Read Sehwi 2 Aberɛso Dwirɛ 7 Bible Online

2 Aberɛso Dwirɛ 7 - Sehwi bible

2 Aberɛso Dwirɛ 7

¹ Nana Solomon bɔle ye mbaeɛ ne yiele nen, see fili nyameɛso ɔɔyerale naen yeralɛ afɔleɛ ne ɔne afɔleɛ nemɔ. Na AWURADE animnyam yili asɔneyɛɛ sua ne anu tɛkyɛ.

²Asɔfo nemɔ, bangora AWURADE awuro berɛ wura, ofikyɛ AWURADE animnyam yili AWURADE awuro berɛ tɛkyɛ.

³ Na Yisraelfoɛ amukoraa benwuni kyɛ see ɔtɔ gua ase, ɔne kyɛ AWURADE animnyam amundu asɔneyɛɛ sua ne aso nen, bɛkotole bɛfale bɛ nyunu bebutuli ase, na bɛsɔnene AWURADE bɛlale ye ase kyɛ, “Ɔte paa, na ye ɔdɔ bɔ onni ngasi ne, ɔwɔ berɛ daa.”

⁴Yeɛ Nana Solomon ne maen ne amukoraa bɛbɔle afɔleɛ wɔ AWURADE nyunu.

⁵Nana Solomon fale nandwie apee aburanyɔ ne nyɔ ne mmoaen apee ɛyaa ko aburanyɔ bɔle afɔleɛ. Yiti Nana Solomon ne Yisraelfoɛ amukoraa betuli Nyameɛ awuro ne bewurale Nyameɛ sa.

⁶Asɔfo nemɔ begyinagyinane nekaa bɔ bafa bama bɛ kyɛ begyina ne. Na Lewifoɛ nemɔ koso bɛyɔle sɔ ala. Edweintolɛ nningyein bɔ Nana Dawide yɔle kyɛ bɛfa bɛye AWURADE ayɛ mmerɛ biala bɔ ɔnate b’edweintolɛ so ɔye AWURADE ayɛ ne, Lewifoɛ nemɔ bɛfa bɛtole edwein bɛlale AWURADE ase kyɛ, ‘Ye ɔdɔ bɔ onni ngasi ne, ɔwɔ berɛ daa.’ Né asɔfo nemɔ begyigyi Lewifoɛ nemɔ bɛ ndendeneɛ so behu totorobɛndo bɔ Yisrael maen amukoraa begyigyi berɛ ɔ.

⁷AWURADE awuro n’anyunu aluo berɛ, ye afia berɛ ne, Solomon tele berɛ nwo maa ɔyɛle krongron, ofikyɛ berɛ yeɛ ɔbɔle naen yeralɛ afɔleɛ ne asomdwee afɔleɛ bɔ bɛfa ɛloe bɛbɔ nemɔ ɔ. Solomon bɔle afɔleɛ nemɔ wɔ berɛ, ofikyɛ kɔɔbere afɔleɛ bokyea bɔ osili ne, né naen yeralɛ afɔleɛ ne, aburoo afɔleɛ ɔne ɛloe nemɔ bɛngɔ so.

⁸Sɔ mmerɛ ne, Solomon ne Yisraelfoɛ amukoraa, ofi Lebo Hamate ɔkwaadwu Misraim bɔnza ne anu, bɛbɔle dwaa kandinga belili aluolue ne ɛlɛsoo.

⁹Ye ɛlɛbɔtwɛ ne aso, bɛyɛle nyianu krongron, ofikyɛ né bafa ɛlɛsoo batu afɔleɛ bokyea ne bawura AWURADE sa, yeɛ bali aluolue ne koso ɛlɛsoo.

¹⁰Bosome nzoo ne, ye kyẽa bɔ ɔtɔ so aburanyɔ ne nza ne aso, otuli mmenia ne apo maa bɛhɔle b’awuro. Bele anigye ne aworakyekyerɛ yeɛ bɛhɔle ɔ, ɔnate paa bɔ AWURADE ayɔ ama Dawide ne Solomon ɔne ye maen Yisrael ne ati.

¹¹Yiti Nana Solomon sili AWURADE awuro ne, ɔne ahemvie ne yiele. Na nningyein amukoraa bɔ osusuli ye nwo kyɛ ɔkɔyɔ wɔ AWURADE awuro ne anu ɔne ye bɔbɔ ye ahemvie ne anu ne, ɔyɔ yiele pɛpɛɛpɛ.

¹²Afei AWURADE yele ye nwo ali hyirele Solomon kɔngɔen, na AWURADE sele ye kyɛ, “Mate wɔ mbaeɛ bɔ afa ato me nyunu ne, na maye sua ye mafa kyɛ ɔyɛ afɔleɛbɔlɛ sua.

¹³Sɛ mesi esue ate wɔ nyameɛso maa esue ɔndɔ, anaa mehyɛ mmɛbɛ kyɛ beli fieso nningyein, anaa mema ɛhawo piri to me maen,

¹⁴ná me maen bɔ me dumaa la bɛ so ɔ, bɛbrɛ bɛ nwo ase, bɛbɔ mbaeɛ, bɛpena me si atee, ná bɛsakyera b’adwene befi brabɔlɛ tɛɛ ne anwo a, ye de ngotie bɛ sufrɛ wɔ nyameɛso, ngɔfa bɛ bɔne ngɔhyɛ bɛ, ná masa b’aseɛ ne anwonyerɛ.

¹⁵Afei ngɔma me nye koli sua ye asi, na mbaeɛ bɔ bɛkɔbɔ ye wɔ awuro ye anu ne, ngotie.

¹⁶Na afei, awuro he, mate ye nwo maa wayɛ krongron, amaa me dumaa ala so afebɔɔ. Me nye koli ye si, na ɔkɔla m’ahone nwo daa biala.

¹⁷Na wɔ de, sɛ edi me dwirɛ so kyɛbɔ wɔ baba Dawide lili so ne, ná ɛyɔ kyɛbɔ mahyɛ wɔ ne amukoraa, na edi m’ahyɛdeɛ ne me nhyehyɛleɛ so a,

¹⁸ye de ngɔma w’ahennie ne, ye bo kotimu, kyɛbɔ me ne wɔ baba Dawide yɛyɛle apam kyɛ, ‘Sona bɔ odi wɔ bia odi Yisrael so hene ne, ɔngɔbɔ wɔ le’ ne.

¹⁹“Nakoso sɛ ɛmɔyakyi me si lilɛ, ná ɛmɔanni me m’ahyɛdeɛ ne me mmeraa dwirɛ bɔ mafa mama ɛmɔ ne aso, ná mmom ɛmɔkɔso nyameɛ foforɛ biemɔ bɛsɔne bɛ a,

²⁰ye de ngɔpɛ ɛmɔ asue ngofi aseɛ bɔ mafa mama ɛmɔ ne aso, na awuro he bɔ mate ye nwo mafa me dumaa mato so ne, ngɔye me nye ngofi so, na mamaa wakakyi mmenia amukoraati bɛ noa nu anyandera ne ngorohoɛ dwirɛ.

²¹Na ɔba ye sɔ a, sua ye bɔ kekesaala ye ole animnyam ye, ebiala bɔ ɔkɔpɛ nu wɔ ye nwo ne, ɔkɔyɛ ye nwanwa maa ɔkɔhã kyɛ, ‘Nzu ati yeɛ AWURADE ayɛ maen ye ɔne sua ye sɔa ye?’

²²Na bekobua kyɛ, ‘AWURADE bɛ nana mɔ Nyameɛ bɔ ɔyele bɛ fili Misraim aseɛ so wale ne, bapo ye baali nyameɛ foforɛ biemɔ asi baso bɛ basɔne bɛ. Ɔnate sɔ ti yeɛ AWURADE ama amaneɛ kandinga he wato bɛ ye.’ ”