Read Sehwi 2 Aberɛso Dwirɛ 31 Bible Online

2 Aberɛso Dwirɛ 31 - Sehwi bible

2 Aberɛso Dwirɛ 31

¹Afei belili aluolue ne beyiele ne, Yisraelfoɛ bɔ né bayia berɛ ne amukoraa, bɛhɔle Yuda nguro nemɔ aso beebubuli mmosoen bonima nemɔ beguale, bɛpepɛle Asera dosii nemɔ beguale, na bɛsɛkyele asɔneyɛɛ nemɔ ne afɔleɛ bokyea nemɔ wɔ Yuda ne Benyamin ne Efraim ne Manase amukoraa, kɔpem kyɛ bɛsɛkyele bɛ mukoraa ɔ. Afei Yisraelfoɛ amukoraa besa bɛhɔle bɛ nguro nemɔ aso, na bɛ nu biala hɔle ye aseɛ so.

²Hesekia hyehyɛle asɔfo nemɔ ne Lewifoɛ nemɔ anu kure kure fale ebiala ye adwuma wurale ye sa; kyɛ asɔfo nemɔ ne Lewifoɛ nemɔ bɛ́bɔ naen yeralɛ afɔleɛ ne asomdwee afɔleɛ, kyɛ bɛ́yɔ ɛsɔnenɛ adwuma wɔ AWURADE asikyeleɛ pambim nemɔ anu, ná bɛ́ye AWURADE ayɛ bɛ́la ye ase.

³Nningyein bɔ Nana Hesekia ye fili ye bɔbɔ ye agyapadeɛ nu mane ne, ɔnwa bɛ́fa bɛ́bɔ naen yeralɛ afɔleɛ hemɔ: ngyerɛmɔ naen yeralɛ afɔleɛ ne nɔsoa deɛ, afofikyẽa naen yeralɛ afɔleɛ ne ɛsraen foforɛ naen yeralɛ afɔleɛ, ɔne aluolue bɔ bahyehyɛ bato berɛ nemɔ bɛ naen yeralɛ afɔleɛ, kyɛbɔ bahyerɛ ye wɔ AWURADE mmeraa ne anu ne.

⁴Ɔfale ahyɛdeɛ mane bɛ bɔ bɛte Yerusalem ne kyɛ nningyein bɔ odi kyɛ bɛfa bɛma asɔfo mɔ ne Lewifoɛ mɔ ne, bɛ́fa bɛ́ma bɛ, amaa ɔnate so asɔfo nemɔ ne Lewifoɛ nemɔ bahora batu bɛ nwo basie berɛ bama AWURADE mmeraa ne.

⁵Yisraelfoɛ tele sɔ dwirɛ ne pɛ, bɛfale sɔ nningyein hemɔ pee bɛwale: b’aburoo bɔ bali moa babu ɔ, nzaa, ngoo, woɛ, fieso nningyein amukoraati, na afei bɛfale nikyee biala nu buru nu ngyɛmuɛ ko pee bɛwale.

⁶Yisraelfoɛ ne Yudafoɛ bɔ bɛtete Yuda nguro nemɔ aso ne, bɛfale nandwie ne mmoaen buru nu ngyɛmuɛ ko, yeɛ nningyein krongron bɔ batu basie berɛ bama AWURADE bɛ Nyameɛ ne buru nu ngyɛmuɛ ko bɛwale, na bɛboale nningyein ne noa kure kure.

⁷Bosome bɔ ɔtɔ so nza ne anu yeɛ bɛhyɛle ye bo kyɛ bɛboa nningyein ne noa kure kure ɔ, na beyiele ye noa boa bosome nzoo ne anu.

⁸Mmerɛ bɔ Hesekia ne mbanyi nemɔ bɛwale benwuni nningyein kure kure nemɔ nen, bɛyele AWURADE ayɛ, na beyirale ye maen Yisrael.

⁹Nningyein bɔ baboaboa ye noa kure kure ne, Hesekia bisale asɔfo nemɔ ne Lewifoɛ nemɔ ye nwo dwirɛ.

¹⁰Yeɛ ɔsɔfo panyi Asaria bɔ ɔte Sadoke bosoniɛ ne, obuale Hesekia kyɛ, “Ofi mmerɛ bɔ bɛhyɛle ye bo bɛfale sɔ nningyein nemɔ bɛwale AWURADE awuro ne, yanya aleɛ yali maa wabu yɛ so, ofikyɛ AWURADE ayira ye maen, amaa ɔnate ye sɔ ti yeɛ yanya nningyein pee maa wabu yɛ so ye.”

¹¹Yeɛ Hesekia fale ahyɛdeɛ mane bɛ kyɛ besiesie sua bɔ bɛfa nningyein besie nu ɔ wɔ AWURADE awuro berɛ. Na besiesiele sua nemɔ.

¹²Buru nu ngyɛmuɛ ko ne, ɔne nningyein bɔ batu basie berɛ bama AWURADE bɔ odi kyɛ ebiala fa ba ne, belili nahorɛ bɛfa bɛwale. Panyi bɔ né ɔnea so ole Lewiniɛ Konania. Sɛ ɔnne berɛ a, oliɛma Simei yeɛ ɔwɔ berɛ ɔ.

¹³Nana Hesekia ne Nyameɛ awuro panyi paa Asaria bɛyele Yehiel, Asasia, Nahate, Asahel, Yerimote, Yosabade, Eliɛl, Yismakia, Mahate ne Benaya, kyɛ bɛboka Konania ne oliɛma Simei maa bɛnea nningyein ne aso.

¹⁴Akyɛdeɛ afɔleɛ bɔ bɛbɔ bɛma Nyameɛ ne, nningyein bɔ batu basie berɛ bama AWURADE ne hyɛlɛ ne, yeɛ afɔleɛ krongron nningyein ne hyɛlɛ ne, Lewiniɛ Yimina ɔwa Kore bɔ ɔte eyia afiteleɛ pambim so neafoɛ ne, ye yeɛ né owura ye sa ɔ.

¹⁵Eden, Miniamin, Yesua, Semaya, Amaria ne Sekania yeɛ belili nahorɛ bɛbokale ye wɔ asɔfo nemɔ bɛ nguro nemɔ aso ɔ. Bɛbokale ye maa ɔhyɛle nningyein ne mane b’eliɛma asɔfo nemɔ kure kure, mbanyi ne ngwadaa.

¹⁶Bɛhyɛle nningyein ne bɛmane mmienzua bɔ bali ofi afoɛ nza bɔ ɔkɔ ɔ, ɔmva ye nwo kyɛbɔ b’aworɛ ndoatoasoɛ bɔ baha bɛ ne, ɔte ɔ. Nningyein ne, bɛhyɛle bɛmane bɛ bɔ né bɛba AWURADE asɔneyɛɛ sua ne anu bɛbayɔ bɛ daa daa adwuma, kyɛbɔ b’asɔfo kure te ɔ.

¹⁷Bɛhyerɛle asɔfo nemɔ dumaa kyɛbɔ bɛ nana mɔ sasofoɛ te ɔ. Lewifoɛ bɔ bali ofi afoɛ aburanyɔ bɔ ɔkɔ ne, bɛhyerɛle bɛ dumaa kyɛbɔ b’adwuma bɔ owura bɛ sa ɔne b’asɔfo abusua si te ɔ.

¹⁸Bɛhyerɛle mmenia hemɔ amukoraa bɛ dumaa: asɔfo nemɔ ne bɛ mma mmaa mmaa mɔ, bɛ ye mɔ, yeɛ bɛ mma mmienzua ne bɛ mma mmrasua. Ofikyɛ né bali nahorɛ bapete bɛ nwo.

¹⁹Na Aarɔn boso ama bɔ bɛ yeɛ bɛte asɔfo, bɔ né bɛtete aseɛ bɔ wapɛ bɛ nguro nemɔ anwo bayia ne aso ne, mmenia bɔ babɔ bɛ dumaa bafa adwuma ne bawura bɛ sa ne, né odi kyɛ bɛkyɛ nningyein ne bie bɛma asɔfo nemɔ anu bienzua biala ɔne Lewiniɛ biala bɔ bahyerɛ ye dumaa ɔ.

²⁰Hesekia yɔle sɔ wɔ Yuda amukoraa, na ɔyɔle bɔ ɔte paa, ná ɔtengyɛ, ná ɔte nahorɛ wɔ AWURADE ye Nyameɛ nyunu ɔ.

²¹Na nikyee biala bɔ ɔyɔle ye wɔ Nyameɛ awuro berɛ ɛsɔnenɛ nu, ɔne bɔ ogyinane mmeraa ne mmeraa dwirɛ ne aso yɔle kyɛ ɔfa ɔso ye Nyameɛ ne, ofiane ye kunu ɔyɔle, na oyiele ye yé.