Read Sehwi 1 Aberɛso Dwirɛ 27 Bible Online

1 Aberɛso Dwirɛ 27 - Sehwi bible

1 Aberɛso Dwirɛ 27

¹Nana Dawide koɛhonɛfoɛ bɔ kure ko biala te apee aburanyɔ ne nna, bɔ né kure ko biala kɔ adwuma bosome ko wɔ afoɛ biala nu ne, Yisraelfoɛ mmusua mmusua mbanyi, koɛhonɛfoɛ apee apee so safohene mɔ ne ɛyaa ɛyaa so safohene mɔ, ɔne bɛ mbanyi bɔ bɛnea bɛ so bɛfa bɛso Nana Dawide ne, bɛ ɛhe:

²Yasobeam bɔ ye baba ole Sabidiɛl ne, ye yeɛ né ɔnea kure bɔ oli moa ne aso wɔ bosome bɔ oli moa ne anu ɔ. Ye kure ne, bɛ somaa te apee aburanyɔ ne nna.

³Ɔte Pɛrɛse bosoniɛ, na safohene mɔ bɔ bɛkɔ adwuma bosome bɔ oli moa ne anu ne, ye yeɛ né ɔnea bɛ so ɔ.

⁴Ahohiniɛ Dodae yeɛ né ɔnea kure bɔ bɛkɔ adwuma bosome bɔ ɔtɔ so nyɔ ne aso ɔ. Ye kure ne, Miklote yeɛ né ɔla bɛ noa ɔ, na bɛ somaa te apee aburanyɔ ne nna.

⁵Safohene bɔ ɔtɔ so nza, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so nza ne aso ne, ye yeɛ ole Benaya, bɔ ye baba ole ɔsɔfo Yehoada ne. Ye kure ne bɛ somaa te apee aburanyɔ ne nna.

⁶Sɔ Benaya ne, ɔte koɛhonɛniɛ ahoneserɛniɛ bɔ ɔla Dawide koɛhonɛfoɛ ahoneserɛfoɛ aburasa nemɔ bɛ noa ɔ. Ɔwa Amisabade yeɛ né ɔla ye kure deɛ ne anoa ɔ.

⁷Yoabo aliɛma Asahel yeɛ né ɔnea koɛhonɛfoɛ bɔ bɛkɔ adwuma bosome bɔ ɔtɔ so nna ne aso ɔ. Sɛ ɔnne berɛ a, ɔwa bienzua Sebadia yeɛ ɔwɔ berɛ ɔ, na ye kure deɛ ne, bɛ somaa te apee aburanyɔ ne nna.

⁸Safohene bɔ ɔtɔ so nnu, bɔ ɔnea bɛ bɔ bɛkɔ adwuma bosome bɔ ɔtɔ so nnu ne aso ne, ye yeɛ ole Yisrahiniɛ Samhute, na ye kure deɛ ne, bɛte apee aburanyɔ ne nna.

⁹Safohene bɔ ɔtɔ so nzia, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so nzia ne aso ne, ye yeɛ ole Yira, bɔ ye baba ole Tekoaniɛ Yikese ne. Na ye kure deɛ ne, bɛ somaa te apee aburanyɔ ne nna.

¹⁰Safohene bɔ ɔtɔ so nzoo, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so nzoo ne aso ne, ye yeɛ ole Pelonniɛ Helese bɔ ofi Efraim abusua kure nu ne. Ye kure deɛ ne, bɛ somaa te apee aburanyɔ ne nna.

¹¹Safohene bɔ ɔtɔ so mmɔtwɛ, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so mmɔtwɛ ne aso ne, ye yeɛ ole Husaniɛ Sibekae bɔ ɔte Sera bosoniɛ ne. Na ye kure deɛ ne, bɛ somaa te apee aburanyɔ ne nna.

¹²Safohene bɔ ɔtɔ so ngona, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so ngona ne aso ne, ye yeɛ ole Anatoteniɛ Abiesa bɔ ofi Benyamin abusua kure nu ne. Na ye kure deɛ ne, bɛ somaa te apee aburanyɔ ne nna.

¹³Safohene bɔ ɔtɔ so buru, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so buru ne aso ne, ye yeɛ ole Netofaniɛ Maharae bɔ ofi Sera abusua nu ne. Na ye kure deɛ ne, bɛ somaa te apee aburanyɔ ne nna.

¹⁴Safohene bɔ ɔtɔ so buru ne ko, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so buru ne ko ne aso ne, ye yeɛ ole Piratonniɛ Benaya bɔ ofi Efraim abusua kure nu ne. Na ye kure deɛ ne, bɛ somaa te apee aburanyɔ ne nna.

¹⁵Safohene bɔ ɔtɔ so buru ne nyɔ, bɔ ɔnea koɛhonɛfoɛ bɔ bɛkɔ adwuma bosome bɔ ɔtɔ so buru ne nyɔ ne aso ne, ye yeɛ ole Netofaniɛ Heldae bɔ ɔte Otiniɛl bosoniɛ ne. Na ye kure deɛ ne, bɛ somaa te apee aburanyɔ ne nna.

¹⁶Yisrael mmusua kure nemɔ mbanyi bɔ bɛlela bɛ noa ɛhe: Rubenfoɛ deɛ ole Eliesa, bɔ ye baba ole Sikri ne; Simeonfoɛ deɛ ole Sefatia bɔ ye baba ole Maaka ne;

¹⁷Lewifoɛ deɛ ole Hasabia, bɔ ye baba ole Kemuel ne; Aarɔn boso ama bɛ deɛ ole Sadoke;

¹⁸Yudafoɛ deɛ ole Elihu, bɔ ɔte Dawide aliɛma mmienzua nemɔ anu ko ne; Yisakafoɛ deɛ ole Omri, bɔ ye baba ole Mikayɛl ne;

¹⁹Sebulɔnfoɛ deɛ ole Yismaya, bɔ ye baba ole Obadia ne; Nafetalifoɛ deɛ ole Yerimote, bɔ ye baba ole Asriɛl ne;

²⁰Efraimfoɛ deɛ ole Hosea, bɔ ye baba ole Asasia ne; Manase abusua kure ne bue ne, bɛ deɛ ole Yowel, bɔ ye baba ole Pedaya ne;

²¹Manase abusua kure ne bue bɔ bɛwɔ Gileade ne, bɛ deɛ ole Yido, bɔ ye baba ole Sakaria ne; Benyaminfoɛ deɛ ole Yaasiɛl, bɔ ye baba ole Abenɛ ne.

²²Danfoɛ deɛ ole Asarel, bɔ ye baba ole Yeroham ne. Sɔ mbanyi nemɔ yeɛ né bɛlela Yisrael mmusua kure nemɔ noa ɔ.

²³Yisraelfoɛ bɔ né bennya bellili afoɛ aburanyɔ ne, Dawide wanga bɛ, ofikyɛ né AWURADE ahyɛ bɔ kyɛ ɔkɔma Yisraelfoɛ bɛkɔsone kyɛ ewienu nzramaa.

²⁴Seruya awa Yoabo hyɛle ye bo kyɛ ɔka mmenia ne, na wanyie. Nakoso ɛhe ne po, ɔnate sɔ ti, Nyameɛ fɛle Yisrael so yaa maa ye ti bɛhale mmenia nen, bangyerɛ bɛ somaa ne bangua Nana Dawide nwo dwirɛ nwomaa ne anu.

²⁵Asimawete bɔ ye baba ole Adiɛl ne, ye yeɛ né ɔnea nekaa bɔ besie ɛhene nningyein ɔ. Nekaa bɔ besie nningyein wɔ manzini nemɔ anu, nguro nu, nguraa nu ne abandenden mɔ nu ne, Yusia awa Yonatan yeɛ né ɔnea so ɔ.

²⁶Bɛ bɔ né bɛyɔ eburo adwuma, bɔ bɛyɔ fieso adwuma ne, Kelubo awa Esiri yeɛ né ɔnea bɛ so ɔ.

²⁷Ramaniɛ Simei yeɛ né ɔnea bobe boo nemɔ aso ɔ, yeɛ bobe mmaa bɔ bɛfa bɛyɛ nzaa ne, Sifimniɛ Sabidi yeɛ né ɔnea so ɔ.

²⁸Olive mmakaa ne akyea bɔ bɛwɔ aseɛ frɛtɛɛ nemɔ aso ne, Gederiniɛ Baal Hanan yeɛ né ɔnea so ɔ. Nekaa bɔ besie ngoo nemɔ, Yoase yeɛ né ɔnea so ɔ.

²⁹Nandwie mɔ bɔ bedidi Saron ne, Saronniɛ Sitrae yeɛ né ɔnea bɛ so ɔ. Yeɛ nandwie mɔ bɔ bedidi wɔ bɔnza nemɔ anu ne, Adlae awa Safate yeɛ né ɔnea bɛ so ɔ.

³⁰Yismaelniɛ Obil yeɛ né ɔnea afupɔngɔ nemɔ aso ɔ. Merononiɛ Yedeya yeɛ né ɔnea afunum nemɔ aso ɔ. Mmoaen ne mbɔngye ne, Hagriteniɛ Yasise yeɛ né ɔnea bɛ so ɔ.

³¹Sɔ mmenia nemɔ amukoraa, né bɛnea Nana Dawide nningyein so.

³²Né Dawide baba aliɛma bienzua Yonatan te tufohene. Ɔte ahyerɛlɛniɛ bɔ ɔse nworɛ ɔ. Hakemoni awa Yehiel yeɛ né ɔte Nana Dawide mma mmienzua mɔ bɛ neafoɛ ɔ.

³³Né Ahitofel te Nana Dawide tufohene, yeɛ Akiniɛ Husae te Nana Dawide damvo.

³⁴Benaya awa Yehoada ɔne Abiata yeɛ besili Ahitofel gya nu ɔ. Né Yoabo te Nana Dawide koɛhonɛfoɛ so safohene.