Read Sehwi 2 Aberɛso Dwirɛ 22 Bible Online

2 Aberɛso Dwirɛ 22 - Sehwi bible

2 Aberɛso Dwirɛ 22

¹Yerusalemfoɛ fale Yehoram ɔwa bienzua bɔ ɔte kãa paa Ahasia sili ɛhene maa olili ye bia, ofikyɛ koɛhonɛfoɛ bɔ bɛ ne Arabofoɛ nemɔ wale asikyeleɛ ne anu ne, behuhuni Yehoram mma mmienzua mbanyi nemɔ amukoraa. Yiti Yehoram awa Ahasia lili Yuda hene.

²Ahasia lili hene ne, né wali afoɛ aburanna ne nyɔ. Olili hene afoɛ ko wɔ Yerusalem. Oni ole Atalia bɔ ɔte Omri ye anomaa ne.

³Ye koso, ɔyɔle bɔne bɔ Ahabo boso ama bɛyɔle ne bie, ofikyɛ né oni yeɛ osi ye adua wɔ bɔnelilɛ nu ɔ.

⁴Ɔyɔle bɔ ɔte bɔne wɔ AWURADE nyunu ɔ, kyɛbɔ Ahabo boso ama bɛyɔle ne ala. Ofikyɛ ye baba wue asi ne, Ahabo boso ama yeɛ bɛyɛle ye foɛtulɛfoɛ ɔ. Na bɛ foɛ bɔ betuli ye ne, wammoka ye koraa.

⁵Otiele bɛ foɛtulɛ, na ɔne Yisrael hene Yehoram bɔ yeɛ ɔte Ahabo awa ne, bɛfale koɛ bɛɛtetale Siria hene Hasael wɔ Ramote Gileade. Siriafoɛ ne purale Yehoram.

⁶Epuralɛ bɔ Siriafoɛ bepurale Yehoram wɔ Rama, mmerɛ bɔ ɔne Siria hene Hasael bɛhone ne ati, osa wale Yesreel kyɛ ɔbaatoto ye nwo anwonyerɛ. Na Yuda hene Ahasia[2] bɔ ye baba ole Yehoram ne, ɔhɔle ɔɔpasale Ahabo awa Yehoram nwo wɔ Yesreel, ofikyɛ né Yehoram ɔnde apɔ.

⁷Nakoso né Nyameɛ wahyehyɛ kyɛ ɔnate sɔ pasalɛ bɔ Ahasia ɔkwaapasa Yehoram nwo ne aso, ɔkɔmaa Ahasia ye ahennie kɔbɔ ase. Ofikyɛ mmerɛ bɔ ɔhɔle berɛ ne, ɔne Yehoram beeyiale Nimisi awa Yehu, bɔ AWURADE atu ye asie berɛ kyɛ ohũhũ Ahabo boso ama ne.

⁸Mmerɛ bɔ Yehu okũkũ Ahabo boso ama nemɔ nen, ɔɔtole Yuda mbanyi ɔne Ahasia aliɛma mmienzua mɔ bɛ mma mmienzua mɔ bɔ bɛso Ahasia ɔ, na ohuhuni bɛ.

⁹Yehu penane Ahasia. Né Ahasia waafea wɔ Samaria. Bɛɛhyele ye bɛbrɛle Yehu, na ohuni ye. Besiele ye, ofikyɛ bɛhane kyɛ, “Yehosafate bɔ ɔyele ye kunu sole AWURADE ne, ye anomaa ɛne.” Na Ahasia boso ama nemɔ, bannya ebiala bɔ ɔkɔhora koli bia ne kobu maen ne ɔ.

¹⁰Mmerɛ bɔ Ahasia maame Atalia nwuni kyɛ ɔwa Ahasia wawu ne, ɔhyɛle ye bo kyɛ okũkũ Yuda nnehyeɛ nemɔ amukoraa.

¹¹Nakoso Nana Ahasia awa brasua Yehosabeate fale Ahasia awa bienzua Yoase nwatili. Ɔfale ye nwati fili Nana Ahasia mma bɔ né bɛpena bɛ beku bɛ nemɔ anu, na ɔfale ye ne ye neafoɛ ɔɔfeale pumbu bie anu. Yiti Nana Yehoram awa brasua Yehosabeate bɔ ɔte ɔsɔfo Yehoada aye ne, ɔfale Yoase ɔɔfeale bɔ Atalia wanya ye wangu ye ɔ, ofikyɛ né Yehosabeate te Ahasia aliɛma brasua.

¹²Ɔfale Yoase feale Nyameɛ awuro berɛ afoɛ nzia. Sɔ mmerɛ ne, né Atalia yeɛ obu maen ne ɔ.