Read Sehwi 2 Aberɛso Dwirɛ 23 Bible Online

2 Aberɛso Dwirɛ 23 - Sehwi bible

2 Aberɛso Dwirɛ 23

¹Nakoso ye afoɛ nzoo ne anu, Yehoada mane ye hue yɛle se, na ɔne koɛhonɛfoɛ ɛyaa so safohene mɔ bɛyɛle apam. Bɛ ole Yehoram awa Asaria, Yehohanan awa Yismael, Obɛde awa Asaria, Adaya awa Maaseya, yeɛ Sikri awa Elisafate.

²Behyini Yuda maen nu nekaa biala, na bɛboaboale Lewifoɛ ne Yisrael mmusua mmusua mbanyi noa befili Yuda nguro amukoraa so. Na bɛhɔle Yerusalem.

³Badwa ne amukoraati bɛ ne Nana Yoase yɛle apam wɔ Nyameɛ awuro berɛ. Na Yehoada sele bɛ kyɛ, “Nana Ahasia awa ne ɛhe oo! Di bia kyɛbɔ AWURADE hyɛle bɔ fale Dawide boso ama nwo ne ala.”

⁴Ɔfale ahyɛdeɛ mane bɛ kyɛ, “Asɔfo ne Lewifoɛ, ɛmɔ nu nza nu ngyɛmuɛ ko bɔ odwu afofikyẽa a, ɛmɔkɔ adwuma ne, odi kyɛ ɛmɔwɛne pambim ne.

⁵Nza nu ngyɛmuɛ ko bieku odi kyɛ bɛwɛne ahemvie ne, yeɛ nza nu ngyɛmuɛ ko koso odi kyɛ begyinagyina fapem pambim ne anwo. Na odi kyɛ maen ne amukoraa begyina AWURADE awuro ne aluo berɛ.

⁶Onni kyɛ ɛ́mɔma ebiala wura AWURADE awuro berɛ, sana asɔfo nemɔ ne Lewifoɛ bɔ bɛyɔ ɛsɔnenɛ adwuma nemɔ ala. Bɛ de bɛkɔhora bekowura nu, ofikyɛ bɛ de bɛte krongron. Nakoso mmenia ngaa nemɔ de, odi kyɛ bedi AWURADE ahyɛdeɛ ne aso.

⁷Odi kyɛ Lewifoɛ nemɔ bɛpɛ ɛhene ne anwo beyia bɔ ebiala tira akodeɛ ɔ. Na ebiala bɔ okowura AWURADE awuro berɛ nen, odi kyɛ beku ye. Odi kyɛ ɛmɔ ne ɛhene ne bɛkɔ nekaa biala bɔ ɔkɔhɔ ɔ.”

⁸Lewifoɛ nemɔ ne Yudafoɛ amukoraa bɛyɔle kyɛbɔ ɔsɔfo Yehoada hyɛle bɛ ne ala. Ebiala ye mmenia bɔ bɛkɔ adwuma afofikyẽa ne, ɔne bɛ bɔ bɛngɔ adwuma afofikyẽa ne, ɔfale bɛ wale, ofikyɛ ɔsɔfo Yehoada wanye kure biala wamvi nu.

⁹Nana Dawide pealɛɛ mɔ ne buralɛ ataadeɛ ne akokyɛm mɔ bɔ né bafa basie wɔ Nyameɛ awuro berɛ ne, ɔsɔfo Yehoada fa mane safohene nemɔ.

¹⁰Ɔmane mmenia nemɔ amukoraa begyinagyinane bɔ ebiala tira ye akodeɛ ɔ, fi awuro ne ngwaen kɔka ye sorɔ, afɔleɛ bokyea ne ɔne awuro ne anwo, kyɛ bɛwɛne Nana Yoase.

¹¹Afei Yehoada yele Nana Ahasia awa Yoase fitele. Ɔfale ahennie abotire bɔle ye, na ɔfale Adanzeɛ nwomaa ne mane ye. Bɛbɔle ye ohomoo, na Yehoada ne ye mma bɛfale ɛpopalɛ ngoo bɛpopale ye. Na bɛbɔle ese kyɛ, “Nana, wɔ ngoa so oo!”

¹²Atalia tele kyɛ maen ne behuru bɛpepe bɛbɔ ese bɛyɛ Nana Yoase mmo. Na ɔhɔle bɛ berɛ wɔ AWURADE awuro berɛ.

¹³Ɔtole ye nye neane, na onwuni kyɛ Nana Yoase gyi ye simbini ne anwo wɔ anoa nu berɛ. Né safohene nemɔ ne totorobɛndohulɛfoɛ begyigyi Nana Yoase anwo berɛ, bɔ maen ne anu mmenia amukoraa behu totorobɛndo bedi ahurusi ɔ. Né edweintolɛfoɛ betiratira sangoo beli maen ne anyunu maa bɛbɔ ese. Na Atalia sunzuale ye bɔbɔ ye tena nu teane nu kyɛ, “Bayɛ lɔen oo! bayɛ lɔen oo!”

¹⁴Yeɛ ɔsɔfo Yehoada hyɛle safohene mɔ bɔ bɛlela koɛhonɛfoɛ nemɔ noa ne kyɛ, “Ɛmɔhwe ye bɛfa koɛhonɛfoɛ nemɔ anu befite, na ebiala bɔ okogyina ye si ne, ɛ́mɔfa ngrandɛ behũ ye.” Na ɔsɔfo ne hane kyɛ, “Nnɛmaa ɛmɔku ye wɔ AWURADE awuro berɛ.”

¹⁵Yiti bɛhyele ye, na bɛfale ye bɛfale atee bɔ mbɔngɔ fa so bɛkɔ ahemvie berɛ ne aso, na berɛ yeɛ behuni ye ɔ.

¹⁶Yehoada yɛle apam tole ye ne maen ne amukoraa ne Nana Yoase b’afia, kyɛ odi kyɛ bɛyɛ AWURADE maen.

¹⁷Yeɛ maen ne anu mmenia amukoraa bɛhɔle Baal asɔneyɛɛ so beebubuli bosoen ne beguale ase. Ye afɔleɛ bokyea mɔ ne ye amoen mɔ koso, bebubuli bɛ nu pasapasa. Behuni Baal kɔmeɛ Matan wɔ afɔleɛ bokyea nemɔ anyunu.

¹⁸Na Lewifoɛ bɔ bɛte asɔfo bɔ Dawide ahyehyɛ ato berɛ kyɛ bɛnea AWURADE awuro ne aso ne, Yehoada fale AWURADE awuro berɛ adwuma ne wurale bɛ sa, kyɛ bɛfa ahurusililɛ ne edweintolɛ bɛbɔ naen yeralɛ afɔleɛ bɛma AWURADE, kyɛbɔ bahyerɛ ye wɔ Mose mmeraa ne anu, ɔne kyɛbɔ Dawide ahyehyɛ ato berɛ ne.

¹⁹Ɔmane anoa awɛmvoɛ nemɔ gyinagyinane AWURADE awuro berɛ anoa nemɔ anoa, kyɛ ebiala bɔ ye nwo agua fiɛ ne, ɔnzɛ kyɛ bɛmaa owura AWURADE awuro berɛ.

²⁰Ɔsɔfo Yehoada tuli safohene nemɔ, atitirefoɛ nemɔ, maen ne aso amradofoɛ nemɔ, bɛ ne maen ne anu mmenia amukoraa, maa bɛɛfale Nana Yoase befili AWURADE awuro dɔ bɛwale. Na bɛfale anoa piri ne anu bɛhɔle ahemvie berɛ. Bɛfale Nana Yoase besiele ahennie bia ne aso.

²¹Yiti maen ne anu mmenia amukoraa belili ahurusi. Bɛfale ngrandɛ behuni Atalia wɔ ahemvie berɛ beyiele ne, ye si ye, kuro ne anu dwole fɔnwoo.