Read Sehwi 2 Aberɛso Dwirɛ 9 Bible Online

2 Aberɛso Dwirɛ 9 - Sehwi bible

2 Aberɛso Dwirɛ 9

¹Hyeba hemmaa tele Solomon nga kyɛ wale dumaa paa. Yiti Hyeba hemmaa hɔle Yerusalem kyɛ ɔkwaafa adwobisa bɔ ye noa yelɛ yɛ se ɔ oso ye nea. Ɔne ye sasofoɛ pee paa yeɛ bɛhɔle ɔ, na bɛfale sɔ nningyein hemɔ bɛtale afupɔngɔ mɔ si yeɛ bɛhɔle ɔ: ayirefona, esikaa kɔkorɛ pee ne nyɔboɛ bɔ ye nyɔboɛ yɛ se ɔ. Na oodwuli Solomon berɛ ne, ye dwirɛ amukoraa bɔ ɔkye ye adwene ne, ɔne Solomon bɛdwenene ye nwo.

²Solomon yele ye adwobisa ne amukoraati noa; edwirɛ biala nne berɛ bɔ Nana Solomon wangora wangyirekyire nu wangyire ye ɔ.

³Hyeba hemmaa nwuni kyɛ Solomon se nworɛ. Na onwuni sua bɔ wasi,

⁴ye poen so aleɛ, kyɛbɔ ye mbanyi nemɔ besi bɛtenatena bɛpɛ ye nwo beyia, kyɛbɔ ye somvoɛ nemɔ besi bɛso ye, bɛ ndaadeɛ, ye nzaasulɛfoɛ ne bɛ ndaadeɛ, ɔne ye naen yeralɛ afɔleɛ bɔ ɔbɔle ye wɔ AWURADE awuro ne anu ne, ye nwo dwirili ye.

⁵Yiti osele Solomon kyɛ, “Edwirɛ bɔ ndele ye wɔ me bɔbɔ me maen nu dɔ bɔ ɔfa wɔ nningyein bɔ ayɔ ɔne wɔ nworɛ nwo ne, ɔte nahorɛ.

⁶Nakoso manne edwirɛ bɔ ndele ne manni kɔpem kyɛ me bɔbɔ mvale me nye mma nwuni ye ɔ. Kyɛbɔ esi se nworɛ paa ne, bɔ ndele ne, ondwu bɔ manwu ye ne ye bue po. Wɔ nworɛ ne, ɔbo bɔ ndele ne aso koraa.

⁷Wɔ mmenia mɔ bato bali. Wɔ somvoɛ hemɔ bɔ daa bɛso wɔ ná betie wɔ nworɛ dwirɛ ne, bato bali!

⁸Animnyam hã AWURADE wɔ Nyameɛ bɔ wahuro wɔ dwirɛ, ná wafa wɔ wasie ye bia so kyɛ di hene ma AWURADE wɔ Nyameɛ ɔ! Ɔnate kyɛ wɔ Nyameɛ hurole Yisrael dwirɛ ná ɔmane bɛ bo timuni afebɔɔ ne ati, wamaa ali bɛ so hene, kyɛ ɛfa ndɛen turoloobualɛ ne bra bɔ ɔtengyɛ ɔ ebu maen ne.”

⁹Yeɛ Hyeba hemmaa mane Nana Solomon esikaa kɔkorɛ kilo apee nna, ayirefona pee paa ɔne nyɔboɛ bɔ ye nyɔboɛ yɛ se ɔ pee. Ayirefona bɔ Hyeba hemmaa fa mane Nana Solomon ne, bannya ye sɛso ko.

¹⁰Afei koso, Huram somvoɛ nemɔ ne Solomon somvoɛ nemɔ bɔ bɛɛfale esikaa kɔkorɛ befili Ofire ne, bɛfale asamvona ne nyɔboɛ bɔ ye nyɔboɛ yɛ se ɔ pee befili Ofire bɛwale.

¹¹Nana Solomon fale asamvona ne bie yɔle AWURADE awuro berɛ ne ahemvie berɛ atweleɛ nemɔ. Ɔfale bie koso yɔle sangoo ne adengum mane edweintolɛfoɛ nemɔ. Sɔ nningyein nemɔ, né bennwuni bɛ sɛso le wɔ Yuda aseɛ so.

¹²Nana Solomon mane Hyeba hemmaa nikyee biala bɔ obisale ɔ, bɔ ɔsone pee tra bɔ ye ɔfa brɛle Solomon ɔ. Na Hyeba hemmaa ne ye somvoɛ nemɔ, besa bɛhɔle bɛ maen nu.

¹³Afoɛ biala, esikaa kɔkorɛ bɔ bɛfa bɛbrɛ Nana Solomon ne, nu nonɛ te kilo apee aburanyɔ ne nza,

¹⁴asora bɔ dwadifoɛ nemɔ ne bɛ bɔ bɛkɔ atee so nemɔ bɛfa bɛwale ɔ; yeɛ esikaa kɔkorɛ ne ɛdwetɛ bɔ Arabia ahemvo amukoraa ɔne maen ne anu amrado nemɔ bɛfa bɛwale ɔ.

¹⁵Nana Solomon borole esikaa kɔkorɛ yɔle akokyɛm ngandinga ɛyaa nyɔ. Ɔfale esikaa kɔkorɛ bɔ baboro ɔ kilo nzoo yeɛ ɔyɔle akokyɛm ko biala ɔ.

¹⁶Ɔfale esikaa kɔkorɛ bɔ baboro ɔ yɔle akokyɛm ɛyaa nza: esikaa kɔkorɛ kilo nza ne bue yeɛ ɔfa yɔle akokyɛm ko biala ɔ. Na Solomon fale bɛ ooguale awuro bɔ bɛfrɛ ye Lebanon Ɛhɔayeɛ ne anu.

¹⁷Osa fale ɛsoen gye yɔle ahennie bia kandinga, na ɔfale esikaa kɔkorɛ paa paa borole ye nwo.

¹⁸Ahennie bia ne, né ole atweleɛ nzia ɔne esikaa kɔkorɛ ndiasoɛ bɔ bayɔ babata bia ne ɔ. Bia ne, ye ngyɛnu ne ye ngyɛnu ne, né ole nekaa bɔ bɛfa bɛ sa bɛto ɔ. Bayɔ gyata buru ne nyɔ bɔ nzia wɔ nekaa bɔ bɛfa bɛ sa bɛto ne biala ɔ.

¹⁹Ɔyɔle gyata buru ne nyɔ. Atweleɛ ndiasoɛ nzia ne, ko biala, né gyata ko gyi ye bɛen, yeɛ ko wora gyi ye famaa so. Sɔ bia ne, né bɛyyɔle ye sɛso wɔ ahennie biala anu le.

²⁰Nana Solomon kulie bɔ ɔno nu amukoraa, bɛfale esikaa kɔkorɛ yeɛ bɛyɔle ɔ. Na sua bɔ bɛfrɛ ye Lebanon Ɛhɔayeɛ ne anu kulie amukoraa, bɛfale esikaa kɔkorɛ paa yeɛ bɛyɔle ɔ, ofikyɛ Solomon aberɛ so, né bemmu ɛdwetɛ nikyee titire biala.

²¹Ofikyɛ né Nana Solomon ɛlɛen nemɔ, bɛ ne Huram somvoɛ nemɔ bɛkɔ Tasise. Afoɛ nza biala, Tasise ɛlɛen nemɔ, bɛfa esikaa kɔkorɛ, ɛdwetɛ, ɛsoen gye, kondromvi mɔ ne asraen mɔ bɛba.

²²Yiti né Nana Solomon anwonya ne ye nworɛ tra aseɛ ye aso ahemvo amukoraati.

²³Aseɛ ye aso ahemvo amukoraa hurole kyɛ bɛkɔ Solomon gya so bekotie ye nworɛ dwirɛ bɔ Nyameɛ afa awura ye ti anu ne.

²⁴Afoɛ biala, bɛ nu biala fale akyɛdeɛ hemɔ pee bɛɛmane ye: ɛdwetɛ ne esikaa kɔkorɛ nningyein, ndena, akodeɛ, ayirefona, mbɔngɔ ne afunum.

²⁵Né Solomon le mbɔngɔ sua ne teaseɛnam sua apee nna. Né ole mbɔngɔ apee buru ne nyɔ. Ɔfale bie hɔle mbɔngɔ nguro biemɔ aso, yeɛ ɔmane ebie koso hale ye nwo berɛ wɔ Yerusalem.

²⁶Né Solomon di ahemvo amukoraa so fi asue Yufreti kɔka Filisti aseɛ so bɔ ɔkwaadwu Misraim ɛwɛen so dɔ ne.

²⁷Nana Solomon mane ɛdwetɛ buli wɔ Yerusalem kyɛ nyɔboɛ, yeɛ ɔmane sida koso buli kyɛ aseɛ frɛtɛɛ so akyea.

²⁸Bɛherale mbɔngɔ befili Misraim ne maen amukoraati so bɛbrɛle Solomon.

²⁹Afei Solomon nwo dwirɛ ngaa ne, ofi ye ahyɛaseɛ bɔ ɔkwaadwu ye ayieleɛ, bahyerɛ ye wɔ ngɔmhyɛlɛniɛ Natan abakɔsɛm nwomaa ne anu, yeɛ bahyerɛ ye wɔ Silonniɛ Ahiya ngɔmhyɛlɛ nwomaa ne anu, ɔne Yido bɔ ɔse ase ne, ye nyekyire bɔ ɔfa Nebate awa Yeroboam nwo ne anu.

³⁰Mmerɛ bɔ Solomon fa lili Yisrael amukoraa so hene wɔ Yerusalem ne, ɔte afoɛ aburanna.

³¹Solomon toale ye mbanyi mɔ, na besiele ye wɔ ye baba Dawide kuro. Na ɔwa Rehoboam lili ye bia.