Read Sehwi Ɛsra 3 Bible Online

Ɛsra 3 - Sehwi bible

Ɛsra 3

¹Bosome bɔ ɔtɔ so nzoo ne dwuli, bɔ né Yisraelfoɛ baatenatena nguro nemɔ aso nen, bɛ mukoraa bɛbɔle nu bɛɛboale bɛ noa wɔ Yerusalem.

² Afei Yesua bɔ ye baba ole Yosadake ne, ɔne ye mmango asɔfo mɔ, yeɛ Sɛtiɛl awa Serubabɛl ne ye abusuafoɛ bɛbɔle ye bo besili Yisrael Nyameɛ afɔleɛ bokyea, bɔ bɛkɔbɔ naen yeralɛ afɔleɛ wɔ so ɔ, kyɛbɔ bahyerɛ ye wɔ Nyameɛ sona Mose mmeraa ne anu ne.

³ Ɔwɔ nu kyɛ né besuro maen maen mɔ bɔ bapɛ bɛ nwo bayia ne de, nakoso besili afɔleɛ bokyea ne besiele ye boso, na bɛbɔle naen yeralɛ afɔleɛ wɔ so bɛmane AWURADE ngyerɛmɔ ne nɔsoa biala.

⁴ Belili Asese aluolue ne, kyɛbɔ bahyerɛ bato berɛ ne. Ngaka somaa bɔ ɛlɛho biala odi kyɛ bɛfa bɛbɔ naen yeralɛ afɔleɛ wɔ aluolue ne anu ne, belili so kyɛbɔ nhyehyɛleɛ ne te ne ala.

⁵ Besa bɛbɔle daa daa naen yeralɛ afɔleɛ, ɛsraen foforɛ afɔleɛ, AWURADE aluolue krongron afɔleɛ ne amukoraa, ɔne akyɛdeɛ afɔleɛ bɔ ebiala ɔbɔ mane AWURADE ɔ.

⁶Kyẽa bɔ oli moa wɔ bosome bɔ ɔtɔ so nzoo ne anu yeɛ bɛhyɛle ye bo bɛbɔle naen yeralɛ afɔleɛ bɛmane AWURADE ɔ. Nakoso né bennya bɛttole AWURADE asɔneyɛɛ sua fapem ne.

⁷Ye sɔ ne ati, bɛfale sikaa bɛbɔle suasilɛfoɛ ne bakaa dwumvoɛ mɔ paa, na bɛmane Sidonfoɛ ne Tirofoɛ aleɛ, anonneɛ ne ngoo maa bɛfale sida mmakaa beguale ɛpo so befili Lebanon bɛwale Yopa, kyɛbɔ Pɛsia hene Karose mane bɛ ate kyɛ bɛyɔ ne ala.

⁸Beedwuli Nyameɛ awuro ne anwo wɔ Yerusalem nen, afoɛ nyɔ ne anu, ye bosome bɔ ɔtɔ so nyɔ ne anu, Sɛtiɛl awa Serubabɛl ne Yosadake awa Yesua bɛhyɛle sua ne silɛ bo. Bɛ ne Yisraelfoɛ ngaa ne, asɔfo mɔ ne Lewifoɛ mɔ, yeɛ ebiala bɔ ofili nnurehyelɛ nu wale Yerusalem ne. Bɛyele Lewifoɛ bɔ bali ofi afoɛ aburanyɔ bɔ ɔkɔ ɔ besiele berɛ kyɛ AWURADE awuro ne bɛnea ye silɛ so.

⁹Na Yesua ne ye mma mɔ ne ye abusuafoɛ, bɛ ne Kadimiɛl ne ye mma mɔ, bɔ bɛte Yuda bosofoɛ, yeɛ Henadade bosofoɛ bɔ bɛte Lewifoɛ ne, bɛ ne bɛ mma mɔ ne b’abusuafoɛ yeɛ bɛbɔle nu bɛneane Nyameɛ awuro adwumayɔlɛfoɛ nemɔ aso ɔ.

¹⁰ Suasilɛfoɛ nemɔ hyɛle ye bo bɔ bɛto AWURADE asɔneyɛɛ sua ne fapem nen, asɔfo mɔ bɔ bawurawura asɔfo ndaadeɛ ɔ behuli totorobɛndo, yeɛ Lewifoɛ bɔ bɛte Asafe bosofoɛ ne koso, bɛbɔle firikyiwa bɛyele AWURADE ayɛ, kyɛbɔ Yisrael hene Dawide hyehyɛ mane bɛ ne ala.

¹¹ Bɛtole AWURADE nwo ayɛyelɛ ne asennaa dwein fɛfɛɛfɛ kyɛ, “Nyameɛ te paa, ofikyɛ ye ɔdɔ bɔ onni ngasi ne, ɔwɔ berɛ daa ma Yisrael.” Na maen ne amukoraa bɛbɔle ese besurole so bɛyele AWURADE ayɛ, ofikyɛ né bahyɛ ye bo bato AWURADE awuro fapem ne.

¹²Nakoso asɔfo nemɔ pee, Lewifoɛ pee ne mmusua mbanyi pee bɔ bɛ nye afi, bɔ benwuni asɔneyɛɛ sua daa nen, mmerɛ bɔ benwuni asɔneyɛɛ sua he ye fapem nen, besuni hahii. Na mmenia ne pee koso de, bɛbɔle ese bɛmane bɛ nye gyele.

¹³Ye sɔ ne ati, anigye esebɔlɛ ne, ɔne esue hahii ne betu bɛfrale, bɔ né mmenia ne ngora nnwu nzonzoleɛ bɔ ɔla b’afia ɔ, ofikyɛ mmenia ne yɛle dede bɔ né sɛ ɛwɔ dedeede a ɛte ɔ.