Read Sehwi Ɛsra 4 Bible Online

Ɛsra 4 - Sehwi bible

Ɛsra 4

¹Mmenia bɔ bɛpɔ Yuda ne Benyamin ne, bɛtele kyɛ mmenia bɔ befi nnurehyelɛ nu bawa ne, begu so besi AWURADE Yisrael Nyameɛ asɔneyɛɛ sua.

² Yiti bɛhɔle Serubabɛl ne mmusua mbanyi nemɔ berɛ beesele bɛ kyɛ, “Yɛbaaboka ɛmɔ so maa yɛsi sua ne, ofikyɛ ɛmɔ Nyameɛ bɔ ɛmɔsɔne ye ne, ye yeɛ yɛ koso yɛsɔne ye ɔ. Na yabɔ afɔleɛ yama ye alaa, fite Asiria hene Esa Hadon bɔ ɔfale yɛ wale wa ne aberɛ so.”

³Nakoso Serubabɛl ne Yesua ne Yisrael mmusua mbanyi ngaa nemɔ buale bɛ kyɛ, “Yɛngɔma ɛmɔ ngɔboka yɛ so wɔ yɛ Nyameɛ awuro ne ye silɛ nu, na mmom yɛ ngome yeɛ yɛkosi AWURADE Yisrael Nyameɛ awuro ne ɔ, kyɛbɔ Pɛsia hene Karose ahyɛ kyɛ yɛyɔ ne ala.”

⁴Na afei mmenia bɔ bɛwɔ sɔ aseɛ ne aso ne, bebuli Yudafoɛ nemɔ aba nu, na bɛmaa besurole kyɛ bekosi sua ne ɔ.

⁵Bɛbɔle mbanyi paa kyɛ bɛbɔ Yudafoɛ bɛ botaeɛ ne begua, na ɛhe hɔle so toonn wɔ Pɛsia hene Karose aberɛ so maa oodwuli Pɛsia hene Dario aberɛ so.

⁶ Ahasuro ahennie aberɛ so, afoɛ bɔ oli moa wɔ ye ahennie ne anu ne, pɔfoɛ nemɔ hyerɛle Yudafoɛ ne Yerusalemfoɛ nwo krataa bɛɛtoatoale bɛ.

⁷Yeɛ Pɛsia hene Atasɛsɛse aberɛ so koso, Bislam, Mitredate, Tabeel ne bɛ mmango ngaa nemɔ bɛhyerɛle krataa bɛɛmane Pɛsia hene Atasɛsɛse. Bɛhyerɛle krataa ne Aramaeke dwudwolɛ nu, na bɛtele ye noa wɔ ye dwudwolɛ nu behyirele ye.

⁸Amrado Rehum ne ahyerɛlɛniɛ Simsae bɛhyerɛle Yerusalem nwo krataa tɛɛ bɛɛmane Nana Atasɛsɛse.

⁹(Bɛhyerɛle ye kyɛ, Krataa ne fi ɛhemɔ berɛ: Amrado Rehum ne ahyerɛlɛniɛ Simsae, yeɛ bɛ mmango ngaa nemɔ, ndɛenbualɛfoɛ, amrado mɔ, mbanyi mɔ, Pɛsiafoɛ; bɛ bɔ befi Ɛreke, Babilɔn, Susa bɔ bɛfrɛ bɛ Elamfoɛ ne,

¹⁰maen maen ngaa bɔ katakyie Asabanipal bɔ wale dumaa ne ɔhyele bɛ nnure ɔɔsoale bɛ guale Samaria nguro nemɔ aso, ɔne asue Yufreti si dɔ mbɔtam ngaa nemɔ.

¹¹Krataa bɔ bɛhyerɛ bɛɛmane Nana Atasɛsɛse ne, nu dwirɛ ɛhe): “Yɛfa krataa he yɛbrɛ Nana Atasɛsɛse. Wɔ somvoɛ mɔ bɔ yɛwɔ asue Yufreti si dɔ mbɔtam ne aso ne, yɛbisa wɔ bisabisa.

¹²Nana, yɛbɔ wɔ amaneɛ kyɛ, Yudafoɛ bɔ befili wɔ dɔ bɛwale yɛ wa ne, baadwu Yerusalem, na besa bɛkyekye ɛlɔenyɛlɛfoɛ ne amumuyɛɛfoɛ kuro ne bieku. Fasue ne, basa bagua ye fapem ne maa wanya anwoserɛ, na waha kãa né bayie ye to.

¹³Nana, yɛbɔ wɔ amaneɛ kyɛ, sɛ besa bɛkyekye sɔ kuro ne, ná bɛto ye nwo fasue beyie a, ye de bengotua ɛtoɔ, anaa ndɔ, anaa aseɛ nwo toɔ ne. Sɛ ɔba ye sɔ a, sikaa bɔ ɔba ahemvie dɔ ne, so kɔte.

¹⁴Nana, w’adaworoma, wɔ yeɛ yɛ ko wura wɔ sa nu ɔ, yiti ɔtte mayee kyɛ yɛkɔnea kɔmaa bekogua wɔ nyunu aseɛ ɔ. Ye sɔ ati yeɛ yahyerɛ krataa yɛbaafa yɛtia wɔ gya so ye,

¹⁵amaa ɔnate so aneanea wɔ nana mɔ dwirɛ bɔ bahyerɛ bato berɛ ne anu. Na ekonwu ye wɔ edwirɛ bɔ bahyerɛ bato berɛ ne anu kyɛ, sɔ kuro ne ɔte ɛlɔenyɛlɛfoɛ kuro bɔ ɔmma ahemvo mɔ ne mbɔtam mɔ bɛ nwo ndɔ bɛ ɔ. Ofi tetetete yeɛ kuro berɛ ama bahɔ so bayɔ maen mbanyi nwo lɔen ɔ, na ɔnate sɔ ati yeɛ wɔ mbanyi mɔ bɛbɔle sɔ kuro ne ɔ.

¹⁶Nana, yɛbɔ wɔ amaneɛ kyɛ, sɛ besa bɛkyekye sɔ kuro ne, ná bɛto ye nwo fasue beyie a, ye de asue Yufreti si dɔ mbɔtam ne okofi wɔ sa.”

¹⁷Na Nana Atasɛsɛse maa bɛfale mmuayɛɛ he bɛɛmane bɛ, “Mefa mebrɛ Amrado Rehum ne ahyerɛlɛniɛ Simsae ne bɛ mmango mɔ bɔ bɛwɔ Samaria ne asue Yufreti si dɔ mbɔtam ne aso ne. Mebisa ɛmɔ oo.

¹⁸Krataa bɔ ɛmɔhyerɛ bɛbrɛle yɛ ne, bate ye noa wɔ me dwudwolɛ nu bahyire me.

¹⁹Yiti mahyɛ mmeraa maa baneanea edwirɛ bɔ bahyerɛ bato berɛ ne anu, na wala ali pefee kyɛ, ofi tetetete yeɛ sɔ kuro ne wahɔ so wayɛ lɔen watia ahemvo mɔ ɔ, na ɛlɔenyɛlɛ ne basabasayɔlɛ ɔmba kuro ne aso.

²⁰Ahemvo atitire lili Yerusalem so, bɔ b’ahennie ne ɔtrɛ hɔle asue Yufreti si dɔ mbɔtam ne aso amukoraa ɔ. Na mmenia tuale ɛtoɔ, ndɔ, ɔne aseɛ nwo toɔ bɛmane ahemvo nemɔ.

²¹Yiti ɛ́mɔhyɛ mmeraa ma mmenia nemɔ bɛyakyi, bɔ nnɛmaa bɛkyekye kuro ne ko ɔ, kɔpem kyɛ ngɔma bɛ ate ɔ.

²²Ɛ́mɔnea kyɛ ɛmɔngobu ɛmɔ nye bengogua edwirɛ he aso ɔ. Anyɔ a, edwirɛ bɔ ɔtte mayee kɔto m’ahennie ye.”

²³Na bɛkengale Nana Atasɛsɛse krataa ne behyirele Rehum ne ahyerɛlɛniɛ Simsae ne bɛ mmango nemɔ nen, berɛ ne ala, bɛhɔle Yerusalem ndɛndɛ so, na bɛhyɛle Yudafoɛ nemɔ mbendene so maa bɛyakyili adwuma ne yɔlɛ.

²⁴ Yiti Nyameɛ awuro bɔ ɔwɔ Yerusalem ne, bɛyakyili ye nwo adwuma ne bɛtole berɛ, na ɔhale berɛ toonn maa oodwuli Pɛsia hene Dario ye bia lilɛ afoɛ bɔ ɔtɔ so nyɔ ne.