Read Sehwi Ɛsra 5 Bible Online

Ɛsra 5 - Sehwi bible

Ɛsra 5

¹ Sɔ mmerɛ ne anu, ngɔmhyɛlɛniɛ Hagae ne ngɔmhyɛlɛniɛ Sakaria bɔ ye baba ole Yido ne, bɛhane Nyameɛ noa dwirɛ behyirele Yudafoɛ bɔ bɛwɔ Yuda ne Yerusalem. Begyinane Yisrael Nyameɛ dumaa bɔ ɔla bɛ so ne aso yeɛ bɛhane edwirɛ ne ɔ.

² Na ɛhe mane Sɛtiɛl awa Serubabɛl ne Yosadake awa Yesua bɛhyɛle ye bo kyɛ besa besi Nyameɛ awuro ne wɔ Yerusalem. Na Nyameɛ ngɔmhyɛlɛfoɛ nemɔ gyinane bɛ si bɛbokale bɛ.

³Sɔ mmerɛ ne ala, asue Yufreti si mbɔtam amrado Tatenae, ɔne Seta Bosenae ne bɛ mmango mɔ bɛwale Yudafoɛ berɛ beebisale bɛ kyɛ, “Nwa yeɛ ɔmane ɛmɔ ate kyɛ ɛmɔsa besi sua ye, ná ɛmɔto ye nwo fasue ɔ?”

⁴Besa bebisale bɛ kyɛ, “Nwa mɔ yeɛ besi sua ye?”

⁵Nakoso Yisrael Nyameɛ ne, né ye nye wɔ Yuda mbanyi nemɔ aso. Yiti Pɛsiafoɛ nemɔ anzi bɛ ate, kɔpem kyɛ bɛfale ye nwo amaneɛ bɛɛbɔle Dario maa ye koso ɔhyerɛle krataa wale ɔ.

⁶Asue Yufreti si mbɔtam amrado Tatenae ne Seta Bosenae ne ye mmango maen mbanyi bɔ bɛwɔ asue Yufreti si dɔ ne, krataa bɔ bɛhyerɛ bɛɛmane Nana Dario ne, ye ɛhe:

⁷Krataa bɔ bɛfa bɛɛmane ye ne, nu dwirɛ ɛhe, “Nana Dario, wɔ ngoa so oo.

⁸Nana, yɛbɔ wɔ amaneɛ kyɛ, yɛhɔle Yuda mbɔtam dɔ, nekaa bɔ Nyameɛ piri ne, ye awuro ne ɔwɔ ne. Nyɔboɛ mbiri mbiri yeɛ bɛ́fa bési ɔ, na basa bafa mbuna bagyinagyina ye fasue ne anu. Bayere bɛ nwo paa yeɛ bɛ́yɔ adwuma ne ɔ, na ɔkɔ so paa.

⁹Yɛbisale bɛ mbanyi nemɔ kyɛ, ‘Nwa yeɛ ɔmane ɛmɔ ate kyɛ ɛmɔsa besi sua ye ná ɛmɔto ye nwo fasue ɔ?’

¹⁰Asa koso, yɛbisale bɛ dumaa, amaa ɔnate so yahora yahyerɛ mbanyi bɔ bɛla bɛ noa nemɔ dumaa yabrɛ wɔ maa anwu ye.

¹¹Na mmuayɛɛ bɔ bɛfa bɛmane yɛ ɛhe, ‘Anwuro ne aseɛ Nyameɛ ne, yɛte ye ngoaa. Yɛsa yɛsi awuro bɔ daa tetetete besili, bɔ ɔte awuro bɔ Yisrael hene piri bie osi yiele korakora ɔ.

¹² Nakoso ɔnate kyɛ yɛ nana mɔ bɛmane nyameɛso Nyameɛ ne ɔfɛle bɛ so yaa ne ati, ɔfale bɛ wurale Babilɔn hene Nebukadenesa bɔ ɔte Kaldeaniɛ ne ye sa. Obubuli sua he guale, na ɔhyele maen ne anu ama nnure hɔle Babilɔn.

¹³ Na Babilɔn hene Karose[1] lili bia ne, ye afoɛ bɔ oli moa ne anu, ɔhyɛle mmeraa kyɛ yɛsa yɛsi Nyameɛ awuro he.

¹⁴Asa koso, Nyameɛ awuro sikaa kɔkorɛ ne ɛdwetɛ nningyein bɔ Nebukadenesa sesa fili Yerusalem asɔneyɛɛ sua ne anu ooguale Babilɔn asɔneyɛɛ sua nu ne, Nana Karose sesa fili Babilɔn asɔneyɛɛ sua ne anu. Na biaa bie bɔ oli Sesebasa bɔ Nana Karose wabɔ ye amrado ne, ɔfa wurale ye sa.

¹⁵Osele ye kyɛ, ‘De sɔ nningyein hemɔ. Fa kogua asɔneyɛɛ sua bɔ ɔwɔ Yerusalem bɔ ɔte Nyameɛ awuro ne anu, ná maa besa besi besie ye boso.’

¹⁶Na ɛhe mane sɔ Sesebasa ne tole Nyameɛ awuro bɔ ɔwɔ Yerusalem ne fapem, na sua ne nwo adwuma ahɔ so alaa fi sɔ mmerɛ ne maa waadwu ɛnɛ, bɔ yɛnnya yɛyyiele ye si ɔ.’

¹⁷Nana Dario, sɛ ɔngɔha wɔ a, maa bɛneanea ahemvie ngrataa bɔ bafa basie Babilɔn ne anu bɛnea, kyɛ, aso Nana Karose hyɛle mmeraa kyɛ besi Nyameɛ awuro bɔ ɔwɔ Yerusalem ne bieku anaa. Nana, bɔ w’adwene kyire wɔ wɔ edwirɛ he anwo ne, soma maa bɛɛhã behyire yɛ.”