Read Sehwi 2 Aberɛso Dwirɛ 34 Bible Online

2 Aberɛso Dwirɛ 34 - Sehwi bible

2 Aberɛso Dwirɛ 34

¹Yosia lili hene ne, né wali afoɛ mmɔtwɛ. Olili hene afoɛ aburasa ne ko wɔ Yerusalem.

²Ɔyɔle bɔ ɔtengyɛ wɔ AWURADE nyunu ɔ, na atee bɔ ye Nana Dawide fale so sole Nyameɛ ne, so ala yeɛ ye koso ɔfale ɔ. Wammakye wamva bɛen anaa famaa.

³Nana Yosia lili hene ne, ye afoɛ mmɔtwɛ ne anu bɔ né ɔtɛte abɛɛmaa ne, ɔhyɛle ye bo kyɛ ɔso ye nana Dawide Nyameɛ ne. Ye afoɛ buru ne nyɔ ne anu, ɔhyɛle ye bo tutuli ɛhemɔ bo fili Yuda ne Yerusalem: asɔneyɛɛ mɔ, bosoen Asera dosii mɔ, yeɛ amoen bɔ base ne amoen bɔ bahuro nikyee bafa bayɔ ɔ.

⁴Ye bɔbɔ ɔneane maa bebubuli Baal afɔleɛ mmokyea nemɔ, na ɛyɛɛ afɔleɛ mmokyea bɔ bɛwɔ asɔneyɛɛ nemɔ anwo ne, obubuli bɛ. Obubuli bosoen Asera dosii mɔ ne amoen bɔ base ne amoen bɔ bahuro nikyee bafa bayɔ ɔ pasapasa. Otini bɛ muhumuhu, na ɔto petene mmenia bɔ bɛbɔle afɔleɛ wɔ so nemɔ b’asieleɛ so.

⁵Ahɔmeɛ nemɔ bɛ mmowue ne, ɔyerale bɛ wɔ afɔleɛ mmokyea ne aso. Ɔyɔle sɔ nningyein hemɔ amukoraa, na ɔnate so ɔfa petene Yuda ne Yerusalem nwo.

⁶Nguro bɔ bɛwɔ Manase, Efraim ne Simeon alaa bɔ ɔkwaadwu Nafetali, ɔne kurofoen mɔ bɔ bapɛ bɛ nwo amukoraa bayia nemɔ anu,

⁷obubuli asɔneyɛɛ mmokyea nemɔ guale, ɔnyokone Asera dosii nemɔ ne amoen nemɔ muhumuhu, na ɛyɛɛ afɔleɛ mmokyea bɔ bɛwɔ Yisrael maen nu amukoraa koso, ɔsɛkyele bɛ pasaa. Afei osa hɔle Yerusalem.

⁸Nana Yosia lili hene ne, ye afoɛ bɔ ɔtɔ so buru ne mmɔtwɛ ne anu, ɔpetene aseɛ ne ne AWURADE awuro ne anwo yiele ne, ɔfa wurale Asalia awa Safan, Maaseya bɔ ɔte kuro berɛ amrado ne, yeɛ Yoahase awa Yoa bɔ ɔte abakɔsɛm ahyerɛlɛniɛ ne, bɛ sa kyɛ AWURADE ye Nyameɛ awuro ne, bɛ́yɔ ye yé.

⁹Bɛhɔle ɔsɔfo panyi Hilkia berɛ. Na esikaa bɔ bafa bawa Nyameɛ awuro ne, bɔ Lewifoɛ bɔ bɛte anoa awɛmvoɛ ne, badide bafi Manase ne Efraim ne Yisraelfoɛ ngaa amukoraa ne Yuda ne Benyamin amukoraa ne Yerusalemfoɛ berɛ ne, bɛfa bɛmane ye.

¹⁰Adwumayɔlɛfoɛ bɔ bɛnea AWURADE awuro adwuma ne aso ne, bɛfale esikaa ne bewurale bɛ sa. Na adwumayɔlɛfoɛ bɔ né bɛyɔ AWURADE awuro ne yé ne, bɛfale sɔ esikaa ne bɛyɔle AWURADE awuro ne yé maa osili ye daa nu.

¹¹Bɛfa bɛmane bakaa dwumvoɛ nemɔ ne suasilɛfoɛ nemɔ, kyɛ bɛ́fa bɛ́tɔ nyɔboɛ bɔ badwa ɔ, mmakaa bɔ bɛfa bɛbɔ sua so ɔ, ɔne sua mbuna bɔ Yuda ahemvo mɔ bamaa wasɛkye ne.

¹²Mmenia ne yɔle adwuma ne nahorɛ nu. Na Lewifoɛ hemɔ yeɛ betuli bɛ kyɛ bɛnea bɛ so ɔ: Yahate ne Obadia bɔ bɛte Merari boso ama, yeɛ Sakaria ne Mesulam bɔ bɛte Kohate boso ama ɔ. Lewifoɛ biemɔ bɔ bɛse sangoo bɔ paa ɔ,

¹³bɛ yeɛ né bɛnea bɛ bɔ bɛsoasoa nningyein ɔne bɛ bɔ bɛyɛ adwuma ahoroɔ nemɔ aso ɔ. Né Lewifoɛ ne biemɔ te ahyerɛlɛfoɛ, mbanyi ne anoa awɛmvoɛ mɔ.

¹⁴Esikaa bɔ bɛfa bɛhɔle AWURADE awuro berɛ ne, mmerɛ bɔ bɛkwaaye bɛba ne, ɔsɔfo Hilkia nwuni AWURADE mmeraa nwomaa bɔ AWURADE nate Mose so fa mane bɛ ne.

¹⁵Yeɛ Hilkia sele ahyerɛlɛniɛ Safan kyɛ, “Manwu mmeraa nwomaa ne wɔ AWURADE awuro berɛ.” Na Hilkia fale nwomaa ne mane Safan.

¹⁶Yeɛ Safan fale nwomaa ne brɛle Nana Yosia, na ɔbɔle Nana amaneɛ kyɛ, “Adwuma amukoraa bɔ afa awura wɔ somvoɛ mɔ sa ne, begu so bɛyɔ.

¹⁷Esikaa bɔ benwuni ye wɔ AWURADE awuro berɛ ne, baye ye mukoraati bafa bawura mmenia bɔ bɛnea adwuma ne aso ne, ɔne adwumayɔlɛfoɛ nemɔ, bɛ sa.”

¹⁸Yeɛ ahyerɛlɛniɛ Safan bɔle Nana Yosia amaneɛ kyɛ, “Ɔsɔfo Hilkia wafa nwomaa bie wama me.” Afei Safan kengale nwomaa ne hyirele Nana Yosia.

¹⁹Nana Yosia tele mmeraa ne anu dwirɛ pɛ, osunzuale ye bɔbɔ ye ndaadeɛ nu.

²⁰Yeɛ Nana Yosia fale ahyɛdeɛ mane ɔsɔfo Hilkia, Safan awa Ahikam, Mika awa Abedon, ahyerɛlɛniɛ Safan, ɔne Nana somvoɛ Asaya kyɛ,

²¹“Nwomaa bɔ banwu ye ne, nu dwirɛ ne, ɛmɔhɔ AWURADE berɛ beebisa bɛma me ne mmenia bɔ baha wɔ Yisrael ne Yuda ne. AWURADE afɛ yɛ so yaa piri paa, ofikyɛ yɛ nana mɔ bandie AWURADE dwirɛ, yeɛ edwirɛ amukoraa bɔ bahyerɛ ye nwomaa he anu ne, banni so.”

²²Yiti Hilkia ne mmenia bɔ Nana Yosia somane bɛ ne, bɛhɔle ngɔmhyɛlɛniɛ brasua Hulda berɛ. Ohu ole Salum bɔ ye baba ole Tokate bɔ ye baba ole Hasera bɔ ɔnea asɔfo mɔ bɛ ndaadeɛ so ne. Né Hulda te Yerusalem borɔnoɛ foforɛ paa ne aso, na berɛ yeɛ bɛhɔle beebisale Nyameɛ ye noa dwirɛ ɔ.

²³Na Hulda fa tole bɛ nyunu kyɛ, “AWURADE Yisrael Nyameɛ nwa: Ɛ́mɔhã behyire biaa bɔ ɔsomane ɛmɔ wɔ me berɛ ne kyɛ,

²⁴AWURADE nwa nyoo: Nwomaa bɔ bakenga bahyire Yuda hene ne, ɛnomalɛ amukoraa bɔ bahyerɛ ye wɔ nu ne, ngogyina so ngɔfa ye nwo musue ngɔto maen he ɔne nu ama so.

²⁵Ofikyɛ bapo me, bayera ɛyɛɛ bama nyameɛ foforɛ mɔ, na ɔnate so bafa bɛ sa noa adwuma mukoraa bawura me apue. Yiti mafɛ maen ye aso yaa piri paa, bɔ m’ahone ngɔtɔ nzue nu ɔ.

²⁶Nakoso Yuda hene bɔ ɔsomane ɛmɔ kyɛ ɛmɔɔbisa AWURADE noa dwirɛ ne de, ɛ́mɔhã behyire ye kyɛ, AWURADE Yisrael Nyameɛ nwa: Ɔfa edwirɛ bɔ ate ne anwo ne,

²⁷mmerɛ bɔ ɛtele ye dwirɛ bɔ ɔhã fale maen he ɔne nu ama nwo ne, ɔnate kyɛ enuni wɔ nwo ná ɛbrɛle wɔ nwo ase wɔ Nyameɛ nyunu, ná abrɛ wɔ nwo ase wɔ me nyunu, asunzua wɔ ndaadeɛ nu, ná asu wɔ me nyunu ne ati, me koso mate bɔ ahã ne; AWURADE noa dwirɛ ɛne.

²⁸Yiti tie, ngɔmaa ɛkɔɔtoa wɔ mbanyi mɔ, na ngɔmaa ekowu asomdwee nu kɔɔla wɔ kumaa nu. Na musue amukoraa bɔ ngɔprapra ngogua maen he ne nu ama aso ne, wɔ de wɔ nye ngonwu bie.” Na besa bɛfale edwirɛ ne bɛɛbɔle Nana Yosia amaneɛ.

²⁹Afei Nana Yosia tole ye sa frɛle Yuda mbanyi amukoraa, yeɛ Yerusalem mbanyi amukoraa maa beeyiale nu wɔ ye nyunu.

³⁰Na ɔhɔle AWURADE awuro berɛ. Ɔne mmenia hemɔ yeɛ bɛhɔle ɔ: Yudafoɛ amukoraa, Yerusalemfoɛ amukoraa, asɔfo, Lewifoɛ ne maen ne amukoraa, atitire mɔ ne kwahweabaa mɔ. Na apam nwomaa bɔ benwuni ye wɔ AWURADE awuro berɛ ne, ɔkengale nu dwirɛ amukoraa maa betiele.

³¹Nana Yosia gyinane ye simbini ne anwo, na ɔyɛle apam wɔ AWURADE nyunu, kyɛ okoli AWURADE si, kyɛ ɔkɔfa ye ahone amukoraa ne ye kra amukoraa koli AWURADE mmeraa dwirɛ, ye noa dwirɛ ne ye ahyɛdeɛ so; kyɛ apam ne anu dwirɛ bɔ bahyerɛ ye wɔ nwomaa he anu ne, okoli so.

³²Na ɔmane bɛ bɔ né bɛwɔ Yerusalem ne Benyamin ne, bɛhyɛle bɔ kyɛ bekoli so. Na Yerusalemfoɛ bɛyɔle kyɛbɔ Nyameɛ, bɛ nana mɔ Nyameɛ ne, ye apam ne kyire kyɛ bɛyɔ ne ala.

³³Yosia tuli akyiwadeɛ amukoraa bo fili Yisraelfoɛ aseɛ amukoraa so. Na ɔmane ebiala bɔ ɔwɔ Yisrael sɔnene AWURADE bɛ Nyameɛ ne. Mmerɛ bɔ Yosia te ngoa nu amukoraa, banni AWURADE bɛ nana mɔ Nyameɛ ne, ye sɔnenɛ nwo makyebu.