Read Sehwi 1 Aberɛso Dwirɛ 4 Bible Online

1 Aberɛso Dwirɛ 4 - Sehwi bible

1 Aberɛso Dwirɛ 4

¹Yuda boso ama mɔ ole Pɛrɛse, Hesron, Karemi, Hure yeɛ Sobal.

²Sobal awa Reaya yeɛ ɔwole Yahate ɔ, na Yahate wole Ahumae ne Lahade. Soratifoɛ mmusua mɔ ɛne.

³Etam boso ama mɔ ole Yesreel, Yisma, Yidebase, na b’eliɛma brasua ole Haseleponi.

⁴Penuel wole Gedɔ, yeɛ Esere wole Husa. Efrata bamuɛbaa Hure, bɔ yeɛ ɔte Betlehemfoɛ bɛ nana ne, ye boso ama mɔ ɛne.

⁵Né Tekoa baba Asure ogya mmraa nyɔ: Hela ne Naara.

⁶Ɔne Naara bɛwole Ahusam, Hefa, Temeni ne Hahasetari. Naara mma mmienzua mɔ ɛne.

⁷Hela mma mmienzua mɔ ole Serete, Yisare ne Etenan.

⁸Kose wole Anubo ne Sobeba; na Harum awa Ahahel ye abusuafoɛ bɛte Kose boso ama.

⁹Né Yabese le animnyam tra oliɛma mɔ amukoraa. Ye maame tole ye dumaa Yabese, ofikyɛ ye maame nwa, “Ye aworɛ nu, nwuni amaneɛ paa.”

¹⁰Yabese sũ frɛle Yisrael Nyameɛ kyɛ, “Ao, ahaa né ayira me, ná amaa manya aseɛ piri; ná agyina me si, ná abɔ me nwo waen afi amaneɛ ne asane nu!” Na Nyameɛ yɔle ye abisadeɛ mane ye.

¹¹Suha aliɛma bienzua Kelubo wole Mehiri bɔ ɔwa ole Eseton ne.

¹²Na Eseton wole Bete Rafa, Pasea ne Tehina bɔ ɔwa ole Yiri Nahase ne. Reka boso ama mɔ ɛne.

¹³Kenase mma mmienzua mɔ ole Otiniɛl ne Seraya; na Otiniɛl mma mmienzua mɔ ole Hatate ne Meonotae.

¹⁴Meonotae wole Ofra, na Seraya wole Yoabo bɔ yeɛ ɔkyekyele Geharasim ne. Bɛfrɛle berɛ sɔ, ofikyɛ né berɛ ama te adwiililɛfoɛ.

¹⁵Yefune awa Kalebo ye mma mmienzua mɔ ole Yiru, Ela ne Naam, na Ela awa bienzua ole Kenase.

¹⁶Yehalel mma mmienzua mɔ ole Sife, Sifa, Tiria ne Asarel.

¹⁷Ɛsra mma mmienzua mɔ ole Yeta, Merede, Efɛre ne Yalɔn. Merede gyale braa[3] na ɔne ye bɛwole Miriam, Samae ne Yisiba. Yisiba te Ɛsetemoa baba.

¹⁸Na Merede aye Yudaniɛ ne, ɔwole Yerede bɔ ɔwa ole Gedɔ ne, Heberi bɔ ɔwa ole Soko ne, yeɛ Yekutiɛl bɔ ɔwa ole Sanoa ne. [Faro awa Bitia bɔ Merede gyale ye ne, ye mma mɔ ɛne].

¹⁹Hodia aye bɔ oliɛma brasua ole Naham ne, ye mma mmienzua mɔ, bɛ boso ama ole Gaminiɛ Keila ne Maakatiniɛ Ɛsetemoa.

²⁰Simɔn mma mmienzua mɔ ole Amnɔn, Rina, Ben Hanan ne Tilɔn. Yisi mma mmienzua mɔ ole Sohete ne Ben Sohete.

²¹Yuda awa bienzua Sela, ye mma mmienzua mɔ ole Ɛre bɔ ɔwa ole Leka ne, ɔne Laada bɔ ɔwa ole Maresa ne, na ye boso ama ole ɛtenanwonɛfoɛ fekue bɔ bɛwɔ Bete Asebea ne;

²²yeɛ Yokim, Kosebafoɛ, Yoase ne Sarafo bɔ beegyale mmraa wɔ Moabo besa bɛwale Yasibu Lehem ne (sɔ dwirɛ ne wahyɛ dadaada).

²³Bɛ yeɛ bɛnwo ngukue ná bɛte Netaim ne Gedera ne. Né bɛte berɛ bɛyɔ adwuma bɛma (maen ne anu) hene.

²⁴Simeon mma mmienzua mɔ ole Nemuel, Yamin, Yaribo, Sera ne Sɔɔlo.

²⁵Sɔɔlo boso ama mɔ ole Salum, Mibesam yeɛ Misma.

²⁶Misma boso ama mɔ ole Hamuɛl, Sakure yeɛ Simei.

²⁷Simei wole mmaa mmienzua buru ne nzia, yeɛ mmrasua nzia. Nakoso oliɛma mmienzua nemɔ de, né bɛ mma mɔ banzo. Yeɛ b’abusua amukoraati, banda pee kyɛ Yudafoɛ ne.

²⁸Simei abusuafoɛ ne, né bɛtete Beɛ Hyeba, Molada, Hasa Sɔɔlo,

²⁹Bilha, Esem, Tolade,

³⁰Betuel, Hɔma, Siklage,

³¹Bete Makabote, Hasa Susim, Bete Biri ne Saaraim. Né bɛ nguro mɔ ɛne, kɔpem kyɛ Dawide oolili ɛhene ɔ.

³²Na né bɛ nguraa mɔ ole Etam, Ayin, Rimon, Tokyen yeɛ Asan; bɛte nguraa nnu,

³³yeɛ afei bɛ nguraa amukoraa bɔ bapɛ nguro nemɔ anwo bayia alaa kɔpem Baal ne. Né bɛ nguro mɔ ɛne, na bahyerɛ bɛ mmusua ne bɛ nguro nemɔ dumaa wɔ aworɛ ndoatoasoɛ ngrataa nu.

³⁴Mesobabo, Yamlɛke, Yosa bɔ ye baba ole Amasia ne,

³⁵Yowel, Yehu bɔ ye baba ole Yosibia, bɔ ye baba ole Seraya, bɔ ye baba ole Asiɛl ne,

³⁶Elionae, Yaakoba, Yesohaya, Asaya, Adiɛl, Yesimiɛl, Benaya,

³⁷Sisa bɔ ye baba ole Sifi, bɔ ye baba ole Alon, bɔ ye baba ole Yedaya, bɔ ye baba ole Simri bɔ ye baba ole Semaya ne.

³⁸Sɔ mmenia bɔ babobɔ bɛ dumaa ne, né bɛte mbanyi wɔ bɛ mmusua mɔ nu, na bɛ mmusua mmusua nemɔ tale pee.

³⁹Besili nu bɛhɔle beedwuli Gedɔ tiwaa, wɔ bɔnza ne eyia afiteleɛ so, kyɛ bɛkwaapena aleɛ bɛma bɛ nyɛmmoa mɔ.

⁴⁰Benwuni ngaka aleɛ bɔ ɔte monɛ frɔmfrɔm ɔ. Né aseɛ ne te tɛtrɛtɛɛ, yeɛ so te konn bɔ basabasa biala ɔnne so ɔ, ofikyɛ daa ne, né Ham boso ama yeɛ bɛte berɛ ɔ.

⁴¹Na Yuda hene Hesekia aberɛ so, bɛ bɔ babobɔ bɛ dumaa ye, bɛfale koɛ bɛɛtetale Ham boso ama nemɔ ne Meyunimfoɛ bɔ benwuni bɛ wɔ berɛ ne, na bɛsɛkyele b’ɛtena sua mɔ. Benuane bɛ boso maa waadwu ɛnɛ, na bɛfale b’aseɛ ne bɛtenane so, ofikyɛ benwuni kyɛ né bekonya aleɛ wɔ berɛ bɛkɔma bɛ nyɛmmoa mɔ.

⁴²Na bɛ nu ɛyaa nnu bɔ bɛte Simeonfoɛ, bɔ Yisi mma mmienzua Pelatia, Nearia, Refaya ne Yusiɛl bɛlela bɛ noa ne, bɛhɔle Sɛre bokaa ne aso.

⁴³Beehuhuni Amalɛkefoɛ ngaa bɔ bɛnwatili ne, na batena berɛ maa waadwu ɛnɛ ye.