Read Sehwi 1 Aberɛso Dwirɛ 26 Bible Online

1 Aberɛso Dwirɛ 26 - Sehwi bible

1 Aberɛso Dwirɛ 26

¹Pambim awɛmvoɛ kure ne de, bɛ bɔ befi Kora abusua nu ɛhe: Kore awa Meselemia bɔ ɔte Asafe sasoniɛ ne.

²Né Meselemia le mmaa mmienzua. Sakaria te bamuɛbaa, Yediayɛl tɔ so nyɔ, Sebadia tɔ so nza, Yateniɛl tɔ so nna,

³Elam tɔ so nnu, Yehohanan tɔ so nzia, yeɛ Eliehonae tɔ so nzoo.

⁴Né Obɛde Edom le mmaa mmienzua: Semaya te bamuɛbaa, Yehosabade tɔ so nyɔ, Yoa tɔ so nza, Saka tɔ so nna, Netanɛl tɔ so nnu,

⁵Amiɛl tɔ so nzia, Yisaka tɔ so nzoo, yeɛ Pewuletae tɔ so mmɔtwɛ, ofikyɛ AWURADE yirale Obɛde Edom.

⁶Ɔwa bienzua Semaya koso wole mmaa mmienzua bɔ né bele dibea wɔ bɛ nana mɔ sasofoɛ nu ɔ, ofikyɛ bɛte mmenia bɔ bɛte titire ɔ.

⁷Semaya mma mmienzua ole Otini, Refael, Obɛde ne Elsabade. B’eliɛma mɔ Elihu ne Semakia koso bɛte titire.

⁸Bɛ mukoraati bɔ bɛte Obɛde Edom boso ama ne, bɛ ne bɛ mma mmienzua ne b’eliɛma mmienzua mɔ, bɛte mmenia bɔ bɛbɔ ɛsɔnenɛ adwuma ne anwo mmɔden ɔ. Sɔ mmenia bɔ bɛte Obɛde Edom boso ama nemɔ amukoraa, bɛte aburasia ne nyɔ.

⁹Né Meselemia le mmaa mmienzua ne aliɛmaa mmienzua buru ne mmɔtwɛ bɔ bɛte titire ɔ.

¹⁰Hosa bɔ ɔte Merari bosoniɛ ne, ye mma mmienzua ole Simri bɔ ɔla bɛ noa ne, (ɔwɔ nu kyɛ nna ye yeɛ ɔte bamuɛbaa ɔ, nakoso ye baba maa ɔlale oliɛma nemɔ noa),

¹¹Hilkia tɔ so nyɔ, Tebalia tɔ so nza, yeɛ Sakaria tɔ so nna. Hosa ye mma mmienzua ne oliɛma mmienzua nemɔ amukoraa, bɛte buru ne nza.

¹²Pambim awɛmvoɛ nemɔ, bɛhyehyɛle bɛ nu kure kure, kyɛbɔ bɛ mmusua mmusua te ɔ, na bɛfale AWURADE awuro ne anu adwuma bewurale bɛ sa kyɛ b’eliɛma mɔ Lewifoɛ ngaa nemɔ ala.

¹³Pambim biala, begyinane serewagualɛ so yeɛ bɛfa bɛyele abusua horɛ bɔ ɔkɔwɛne ɔ, kyɛ abusua ne te kãa oo, anaakyɛ ɔte piri oo.

¹⁴Serewagualɛ ne yele eyia afiteleɛ pambim ne mane Selemia. Ɔwa bienzua Sakaria bɔ ɔte nworɛniɛ ne, ye koso beguale serewa bɛmane ye, na serewa ne yele sorɔ dɔ pambim ne mane ye.

¹⁵Serewagualɛ ne yele ngwaen dɔ pambim ne mane Obɛde Edom, na bɛfale nekaa bɔ besie nningyein ne bewurale ye mma mmienzua nemɔ sa.

¹⁶Eyia atɔleɛ pambim ne Salekete pambim bɔ yeɛ ɔla atee bɔ ɔfo kɔ anwuro dɔ ne anwo ne, serewagualɛ ne yele mane Supim ne Hosa. Mmerɛ bɔ odi kyɛ bɛfa bɛwɛne ne, bɛhyɛle nu pɛpɛɛpɛ bɛmane awɛmvoɛ nemɔ.

¹⁷Eyia afiteleɛ bue nu dɔ ne, daa biala né Lewifoɛ nzia yeɛ bɛwɛne berɛ ɔ; nna wɛne sorɔ dɔ daa biala, nna wɛne ngwaen dɔ daa biala, yeɛ nyɔ ahoroɔ nyɔ wɛne nekaa bɔ besie nningyein ne.

¹⁸Na abrannaa bɔ ɔwɔ eyia atɔleɛ dɔ ne, awɛmvoɛ nna wɔ atee ne anoa, yeɛ nyɔ koso wɔ abrannaa ne aso.

¹⁹Korafoɛ ne Merarifoɛ boso ama nemɔ, bɛ nu pambim awɛmvoɛ kure kure nemɔ ɛne.

²⁰Lewifoɛ nemɔ anu, Nyameɛ awuro berɛ nekaa bɔ besie nningyein, ɔne nekaa bɔ besie nningyein bɔ batu basie berɛ bama Nyameɛ ne, Ahiya yeɛ né ɔnea so ɔ.

²¹Ladan boso ama, bɔ ɔnate Ladan so bɛte Gɛsɔnfoɛ, bɔ bɛlela Gɛsɔnniɛ Ladan ye mmusua mmusua nemɔ noa ne, Yehieli yeɛ né ɔla bɛ noa ɔ.

²²Yehieli mma mmienzua nemɔ, Setam ne oliɛma Yowel yeɛ né bɛwɛne AWURADE awuro nekaa bɔ besie nningyein ne ɔ.

²³Amram boso ama, Yisare boso ama, Hebron boso ama ɔne Yusiɛl boso ama,

²⁴nekaa bɔ bɛfa nningyein besie ne, Sebuel bɔ ye baba ole Gɛsɔm, bɔ ye baba ole Mose ne, ye yeɛ né ɔnea so ɔ.

²⁵Ye abusuafoɛ mɔ, sɛ ɛnea Eliesa sa so a, bɛ ɛhe: Eliesa wole Rehabia; Rehabia wole Yehyaya; Yehyaya wole Yoram; Yoram wole Sikri; yeɛ Sikri wole Selomite.

²⁶Nana Dawide ne mbanyi bɔ bɛlela mmusua mmusua nemɔ noa, koɛhonɛfoɛ apee apee so safohene nemɔ, ɛyaa ɛyaa so safohene nemɔ, yeɛ safohene ngaa nemɔ, bɛ nningyein bɔ batu basie berɛ bama AWURADE ne nekaa bɔ besie sɔ nningyein nemɔ ne, sɔ Selomite ye, ɔne oliɛma mmienzua mɔ yeɛ né bɛnea so ɔ.

²⁷Koɛ nu nzesadeɛ bɔ benyane ne, betuli nu bie besiele berɛ kyɛ bɛfa besiesie AWURADE awuro ne.

²⁸Afei, nningyein amukoraa bɔ Samuel bɔ ɔse ase ne, Kise awa Sɔɔlo, Nɛɛ awa Abenɛ, Seruya awa Yoabo, batu basie berɛ bama AWURADE ne, bɛfale sɔ nningyein ne amukoraa bewurale Selomite ne oliɛma mmienzua mɔ sa.

²⁹Yisare boso ama nemɔ anu, Kenania ne ye mma mmienzua mɔ yeɛ betuli bɛ besiele berɛ kyɛ bɛyɛ ahyerɛlɛfoɛ ne ndɛenbualɛfoɛ ɔ. B’adwuma deɛ ne de, né bɛnyɔ ye wɔ AWURADE asɔneyɛɛ sua ne anu.

³⁰Yisrael maen ne, asue Yɔɔdan eyia atɔleɛ so, AWURADE adwuma bɔ ɔwɔ berɛ amukoraa, ɔne ɛhene ne adwuma bɔ ɔwɔ berɛ ne, betuli Hasabia ne ye abusuafoɛ apee ko ɛyaa nzoo, bɔ bɛte titire wɔ Hebron boso ama nemɔ anu kyɛ bɛnea so.

³¹Hebron boso ama nemɔ, Yeriya yeɛ né ɔla bɛ noa ɔ. (Dawide lili bia ne, ye afoɛ aburanna ne aso, bɛneaneane ngrataa bɔ bahyerɛ bafa aworɛ ndoatoasoɛ ne mmusua mmusua nwo ne anu, na benwuni kyɛ Hebron boso ama nemɔ anu, mmienzua bɔ bɛte titire ɔ, bɛwɔ Yasere bɔ ɔwɔ Gileade.)

³²Nana Dawide tuli Yeriya ne ye abusuafoɛ, bɔ bɛte mmienzua apee nyɔ ɛyaa nzoo, bɔ bɛte titire bɔ bɛlela mmusua mmusua noa ɔ, kyɛ bɛnea Rubenfoɛ, Gadefoɛ ne Manase abusua kure ne bue ne aso wɔ bɛ nikyee biala bɔ ɔfa Nyameɛ ne Nana Dawide nwo ɔ.