Read Sehwi 2 Aberɛso Dwirɛ 27 Bible Online

2 Aberɛso Dwirɛ 27 - Sehwi bible

2 Aberɛso Dwirɛ 27

¹Yotam lili hene ne, né wali afoɛ aburanyɔ ne nnu, na olili hene afoɛ buru ne nzia wɔ Yerusalem. Oni ole Sadoke awa Yerusa.

²Ɔyɔle bɔ ɔtengyɛ wɔ AWURADE nyunu ɔ, kyɛbɔ ye baba Yusia yɔle ne ala. Nakoso ye de, wangɔ AWURADE asɔneyɛɛ sua ne anu wangɔammɔ afɔleɛ. Nakoso maen ne hɔle so bɛyɔle bɔ ɔndengyɛ ɔ.

³Yotam sili AWURADE awuro berɛ sorɔ dɔ pambim ne, na fasue bɔ ɔwɔ Ofel bokaa ne aso ne, ɔtoale so.

⁴Afei koso, ɔkyekyele nguro wɔ Yuda mmokaa aseɛ nemɔ aso, na osisili sua bɔ bɛ nwo yɛ se ɔ ne abandenden wɔ ɛhɔayeɛ nu mmokaa nemɔ aso.

⁵Ɔne Amonfoɛ bɛ hene bɛhone koɛ, na olili bɛ so ngonim. Sɔ afoɛ ne, Amonfoɛ mane ye ɛdwetɛ talɛnde ɛyaa ko, atokoɔ olonka apee buru, yeɛ ayuo olonka apee buru. Afoɛ bɔ ɔtɔ so nyɔ ne, ɔne bɔ ɔtɔ so nza ne anu, sɔ ala yeɛ Amonfoɛ betua bɛmane ye ɔ.

⁶Yiti Yotam nyane tumi, ofikyɛ ɔfale AWURADE ye Nyameɛ atee so.

⁷Afei Yotam nwo dwirɛ ngaa ne, ye koɛ bɔ ɔhone amukoraa, ɔne bɔ ɔyɔle amukoraa, tie, bahyerɛ ye wɔ Yisrael ne Yuda ahemvo nwo dwirɛ nwomaa ne anu.

⁸Yotam lili hene ne, né wali afoɛ aburanyɔ ne nnu, na olili hene afoɛ buru ne nzia wɔ Yerusalem.

⁹Yotam toale ye mbanyi mɔ. Besiele ye wɔ Dawide kuro, na ɔwa Ahase lili ye bia.