amram mma mmienzua ole Aarɔn ne Mose. Nyameɛ tuli Aarɔn siele berɛ kyɛ ɔɔte nningyein krongron paa nemɔ anwo, ná ye sɔ ti, ɔne ye boso ama bɛyera ɛyɛɛ wɔ AWURADE nyunu afebɔɔ, bɛsɔne ye, ná beyira mmenia wɔ AWURADE dumaa nu afebɔɔ.

¹⁴Nakoso Nyameɛ sona Mose de, bɛhale ye boso ama bɛbokale Lewi abusua kure ne.

¹⁵Mose mma mmienzua ole Gɛsɔm ne Eliesa.

¹⁶Gɛsɔm boso ama nemɔ, Sebuel yeɛ ɔla bɛ noa ɔ.

¹⁷Eliesa awa bienzua ole Rehabia. Rehabia yeɛ né ɔla b’abusua ne noa ɔ. Eliesa wanwo baa bienzua ko, nakoso Rehabia boso ama de, bɛte pee paa.

¹⁸Yisare boso ama, Selomite yeɛ ɔla bɛ noa ɔ.

¹⁹Hebron mma nemɔ, Yeria yeɛ ɔla bɛ noa ɔ. Amaria tɔ so nyɔ; Yahasiɛl tɔ so nza, yeɛ Yekameam tɔ so nna.

²⁰Yusiɛl boso ama nemɔ, Mika yeɛ ɔla bɛ noa ɔ, yeɛ Yisia toa berɛ ɔ.

²¹Merari mma mmienzua ole Maheli ne Musi. Yeɛ Maheli mma mmienzua ole Eleasa ne Kise.

²²Eleasa wuli bɔ wanwo baa bienzua ɔ, na mmom ɔwole mmrasua ngome. Na Kise mma mmienzua bɔ bɛte b’abusuafoɛ ne, begyigyale bɛ.

²³Musi mma mmienzua mɔ ole Maheli, Edere ne Yeremote. Bɛte nza.

²⁴Lewi boso ama mɔ ɛne, kyɛbɔ bɛ nana mɔ sasofoɛ te ɔ. Bɛ bɔ bɛlela bɛ mmusua mmusua nemɔ noa ɔ, bɛ bɔ bali ofi afoɛ aburanyɔ bɔ ɔkɔ ɔ, bɔ odi kyɛ bɛyɔ AWURADE awuro nu berɛ ɛsɔnenɛ adwuma ne, bɛhyerɛle bɛ dumaa ngoko ngoko ne, bɛ ɛne.

²⁵Na Dawide hane kyɛ, “AWURADE Yisrael Nyameɛ wama ye mmenia banya asomdwee, na ɔte Yerusalem afebɔɔ.

²⁶Yiti afei de, onhia kyɛ Lewifoɛ bɛsoa nyianu sua ne, anaa nikyee biala bɔ bɛfa bɛyɔ nu ɛsɔnenɛ adwuma ɔ,

²⁷Dawide ahyɛdeɛ bɔ ɔpɛ ye bo ɔ, bɔ ɔmaa bɛhale Lewifoɛ bɔ bali ofi afoɛ aburanyɔ bɔ ɔkɔ ɔ ne, bɛ somaa ɛne.

²⁸Na b’adwuma ole kyɛ odi kyɛ bɛboka Aarɔn boso ama nemɔ wɔ AWURADE awuro berɛ ɛsɔnenɛ adwuma ne anu, odi kyɛ bɛnea aluo berɛ ne pumbu nemɔ aso, odi kyɛ bɛte nningyein krongron nemɔ amukoraa nwo, ná bɛboka Nyameɛ awuro berɛ ɛsɔnenɛ adwuma biala yɔlɛ nu.

²⁹Afei odi kyɛ bɛboka ɛhemɔ koso yɔlɛ nu: paanoo bɔ bɛhyehyɛ ye folii ne, esam paa bɔ bɛfa bɛbɔ aburoo afɔleɛ ne, apiti kabrɛdi ne, afɔleɛ bɔ batoto ne, afɔleɛ bɔ bafa ngoo bafra ye ne, ɔne kyɛ bekosusu afɔleɛ nningyein nemɔ ye somaa ɔ.

³⁰Na odi kyɛ begyina berɛ ngyerɛmɔ biala ne nɔsoa biala bɛda AWURADE ase bɛye ye ayɛ.

³¹Afei odi kyɛ bɛyɔ sɔ mmerɛ biala bɔ bɛbɔ naen yeralɛ afɔleɛ bɛma AWURADE ɔ: afofikyẽa, ɛsraen foforɛ, ɔne aluolue amukoraa bɔ bahyehyɛ ɔ. Lewifoɛ somaa bɔ bɛ nwo kohia ne, odi kyɛ bɛyɔ adwuma ne wɔ AWURADE nyunu daa.

³²Yiti odi kyɛ bɛnea ɛtena sua atenaleɛ ne ɔne nekaa krongron ne aso. Afei koso, Aarɔn boso ama bɔ yeɛ bɛte bɛ koso bɛ nwo ama ne, odi kyɛ bɛboka bɛ maa bɛyɔ AWURADE awuro berɛ ɛsɔnenɛ adwuma ne.”