Read Sehwi 1 Aberɛso Dwirɛ 24 Bible Online

1 Aberɛso Dwirɛ 24 - Sehwi bible

1 Aberɛso Dwirɛ 24

¹Aarɔn boso ama nemɔ, bɛ mmusua mmusua ne ɛhe. Aarɔn mma mmienzua ole Nadabo, Abihu, Eleasa ne Yitama.

²Nakoso Nadabo ne Abihu bewuli bɛyakyili bɛ baba bɔ banwo ba ɔ. Yiti Eleasa ne Yitama yeɛ bɛɛyɛle asɔfo ɔ.

³Sadoke bɔ ɔte Eleasa bosoniɛ ne, ɔne Ahimɛlɛke bɔ ɔte Yitama bosoniɛ ne, Dawide maa bɛbokale ye maa ɔboaboale Aarɔn bosofoɛ nemɔ noa kure kure, kyɛbɔ b’ɛsɔnenɛ adwuma bɔ owura bɛ sa ne, osi te ɔ.

⁴Eleasa boso ama bɔ bɛlela mmusua mmusua nemɔ noa ne, ɔnate kyɛ bɛsone bɛtra Yitama boso ama bɔ bɛlela mmusua mmusua nemɔ noa ne ati, bɛboale Eleasa boso ama nemɔ anoa mmusua buru ne nzia, yeɛ Yitama boso ama nemɔ koso mmusua mmɔtwɛ.

⁵Bɛfale serewagualɛ so yeɛ bɛhyɛle adwuma ne pɛpɛɛpɛ bɛmane bɛ ɔ, ofikyɛ Eleasa ne Yitama boso ama nemɔ, né bɛ mukoraa bele mbanyi mɔ bɔ bɛfata kyɛ bɛyɔ Nyameɛ adwuma wɔ nekaa krongron berɛ ɔ.

⁶Ahyerɛlɛniɛ Semaya bɔ ɔte Lewiniɛ bɔ ye baba ole Netanɛl ne, ɔhyerɛle bɛ nu biala ye dumaa ne ye adwuma bɔ bafa bawura ye sa ɔ, wɔ mmenia hemɔ nyunu ɔ: Nana ne ye mbanyi mɔ, ɔsɔfo Sadoke, Abiata awa Ahimɛlɛke, ɔne mbanyi bɔ bɛlela asɔfo ne Lewifoɛ bɛ nana mɔ sasofoɛ noa ɔ. Bɛyele abusua ko befili Eleasa sasofoɛ nu, yeɛ bɛyele ko koso befili Yitama sasofoɛ nu.

⁷Serewa bɔ oli moa ne yele Yehoaribo, bɔ ɔtɔ so nyɔ ne yele Yedaya,

⁸bɔ ɔtɔ so nza ne yele Harim, bɔ ɔtɔ so nna ne yele Seorim,

⁹bɔ ɔtɔ so nnu ne yele Malkiya, bɔ ɔtɔ so nzia ne yele Miyamin,

¹⁰bɔ ɔtɔ so nzoo ne yele Hakose, bɔ ɔtɔ so mmɔtwɛ ne yele Abiya,

¹¹bɔ ɔtɔ so ngona ne yele Yesua, bɔ ɔtɔ so buru ne yele Sekania,

¹²bɔ ɔtɔ so buru ne ko ne yele Eliasibo, bɔ ɔtɔ so buru ne nyɔ ne yele Yakim,

¹³bɔ ɔtɔ so buru ne nza ne yele Hupa, bɔ ɔtɔ so buru ne nna ne yele Yesebeabo,

¹⁴bɔ ɔtɔ so buru ne nnu ne yele Bilega, bɔ ɔtɔ so buru ne nzia ne yele Yimere,

¹⁵bɔ ɔtɔ so buru ne nzoo ne yele Hesire, bɔ ɔtɔ so buru ne mmɔtwɛ ne yele Hapise,

¹⁶bɔ ɔtɔ so buru ne ngona ne yele Petahia, bɔ ɔtɔ so aburanyɔ ne yele Yehesekel,

¹⁷bɔ ɔtɔ so aburanyɔ ne ko ne yele Yakin, bɔ ɔtɔ so aburanyɔ ne nyɔ ne yele Gamul,

¹⁸bɔ ɔtɔ so aburanyɔ ne nza ne yele Delaya, yeɛ bɔ ɔtɔ so aburanyɔ ne nna ne yele Maasia.

¹⁹Sɔ mmenia nemɔ, bɛ nu biala kɔ AWURADE awuro ne anu ɔkɔyɔ ye adwuma. Nhyehyɛleɛ bɔ bɛ nana Aarɔn nate AWURADE Yisrael Nyameɛ dwirɛ so hyehyɛ mane bɛ ne, so yeɛ begyinane bɛyɔle b’adwuma ɔ.

²⁰Lewi boso ama ngaa nemɔ ɛhe: Amram boso ama nemɔ, Subayel yeɛ ɔla bɛ noa ɔ; Subayel boso ama nemɔ, Yedeya yeɛ ɔla bɛ noa ɔ.

²¹Rehabia ye boso ama nemɔ, Yisia yeɛ ɔla bɛ noa ɔ.

²²Yisare boso ama nemɔ, Selemote yeɛ ɔla bɛ noa ɔ, yeɛ Selemote boso ama nemɔ koso, Yahate yeɛ ɔla bɛ noa ɔ.

²³Hebron boso ama nemɔ, Yeria yeɛ ɔla bɛ noa ɔ; sɛ ɔnne berɛ a, Amaria yeɛ ɔwɔ berɛ ɔ; Yahasiɛl tɔ so nza, yeɛ Yekameam tɔ so nna.

²⁴Yusiɛl boso ama nemɔ, Mika yeɛ ɔla bɛ noa ɔ; Mika boso ama nemɔ, Samiri yeɛ ɔla bɛ noa ɔ.

²⁵Mika aliɛma ole Yisia, na Yisia boso ama nemɔ, Sakaria yeɛ ɔla bɛ noa ɔ.

²⁶Merari boso ama nemɔ, Maheli ne Musi yeɛ bɛla bɛ noa ɔ. Yaasia boso ama nemɔ, Beno yeɛ ɔla bɛ noa ɔ.

²⁷Merari boso ama nemɔ, Yaasia boso ama nemɔ, Beno, Soham, Sakure ne Yibri yeɛ bɛla bɛ noa ɔ.

²⁸Maheli boso ama nemɔ, Eleasa wanwo baa bienzua de, nakoso ye yeɛ né ɔla bɛ noa ɔ.

²⁹Kise boso ama nemɔ, Yerameel yeɛ ɔla bɛ noa ɔ.

³⁰Musi boso ama nemɔ, Maheli, Edere ne Yerimote yeɛ bɛla bɛ noa ɔ. Lewi boso ama nemɔ, kyɛbɔ bɛ nana mɔ sasofoɛ te ɔ, bɛ ɛne.

³¹Kyɛbɔ b’eliɛma mɔ Aarɔn boso ama nemɔ bɛyɔle ne ala, beguale serewa bɛfa bɛhyɛle b’adwuma nemɔ. Beguale serewa ne wɔ mmenia hemɔ anyunu: Nana Dawide, Sadoke, Ahimɛlɛke ne mbanyi bɔ bɛlela Lewifoɛ ne asɔfo abusua ne bɛ nana mɔ sasofoɛ noa ɔ. Na bɔ bɛyɔle bɛmane bamuɛbaa ne, sɔ ala yeɛ bɛyɔle bɛmane aliɛmaa kasiɛ ne ɔ.