Read Sehwi 1 Aberɛso Dwirɛ 29 Bible Online

1 Aberɛso Dwirɛ 29 - Sehwi bible

1 Aberɛso Dwirɛ 29

¹Nana Dawide sele maen ne amukoraa kyɛ, “Mma Solomon bɔ Nyameɛ waneanea nu waye ye ngome ne, ɔte akwadaa ná onnwuni nningyein nye so yé paa. Nakoso adwuma ne, ɔte piri paa, ofikyɛ sua ne, nna kuro sona sua ɔ, na mmom AWURADE Nyameɛ bɔbɔ deinn ye deɛ ɔ.

²Yiti mabɔ mmɔden bɔ ngɔhora biala, mapena nningyein bɔ bɛkɔfa bekosi me Nyameɛ awuro ne ɔ magua berɛ: esikaa kɔkorɛ bɔ bɛkɔfa bɛkɔyɔ esikaa kɔkorɛ nningyein; ɛdwetɛ bɔ bɛkɔfa bɛkɔyɔ ɛdwetɛ nningyein; kɔɔbere bɔ bɛkɔfa bɛkɔyɔ kɔɔbere nningyein; buralɛ bɔ bɛkɔfa bɛkɔyɔ mmuralɛ nningyein; yeɛ mmakaa bɔ bɛkɔfa bɛkɔyɔ mmakaa nningyein ɔ. Afei koso, mapena onike nyɔboɛ bɔ bɛkɔfa bɛkɔhyehyɛ ɔ, nyɔboɛ hyɛnhyɛnn, nyɔboɛ torometorome, nyɔboɛ bɔ ye nyɔboɛ yɛ se ɔ, yeɛ nyɔbosanyene pee.

³Sɔ nningyein nemɔ bɔ mapena magua berɛ kyɛ bɛfa besi awuro krongron ne, ɛhe asi ye, mabɔ me bɔbɔ me sikaa kɔkorɛ ne ɛdwetɛ fotoɛ mato berɛ. Na ɔnate kyɛ m’ahone la me Nyameɛ awuro ne anwo ne ati, mefa mekyɛ, kyɛ bɛfa besi me Nyameɛ awuro ne.

⁴Ɔte Ofire esikaa kɔkorɛ kilo apee ɛyaa ko, yeɛ ɛdwetɛ paa paa kilo apee ɛyaa nyɔ aburanna bɔ bɛkɔfa bɛkɔma sua ne terɛ nemɔ anwo ɔ;

⁵yeɛ afei esikaa kɔkorɛ ne ɛdwetɛ nwo adwuma ngaa amukoraa bɔ ɔsɛ kyɛ adwiililɛfoɛ nemɔ bɛyɔ ne. Yiti nwa yeɛ ɔkɔye ye kunu sefaa kɔbɔ afɔleɛ ɔ, amaa ɔnate so watu ye nwo wasie berɛ wama AWURADE ɛnɛ ɔ?”

⁶Yeɛ mbanyi bɔ bɛlela bɛ nana mɔ sasofoɛ noa ne, bɛbɔle b’akyɛdeɛ afɔleɛ, na sɔ ala yeɛ mbanyi bɔ bɛlela abusua kure noa ne, koɛhonɛfoɛ apee apee so safohene nemɔ, koɛhonɛfoɛ ɛyaa ɛyaa so safohene nemɔ, bɛ ne mbanyi bɔ bɛlela Nana Dawide adwuma noa nemɔ bɛbobɔle bɛ deɛ ɔ.

⁷Bɛfale sɔ nningyein hemɔ bɛbokale Nyameɛ awuro silɛ nwo adwuma ne: esikaa kɔkorɛ kilo apee ɛyaa ko aburasoo, esikaa kɔkorɛ mbembenanneɛ kilo aburawɔtwɛ ne nna, ɛdwetɛ kilo apee ɛyaa nza aburanna, kɔɔbere kilo apee ɛyaa nzia ne buru, yeɛ buralɛ kilo apepesrala nza, apee ɛyaa nna ne aburannu.

⁸Afei koso, ebiala bɔ ole nyɔboɛ bɔ ye nyɔboɛ yɛ se ne, ɔfa wale maa bɛfa beguale sua bɔ bɛfa AWURADE awuro nningyein begua nu ne anu, na Gɛsɔnniɛ Yehiel yeɛ né ɔnea so ɔ.

⁹Na maen ne nye gyele, ofikyɛ sɔ mmenia nemɔ bɛyele bɛ kunu sefaa bɛbɔle afɔleɛ. Bɛyɛle b’adwene ko bɛyele bɛ kunu bɛbɔle afɔleɛ bɛmane AWURADE. Na Nana Dawide koso nye gyele paa.

¹⁰Afei Dawide yele AWURADE ayɛ wɔ maen ne amukoraati bɛ nyunu. Na Dawide hane kyɛ, “Yɛye wɔ ayɛ afebɔɔ oo, AWURADE, yɛ nana Yisrael ye Nyameɛ.

¹¹Ao AWURADE, ɛte piri, na tumi, animnyam, ngonimlilɛ ne ahennie nu animnyam te wɔ deɛ, ofikyɛ anwuro ne aseɛ so nningyein amukoraa bɛte wɔ deɛ. Ao AWURADE, ahennie ne te wɔ deɛ, na wɔ tumi te piri tra ebiala.

¹²Anwonya ne animnyam fi wɔ berɛ, na edi hene wɔ ebiala so. Wɔ yeɛ etira tumi ne anwoserɛ ɔ, na wɔ sa nu yeɛ sona biala ye tumi ne ye anwoserɛ wɔ ɔ.

¹³Afei, yɛ Nyameɛ, yɛda wɔ ase, na yɛye wɔ animnyam dumaa ne ayɛ.

¹⁴“Na me ole nwa, yeɛ me maen koso ole nwa, bɔ yahora yabɔ sɔ akyɛdeɛ afɔleɛ he ɔ? Ofikyɛ nikyee bɔ yɛle biala, wɔ yeɛ ɛfa mane yɛ ɔ, na wɔ bɔbɔ wɔ nikyee yeɛ yafa yabrɛ wɔ ɔ.

¹⁵Wɔ nyunu, yɛte ɛwɔfoɛ ne amanvrafoɛ, kyɛ yɛ nana mɔ amukoraa ala. Yɛ ngyẽa bɔ yɛdi ye aseɛ ye aso ne, ɔpɛ nu kɔ kyɛ wawoɛ, na yɛngɔhyɛ ná yatu yamini.

¹⁶Ao AWURADE yɛ Nyameɛ, nningyein wora bɔ yatu yasie berɛ kyɛ yɛfa yɛsi sua bɔ wɔ dumaa krongron la so ne, ofi wɔ bɔbɔ wɔ dɔ, na ye mukoraa te wɔ bɔbɔ wɔ deɛ.

¹⁷Me Nyameɛ, mese kyɛ ɛneanea ahone nu, na wɔ nye gye sona bɔ ye bra te sannwuu ɔ nwo. M’ahone nu te, na maye me kunu sefaa yeɛ mafa sɔ nningyein nemɔ amukoraa mabɔ afɔleɛ mama wɔ ɔ. Na kekesaala ye, wɔ maen bɔ bayia wa ye, manwu kyɛ bele anigye baye bɛ kunu sefaa babɔ afɔleɛ bama wɔ ɔ.

¹⁸Ao AWURADE, Abraham, Yisake, Yisrael ne yɛ nana mɔ Nyameɛ, adwene paa ne nhyehyɛleɛ paa bɔ ɔte sɔa ye, maa ɔtena wɔ mmenia bɛ ti anu daa. Maa beli nahorɛ bɛma wɔ daa.

¹⁹Ma mma Solomon onya adwene paa bɔ ɔkɔfa kɔyɛ sotie kɔma wɔ mmeraa dwirɛ, wɔ noa dwirɛ ne w’ahyɛdeɛ, ná okoli bɛ mukoraa so, amaa wasi asɔneyɛɛ sua bɔ mapena ye nwo nningyein magua berɛ ne.”

²⁰Afei Dawide sele maen ne amukoraa kyɛ, “Ɛ́mɔye AWURADE ɛmɔ Nyameɛ ayɛ.” Na mmenia amukoraa bɔ babɔ dwaa ne, bɛyele AWURADE bɛ nana mɔ Nyameɛ ne ayɛ, na bɛbɔle bɛ nu ase bɛsɔnene AWURADE, yeɛ bɛkotole Nana Dawide koso.

²¹Aleɛ hyene ne, begyinane Yisrael maen amukoraa gya nu bɛfale ɛhemɔ bɛbɔle afɔleɛ ne naen yeralɛ afɔleɛ bɛmane AWURADE: nandwie nyii apee ko, mmoaen nyii apee ko, mmoaen akrɔngrɔma apee ko, ɔne bɛ nwo anonneɛ afɔleɛ ne afɔleɛ pee.

²²Na sɔ kyẽa ne, bele anigye bedidili bɛnone wɔ AWURADE nyunu. Bɛpopale Dawide awa Solomon ngoo besili ye hene bieku. Bɛpopale ye ngoo wɔ AWURADE nyunu bɛfale ye betuale bɛ noa, yeɛ Sadoke koso bɛpopale ye ngoo maa ɔyɛle bɛ sɔfo.

²³Yiti Solomon tenane AWURADE ahennie bia so lili ye baba Dawide bia yɛle ɛhene. Oyiele ye yé, na Yisrael maen amukoraa bɛsole ye.

²⁴Maen ne anu mbanyi amukoraa, koɛhonɛfoɛ ahoneserɛfoɛ amukoraa, yeɛ Nana Dawide mma mmienzua amukoraa besuale kyɛ bɛkɔso Nana Solomon.

²⁵AWURADE mane Solomon nyane animnyam wɔ Yisrael maen amukoraati bɛ nyunu, na ɔmane ye ahennie nu animnyam bɔ ɛhene biala onnyane bie le wɔ Yisrael ɔ.

²⁶Yiti Yese awa Dawide lili Yisrael amukoraa so hene.

²⁷Olili Yisrael so hene afoɛ aburanna. Nu afoɛ nzoo bɔ oli moa ne, olili hene wɔ Hebron, na afoɛ aburasa ne nza koso, olili ye wɔ Yerusalem.

²⁸Onyini yɛle aworowaa posoposo koraka yeɛ owu ɔ. Onyi hyɛle, onyane anwonyadeɛ ne animnyam, na ɔwa Solomon lili ye bia.

²⁹Afei Nana Dawide nwo dwirɛ, ofi ye ahyɛaseɛ bɔ ɔkwaadwu ye ayieleɛ, bahyerɛ ye wɔ Samuel bɔ ɔse ase ne, ye abakɔsɛm nwomaa ne anu, ngɔmhyɛlɛniɛ Natan abakɔsɛm nwomaa ne anu, yeɛ Gade bɔ ɔse ase ne, ye abakɔsɛm nwomaa ne anu.

³⁰Ye ahennie nwo dwirɛ amukoraa, ye koɛhonɛ nu anwoserɛ, ɔne edwirɛ bɔ ɔfa ye ne Yisrael maen ne aseɛ ye aso ahennie amukoraati nwo ne koso, bahyerɛ ye wɔ sɔ nwomaa nemɔ anu bie.