Read Sehwi Ɛsra 6 Bible Online

Ɛsra 6 - Sehwi bible

Ɛsra 6

¹Afei Nana Dario hyɛle mmeraa maa bɛɛpenane sɔ ngrataa ne wɔ nekaa bɔ besie ngrataa wɔ Babilɔn ne.

²Nakoso Ekobatana bɔ ɔte Media mbɔtam ahenguro ne, berɛ yeɛ beenwuni nwomaa bie bɔ bahyerɛ edwirɛ bie bagua so kyɛ, “Ngayeɛ dwirɛ.

³ Nana Karose afoɛ bɔ oli moa wɔ ye ahennie ne anu ne, ɔhyɛle mmeraa tole berɛ kyɛ, Mmeraa he fa Nyameɛ awuro bɔ ɔwɔ Yerusalem ne anwo. Mama ate kyɛ besa besi sua ne bɛfa bɛyɛ nekaa bɔ bɛbɔ afɔleɛ ɔ. Ofi ye aseɛnwo bɔ ɔkwaadwu ye anwuro ne, ɔkɔyɛ agyirɛ aburasia, yeɛ ye tɛtrɛtɛɛ nu koso kɔyɛ agyirɛ aburasia.

⁴Ye fapem ne, nyɔboɛ mbiri nza biala bɔ bɛkɔfa bɛkɔtaataa so ne, bɛkɔfa bakaa ko bɛkɔto so. Na ye nwo kerɛ ne, yɛkotua yɛkofi ahemvie fotoɛ ne anu.

⁵Asa koso, Nyameɛ awuro sikaa kɔkorɛ ne ɛdwetɛ nningyein bɔ Nebukadenesa sesa fili Yerusalem asɔneyɛɛ sua ne anu wale Babilɔn ne, mahyɛ kyɛ besa bɛɛfa ebiala begua ye boso wɔ Yerusalem asɔneyɛɛ sua ne anu. Odi kyɛ bɛfa bekogua Nyameɛ awuro berɛ.”

⁶“Yiti wɔ Tatenae bɔ ɛte asue Yufreti si mbɔtam amrado ne, ɛne Seta Bosenae ne ɛmɔ mmango maen mbanyi bɔ bɛwɔ asue Yufreti si mbɔtam dɔ ne, nnɛma ɛmɔsi asɔneyɛɛ sua ne silɛ nwo ate.

⁷Nyameɛ awuro ne nwo adwuma ne, nnɛma ɛmɔsi ye nwo ate; na mmom ɛmɔhwe bɛ nwo ma Yudafoɛ amrado ne, ɔne Yudafoɛ mbanyi besa besi Nyameɛ awuro he besie ye boso.

⁸Afei, bɔ ɔsɛ kyɛ ɛmɔyɔ bɛboka sɔ Yudafoɛ mbanyi nemɔ maa besa besi Nyameɛ awuro he ne, mahyɛ ye nwo mmeraa kyɛ, ahemvie fotoɛ, bɔ ɔte ɛtoɔ bɔ yɛde yɛfi asue Yufreti si mbɔtam ne, odi kyɛ ɛmɔfa betua awuro ne anwo kerɛ amukoraa bɛma bɛ ndɛndɛ.

⁹Asɔfo bɔ bɛwɔ Yerusalem ne, nikyee biala bɔ bɛkɔhã kyɛ behia ne, kyɛ nandwie akrɔngrɔma oo, mmoaen nyii oo, mmoaen bɔ bɛkɔfa bɛkɔbɔ naen yeralɛ afɔleɛ bɛkɔma nyameɛso Nyameɛ ne oo, atokoɔ oo, ngyee oo, nzaa oo, anaa ngoo oo, kyɛ ɔkɔyɛ biala, ɛ́mɔma bɛ sa hã ye alehyeleɛ biala;

¹⁰amaa ɔnate so babɔ afɔleɛ fonafona bama nyameɛso Nyameɛ ne, ná babɔ mbaeɛ bama me, ɛhene ne me mma.

¹¹Masa mahyɛ mmeraa koso kyɛ, ebiala bɔ okotu sɔ mmeraa ne kogua ne, bɛkɔye ye awuro nu mbuna ko, bekosinzi ye noa bɛkɔfa bɛkɔpena berɛ, ná bafa ye basina so, na bɛkɔfa ye awuro ne bɛkɔkakyi fofoɛ.

¹²Na sɛ ɛhene bie anaa maen bie otu sɔ mmeraa ne gua, anaakyɛ ɔsɛkye Nyameɛ awuro he bɔ ɔwɔ Yerusalem ne a, Nyameɛ bɔ wama ye dumaa ala Yerusalem so ne, ótu sɔ hene ne anaa ɔ́bɔ sɔ maen ne. Me, Dario yeɛ mahyɛ sɔ mmeraa ye ɔ, na odi kyɛ bedi so pɛpɛɛpɛ!”

¹³Afei mmuayɛɛ bɔ Nana Dario maa bɛɛfa bɛmane asue Yufreti si mbɔtam amrado Tatenae, ɔne Seta Bosenae ne bɛ mmango mɔ ne, belili sɔ mmeraa ne aso pɛpɛɛpɛ, kyɛbɔ ɔhyɛle ne ala.

¹⁴ Yiti Yuda mbanyi nemɔ hɔle so benyane ngɔsoɛ wɔ sua ne silɛ nu, ɔnate Nyameɛ noa dwirɛ bɔ ngɔmhyɛlɛniɛ Hagae ne ngɔmhyɛlɛniɛ Sakaria bɔ ye baba ole Yido ne, bɛhã behyirele bɛ ne aso. Na kyɛbɔ Yisrael Nyameɛ ahyɛdeɛ ɔte ne, ɔne kyɛbɔ Pɛsia ahemvo Karose ne Dario ne Atasɛsɛse mmeraa bɔ bɛhyɛle ne ɔte ne, Yudafoɛ sili sua ne beyiele.

¹⁵Beyiele awuro ne si wɔ kyẽa bɔ ɔtɔ so nza wɔ bosome bɔ bɛfrɛ ye Ada ne anu, wɔ Nana Dario ahennie afoɛ bɔ ɔtɔ so nzia ne anu.

¹⁶Afei Yisraelfoɛ, asɔfo nemɔ, Lewifoɛ ne mmenia ngaa bɔ befili nnurehyelɛ nu bɛwale ne, belili ahurusi betuli Nyameɛ awuro he bewurale Nyameɛ sa.

¹⁷Mmerɛ bɔ bétu Nyameɛ awuro ne bewura Nyameɛ sa ne, bɛfale ɛhemɔ bɛbɔle afɔleɛ: nandwie nyii ɛyaa ko, mmoaen nyii ɛyaa nyɔ, mmoaen akrɔngrɔma ɛyaa nna; yeɛ bɛfale mbɔngye nyii buru ne nyɔ bɛbɔle Yisrael bɔne nwo afɔleɛ, kyɛbɔ Yisrael mmusua kure nemɔ bɛ somaa te ɔ.

¹⁸Afei bɛmane asɔfo nemɔ hɔle bɛ kure kure nu, yeɛ Lewifoɛ nemɔ koso bɛ fekue fekue nu. Na bɛfale Nyameɛ sɔnenɛ nwo adwuma wɔ Yerusalem bewurale bɛ sa, kyɛbɔ bahyerɛ ye Mose nwomaa ne anu ne.

¹⁹ Bosome bɔ oli moa ne anu, ye kyẽa bɔ ɔtɔ so buru ne nna ne, mmenia bɔ befili nnurehyelɛ nu bɛwale ne, belili Abɔtra aluolue ne.

²⁰Ofikyɛ né asɔfo nemɔ ne Lewifoɛ nemɔ bapete bɛ nwo bama bɛ mukoraa bɛ nwo ate. Yiti Lewifoɛ nemɔ huhuni Abɔtra boaen ne bɛmane bɛ bɔ bafi nnurehyelɛ nu bawa ne amukoraa, bɛ mmango asɔfo nemɔ, ɔne bɛ bɔbɔ bɛ nwo.

²¹Yisraelfoɛ bɔ befili nnurehyelɛ nu bɛwale ne, bɛ ne ebiala bɔ ɔwɔ maen ne anu, bɔ waaboka Yisraelfoɛ so ɔne bɛ bate bɛ nwo bafi Amaenmaensofoɛ yɔleɛ fiɛ nwo, kyɛ bɛkɔso AWURADE Yisrael Nyameɛ ne, bɛ yeɛ belili Abɔtra boaen ne ɔ.

²²Bele anigye belili Paanoo Kabrɛdi aluolue ne ɛlɛsoo. Bɛ nye gyele, ofikyɛ né AWURADE ama Asiria hene anwu bɛ anwumvoin, bɔ ɔnate so ɔbokale bɛ wɔ Nyameɛ, Yisrael Nyameɛ ne, ye awuro ne silɛ nu ɔ.