Read Sehwi 1 Aberɛso Dwirɛ 5 Bible Online

1 Aberɛso Dwirɛ 5 - Sehwi bible

1 Aberɛso Dwirɛ 5

¹Yisrael bamuɛbaa Ruben ye boso ama mɔ. (Ye yeɛ né ɔte bamuɛbaa ɔ. Nakoso ɔnate kyɛ ɔfale efiɛ hane ɔse mba ne ati, ye bamuɛbaa dibea ne, bɛfa bɛmane Yisrael awa Yosef ye mma mmienzua mɔ. Ye sɔ ti, bɛkyerɛ aworɛ ndoatoasoɛ ne a, bangyerɛ ye dumaa kyɛ ye yeɛ ɔte bamuɛbaa ɔ.

² Ɔwɔ nu kyɛ, Yuda ɔɔyɛle titire wɔ oliɛma nemɔ anu, bɔ sona bɔ otua maen ne noa ne, ye nu yeɛ ofi wale ɔ. Nakoso bamuɛbaa dibea ne, ɔɔyɛle Yosef deɛ.)

³Yisrael bamuɛbaa Ruben mma mmienzua mɔ ole Hanoke, Palu, Hesron ne Karemi.

⁴Yowel boso ama mɔ ɛhe: Semaya, Gɔgo, Simei,

⁵Mika, Reaya, Baal,

⁶yeɛ Beera bɔ Asiria hene Tilgate Pilnese[4] hyele ye nnure fale ye hɔle ne. Ne Beera yeɛ otua Rubenfoɛ bɛ noa ɔ.

⁷Beera boso ama bɛ mmusua mmusua, bɛhale b’aworɛ ndoatoasoɛ so ne, bɛ ɛhe: Yeyiɛl yeɛ ɔla bɛ noa ɔ, Sakaria,

⁸yeɛ Bela bɔ ye baba ole Asase, bɔ ye baba ole Sema, bɔ ye baba ole Yowel bɔ né ɔte aseɛ bɔ ofi Aroye ɔkwaadwu Nebo ne Baal Meon ne aso ne.

⁹Na ɔnate kyɛ né bɛ nyɛmmoa nemɔ bata pee wɔ Gileade aseɛ so ne ati, bɛtenane eyia afiteleɛ so alaa beedwuli ɛserɛ bɔ ɔla asue Yufreti nwo ne, ye noa.

¹⁰Na Sɔɔlo aberɛ so, Rubenfoɛ bɛfale koɛ bɛɛtoale Hagritefoɛ. Rubenfoɛ lili bɛ so ngonim, na bɛɛtenane Hagritefoɛ ɛtena sua mɔ anu wɔ Gileade eyia afiteleɛ amukoraa.

¹¹Gade boso ama ne, né bɛ ne Rubenfoɛ bɛbɔ wɛen wɔ Basan aseɛ so alaa bɔ ɔkwaadwu Saleka ɔ.

¹²Né Yowel yeɛ ɔla bɛ noa ɔ, na sɛ ɔnne berɛ a, Safam yeɛ ɔwɔ berɛ ɔ, yeɛ afei Yanae ne Safate. Né bɛwɔ Basan.

¹³Na b’abusuafoɛ kyɛbɔ bɛ mmusua mmusua mɔ te ɛhe: Mikayɛl, Mesulam, Hyeba, Yorai, Yakan, Siya ne Heberi; bɛte nzoo.

¹⁴Abihail bɔ ye baba ole Huri, bɔ ye baba ole Yaroa, bɔ ye baba ole Gileade, bɔ ye baba ole Mikayɛl, bɔ ye baba ole Yesisae, bɔ ye baba ole Yahedo, bɔ ye baba ole Buse ne, ye mma mmienzua mɔ ɛne.

¹⁵Ahi bɔ ye baba ole Abidiɛl, bɔ ye baba ole Guni ne, ye yeɛ né ɔla bɛ mmusua mmusua nemɔ no ɔ.

¹⁶Né bɛtete Gileade, Basan ne ye nwo nguro mɔ so, yeɛ afei Saron aseɛ bɔ nyɛmmoa didi so ne aso kɔpem ye noa.

¹⁷Sɔ mmenia nemɔ amukoraa, Yuda hene Yotam aberɛ so, ɔne Yisrael hene Yeroboam aberɛ so, begyinane b’aworɛ ndoatoasoɛ so bɛhale bɛ.

¹⁸Rubenfoɛ, Gadefoɛ, yeɛ Manase abusua kure ne bue, né bele koɛhonɛfoɛ ahoneserɛfoɛ apee aburanna ne nna, ɛyaa nzoo ne aburasia bɔ bele buralɛ ataadeɛ ne ngrandɛ, betira agyaen, bɛse ko, bɔ basiesie bɛ nwo kyɛ koɛ ba a, bɛkɔhɔ ɔ.

¹⁹Bɛfale koɛ bɛɛtetale Hagritefoɛ, Yeture, Nafise ne Nodabo.

²⁰Nyameɛ bokale Rubenfoɛ, Gadefoɛ yeɛ Manase abusua kure ne bue maa belili Hagritefoɛ ne bɛ bɔ bɛboka bɛ so ne amukoraa so ngonim, ofikyɛ besu bɛfrɛle Nyameɛ wɔ koɛ ne anu. Nyameɛ tiele bɛ mbaeɛ, ofikyɛ bɛfale bɛ nwo bɛtole ye so.

²¹Bɛhyehyele bɛ nyɛmmoa hemɔ bɛfa bɛyɛle koɛ nu nzesadeɛ: afupɔngɔ apee aburannu, mmoaen apee ɛyaa nyɔ ne aburannu, yeɛ afunum apee nyɔ. Besa bɛhyele mmenia apee ɛyaa ko nnure.

²²Pɔfoɛ nemɔ pee totɔle, ofikyɛ Nyameɛ ho tiale bɛ, na Rubenfoɛ, Gadefoɛ, yeɛ Manase abusua kure ne bue bɛtenane pɔfoɛ nemɔ aseɛ ne aso alaa kɔpem kyɛ ebiemɔ bɛɛhyele bɛ koso nnure bɛhɔle ɔ.

²³Manase abusua kure ne bue ne, né bɛsone pee, na bɛtenane bɛpetene aseɛ ne aso fite Basan kodwu Baal Hɛmɔn, Seniri ne Hɛmɔn bokaa ne.

²⁴Ɛhemɔ yeɛ né bɛlela bɛ mmusua mmusua nemɔ noa ɔ: Efɛre, Yisi, Eliɛl, Asriɛl, Yeremia, Hodawia ne Yahediɛl. Bɛte koɛhonɛfoɛ ahoneserɛfoɛ bɔ bale dumaa ɔ, na né bɛlela bɛ mmusua mmusua nemɔ noa.

²⁵Nakoso bɛyɔle bɔne betiale bɛ nana mɔ Nyameɛ ne. Aseɛ ne aso mmenia bɔ Nyameɛ huhuni bɛ fili bɛ nyunu ne, bɛ nyameɛ nemɔ, Manasefoɛ nemɔ sɔnene bɛ.

²⁶Yiti Yisrael Nyameɛ kanyane Asiria hene Pulu bɔ besa bɛfrɛ ye Tilgate Pilnese ne, na Rubenfoɛ, Gadefoɛ ne Manase abusua kure ne bue ne, ɔhyele bɛ nnure fale bɛ ooguale Hala, Habo, Hara ne Gosan asue ne anoa, na batena berɛ maa waadwu ɛnɛ.