Read Sehwi 2 Aberɛso Dwirɛ 16 Bible Online

2 Aberɛso Dwirɛ 16 - Sehwi bible

2 Aberɛso Dwirɛ 16

¹Nana Asa tenane bia so ne, ye afoɛ bɔ ɔtɔ so aburasa ne nzia ne anu, Yisrael hene Baasa fale koɛ ɔɔtoale Yuda maen. Ɔtole fasue fale Rama nwo kyɛ ɔngɔma sona biala ngofi Yuda hene Asa aseɛ so ngofite, yeɛ ɔngɔma ebiala koso ngɔhɔ nu.

²Yeɛ Asa sesale ɛdwetɛ ne esikaa kɔkorɛ fili AWURADE awuro fotoɛ ne anu, ɔne ahemvie fotoɛ ne anu, na ɔmaa bɛɛfa bɛmane Siria hene Ben Hadade bɔ né ɔte Damasko ne. Asa tole Ben Hadade ngraa kyɛ,

³“Maa me ne wɔ yɛyɛ apam, kyɛbɔ me baba ne wɔ baba bɛyɛle apam ne. Mefa ɛdwetɛ ne esikaa kɔkorɛ mebrɛ wɔ. Yiti kɔ ná kɔpɛ apam bɔ ɛne Yisrael hene Baasa bayɛ ne anu, amaa ɔnate so wayakyi koɛ bɔ ɔfa taataa me ne.”

⁴Ben Hadade lele Nana Asa dwirɛ ne tole nu, na ɔsomane ye safohene mɔ maa bɛfale koɛ bɛɛtoale Yisrael nguro mɔ. Bɛho belili Yiyon, Dan, Abel Mayim, ɔne Nafetali nguro bɔ besie nningyein wɔ so ne amukoraa so ngonim.

⁵Baasa tele bɔ wasi ne pɛ, ɔyakyili etualɛ bɔ watua Rama kuro ne.

⁶Yeɛ Nana Asa maa bɛboale Yudafoɛ amukoraati bɛ noa, na nyɔboɛ ne ndaboa bɔ né Baasa ɔfa otua Rama kuro ne, bɛsesa bɛhɔle. Na Nana Asa fa kyekyele Geba ne Misepa.

⁷Sɔ mmerɛ ne, Hanani bɔ ɔte sona bɔ ɔse ase ne, ɔhɔle Yuda hene Asa berɛ oosele ye kyɛ, “Ɔnate kyɛ afa wɔ nwo ato Siria hene so, na amva wɔ nwo ando AWURADE wɔ Nyameɛ so ne ati, ngonim bɔ ahaa ekoli ye wɔ Siria hene koɛhonɛfoɛ nemɔ aso ne, wabɔ wɔ.

⁸Yitiopia ne Libia koɛhonɛfoɛ nemɔ, aso né bɛnzone pee? Bɛ teaseɛnam mɔ ne bɛ pɔngɔhanɛfoɛ mɔ, aso né bɛnzone pee? Nakoso ɔnate kyɛ ɛfale wɔ nwo tole AWURADE so ne ati, ɔfale bɛ wurale wɔ sa.

⁹Ofikyɛ AWURADE nye bɔ mborɔkaa wɔ aseɛ ye aso amukoraa, kyɛ bɛ bɔ bedi nahorɛ bɛma ye ne, okogyina bɛ si. Bɔ ayɔ ye, ali ngwaseasɛm. Yiti ofi sɔ mmerɛ ye bɔ ɔkɔ ɔ, koɛ kɔtaataa wɔ.”

¹⁰Asa fɛle biaa bɔ ɔse ase ne aso yaa, na Asa bɔle ye panwu fale ye tole kuku nu, ofikyɛ edwirɛ ne mane Asa fɛle yaa paa. Afei sɔ mmerɛ ne, Asa tanene maen ne anu ama nemɔ bie nye.

¹¹Asa nnwumaa bɔ ɔyɔle, fi ye ahyɛaseɛ bɔ ɔkwaadwu ye ayieleɛ, bahyerɛ ye wɔ Yuda ne Yisrael ahemvo nwo dwirɛ nwomaa ne anu.

¹²Asa lili bia ne, ye afoɛ aburasa ne ngona ne anu, anwonyerɛ bie yɛle ye gya tasaa nemɔ. Anwonyerɛ ne anu yɛle se paa. Nakoso ye anwonyerɛ nu ne po, wambena AWURADE si atee, na mmom safoɛ mɔ ngome yeɛ ɔpenane bɛ mmokalɛ ɔ.

¹³Yeɛ Asa toale ye mbanyi mɔ, wɔ mmerɛ bɔ né wali bia afoɛ aburanna ne ko ɔ.

¹⁴Asieleɛ kumaa bɔ wapɛ wato berɛ wɔ Dawide kuro kyɛ owu a besie ye wɔ nu ne, besiele ye wɔ nu. Mba bɔ bɛdedale ye wɔ so ne, ayirefona ahoroɔ bɔ bɛfa bɛpetene so ne, sona bɔ ole ye nwo nimdeɛ yeɛ ɔfrafrale nningyein fa yɔle ɔ. Na bɛsɔle buruburugya bɛfa bɛyɛle ye sɛen.