Read Sehwi 2 Aberɛso Dwirɛ 8 Bible Online

2 Aberɛso Dwirɛ 8 - Sehwi bible

2 Aberɛso Dwirɛ 8

¹Solomon fale afoɛ aburanyɔ yeɛ osili AWURADE awuro ne ɔne ye bɔbɔ ye ahemvie ne yiele ɔ.

²Solomon sa kyekyele nguro bɔ Huram fa mane ye ne, na ɔmane Yisraelfoɛ tenatenane so.

³Solomon hɔle Hamate Soba oolili so ngonim, na ɔfale kuro ne.

⁴Ɔkyekyele Tademo bɔ ɔwɔ ɛserɛ so ne ɔne nguro amukoraa bɔ bɛfa nningyein besie nu ne wɔ Hamate mbɔtam.

⁵Osa kyekyele Bete Horon sorɔ, yeɛ Bete Horon ngwaen, maa bɛyɛle nguro bɔ babɔ bɛ nwo waen bato bɛ nwo fasue, ná bafa mmuralɛ babrambram bɛ pambim mɔ asi ɔ.

⁶Solomon sa kyekyele Baalate, yeɛ afei nguro amukoraa bɔ Solomon ɔmaa besie nningyein wɔ nu ne, nguro amukoraa bɔ ye teaseɛnam mɔ wɔ so ne, nguro bɔ ye pɔngɔhanɛfoɛ tete so ne, ɔne sua biala bɔ okuro kyɛ osi wɔ Yerusalem, Lebanon, ɔne aseɛ amukoraa bɔ né odi so hene ne.

⁷Hitifoɛ, Amorifoɛ, Perisifoɛ, Hiwifoɛ ne Yebusifoɛ ngaa bɔ bɛhale ne, bɔ nna Yisraelfoɛ ahɔ ɔ ne,

⁸bɛ boso ama bɔ né bɛtɛ wɔ aseɛ ne aso, bɔ Yisraelfoɛ bannua bɛ boso bɔkɔɔ ne, Solomon hyɛle bɛ maa bɛyɔle adwuma, na batoa so bayɔ maa waadwu ɛnɛ.

⁹Nakoso Yisraelfoɛ de, Solomon wamva bɛ nu biala wanyɛ kanga maa wanyɔ ye adwuma. Né bɛte koɛhonɛfoɛ, ye mbanyi, ye teaseɛnamhanɛfoɛ ne mbɔngɔhanɛfoɛ mɔ.

¹⁰Sɔ mbanyi nemɔ yeɛ né bɛnea Nana Solomon adwuma nemɔ aso ɔ: bɛte mmenia ɛyaa nyɔ ne aburannu bɔ bɛnea adwumayɔlɛfoɛ nemɔ aso ɔ.

¹¹Na Faro awa brasua ne, Solomon maa otu fili Dawide kuro ne anu ɔɔtenane awuro bɔ wasi wama ye ne anu. Ofikyɛ Solomon hane kyɛ, “Onni kyɛ me ye ɔtena Yisrael hene Dawide ahemvie ne anu, ofikyɛ nekaa bɔ bafa AWURADE alaka ne basie ne, ɔte krongron.”

¹²Yeɛ AWURADE afɔleɛ bokyea bɔ Solomon wasi ye wɔ awuro ne nyunu abrannaa ne aso ne, Solomon bɔle naen yeralɛ afɔleɛ wɔ so mane AWURADE.

¹³ Ɔbɔle afɔleɛ biala bɔ odi kyɛ ɔbɔ ye kyẽa biala ɔ, kyɛbɔ Mose mmeraa nu afɔleɛ nhyehyɛleɛ te ne: ɔbɔle afofikyẽa deɛ, ɛsraen foforɛ deɛ, afoɛnoa afoɛnoa aluolue nza nemɔ deɛ bɔ bɛ ole Paanoo Kabrɛdi aluolue, Dapɛn Dapɛn aluolue ne Asese aluolue ne.

¹⁴Solomon gyinane ye baba Dawide nhyehyɛleɛ so fale asɔfo kure kure nemɔ b’adwuma wurale bɛ sa. Afei ɔfa wurale Lewifoɛ nemɔ sa kyɛ beli maen ne nyunu maa bɛto dwein bɛye AWURADE ayɛ, ná bɛboka asɔfo nemɔ wɔ bɛ daa daa ɛsɔnenɛ adwumayɔlɛ nu. Afei koso, pambim awɛmvoɛ nemɔ, ɔfale kure biala ye pambim deɛ wurale ye sa, kyɛbɔ Nyameɛ sona Dawide hyɛle ne.

¹⁵Ahyɛdeɛ bɔ Nana Dawide hyɛ fale asɔfo ne Lewifoɛ adwuma ɔne nekaa bɔ besie nningyein nemɔ anwo ne, bammu bɛ nye bangua nu biala so.

¹⁶Yiti AWURADE awuro ne anwo adwuma, ofi kyẽa bɔ bɛtole ye fapem kɔpem kyẽa bɔ beyiele ye nwo adwuma bɔkɔɔ ne, Solomon neane maa bɛyɔle nikyee biala pɛpɛɛpɛ.

¹⁷Esion Gebɛre ne Elote bɔ bɛwɔ mboanoa wɔ Edom aseɛ so ne, Nana Solomon hɔle berɛ.

¹⁸Huram somane ye somvoɛ mɔ maa bɛfale ɛlɛen ne ɛlɛenhanɛfoɛ paa mɔ bɛɛmane Solomon. Bɛhane ɛlɛen nemɔ bɛhɔle Ofire bɛ ne Nana Solomon somvoɛ mɔ bɛɛtɔle esikaa kɔkorɛ kilo apee buru ne nnu bɛbrɛle Solomon.