Read Sehwi Ɛsra 7 Bible Online

Ɛsra 7 - Sehwi bible

Ɛsra 7

¹Ɛhemɔ asi ne, Pɛsia hene Atasɛsɛse aberɛ so, Ɛsra bɔ ye baba ole Seraya, bɔ ye baba ole Asaria, bɔ ye baba ole Hilkia,

²bɔ ye baba ole Salum, bɔ ye baba ole Sadoke, bɔ ye baba ole Ahitubo,

³bɔ ye baba ole Amaria, bɔ ye baba ole Asaria, bɔ ye baba ole Merayote,

⁴bɔ ye baba ole Serahia, bɔ ye baba ole Yusi, bɔ ye baba ole Buki,

⁵bɔ ye baba ole Abisua, bɔ ye baba ole Finehase, bɔ ye baba ole Eleasa, bɔ ye baba ole ɔsɔfo panyi Aarɔn ne,

⁶sɔ Ɛsra ne fili Babilɔn wale. Né ɔte ahyerɛlɛniɛ bɔ wabe paa wɔ Mose mmeraa bɔ AWURADE Yisrael Nyameɛ fa mane Yisraelfoɛ ne anu. Ye dwirɛ bɔ ɔfa tole Nana Atasɛsɛse nyunu biala, ɔyɔ mane ye, ofikyɛ né AWURADE ye Nyameɛ gyi ye si.

⁷Nana Atasɛsɛse lili hene ne, ye afoɛ bɔ ɔtɔ so nzoo ne anu, Yisraelfoɛ nemɔ bie, bɛ ne asɔfo, Lewifoɛ, edweintolɛfoɛ, anoa awɛmvoɛ ne asɔneyɛɛ sua nu somvoɛ mɔ bɛ koso besa bɛwale Yerusalem.

⁸Nana Atasɛsɛse afoɛ bɔ ɔtɔ so nzoo ne, ye bosome nnu ne anu yeɛ Ɛsra wale Yerusalem ɔ.

⁹Kyẽa bɔ oli moa wɔ bosome bɔ oli moa ne anu yeɛ otuli ye bo fili Babilɔn ɔ, na kyẽa bɔ oli moa wɔ bosome nnu ne anu yeɛ oodwuli Yerusalem ɔ, ofikyɛ ye Nyameɛ nwuni ye anwumvoin gyinane ye si.

¹⁰Ofikyɛ né Ɛsra watu ye nwo wasie berɛ kyɛ okosua AWURADE mmeraa ne, kyɛ okoli so, ɔne kyɛ okohyirehyire sɔ ahyɛdeɛ ne ɔne nhyehyɛleɛ ne wɔ Yisrael.

¹¹Ɔsɔfo Ɛsra bɔ ɔte ahyerɛlɛniɛ bɔ wabe paa wɔ AWURADE mmeraa dwirɛ ne ye ahyɛdeɛ bɔ ɔfa mane Yisrael ne anu ne, krataa bɔ Nana Atasɛsɛse fa mane ye ɛhe:

¹²“Me Atasɛsɛse, ahemvo mɔ nu hene, mefa krataa ye mema ɔsɔfo Ɛsra bɔ ɔte nyameɛso Nyameɛ ye mmeraa ahyerɛlɛniɛ ne. Mebisa wɔ oo. M’ahyɛdeɛ ne ɛhe:

¹³Mahyɛ mmeraa kyɛ, Yisraelniɛ biala bɔ ɔwɔ m’ahennie ye anu, yeɛ b’asɔfo ne Lewifoɛ, ebiala bɔ okuro kyɛ ɔkɔhɔ Yerusalem ne, ɔkɔhora ne wɔ bɛkɔhɔ.

¹⁴Ofikyɛ me Atasɛsɛse, me ne me foɛtulɛfoɛ nzoo nemɔ yeɛ yasoma wɔ ɔ, kyɛ kɔ Yuda ne Yerusalem kɔtoto nningyein yé, kyɛbɔ wɔ Nyameɛ mmeraa bɔ otira wɔ sa nu ne okyire ne.

¹⁵Asa koso, ɛdwetɛ ne sikaa kɔkorɛ bɔ me Atasɛsɛse, me ne me foɛtulɛfoɛ mɔ yaye yɛ kunu yafa yabɔ afɔleɛ yama Yisrael Nyameɛ bɔ ɔte Yerusalem ne, fa boka so kɔ.

¹⁶Yeɛ ɛdwetɛ ne sikaa kɔkorɛ biala bɔ ekonya ye wɔ Babilɔn aseɛ so amukoraa ne, ɔne maen ne asɔfo akyɛdeɛ afɔleɛ bɔ bɛye bɛ kunu bɛbɔ bɛma bɛ Nyameɛ awuro bɔ ɔwɔ Yerusalem ne, fa boka so kɔ.

¹⁷Wɔ sa kã sɔ sikaa ne a, nea kyɛ ɛkɔfa kɔtɔ nandwie nyii mɔ, mmoaen nyii, mmoaen akrɔngrɔma, yeɛ b’aburoo afɔleɛ ne anonneɛ afɔleɛ. Na sɔ nningyein ne, fa bɔ afɔleɛ wɔ afɔleɛ bokyea bɔ ɔwɔ ɛmɔ Nyameɛ awuro wɔ Yerusalem ne aso.

¹⁸Afei, ɛdwetɛ ne sikaa kɔkorɛ bɔ ɔkɔha ne, nikyee biala bɔ ɛne eliɛma nemɔ bekuro kyɛ bɛfa bɛyɔ ne, ɛ́mɔfa bɛ́yɔ ye kyɛbɔ ɛmɔ Nyameɛ apɛdeɛ te ɔ.

¹⁹Kulie mɔ bɔ bafa bawura wɔ sa kyɛ ɛɛfa yɔ wɔ Nyameɛ awuro ɛsɔnenɛ adwuma ne, fa kogua Nyameɛ bɔ ɔwɔ Yerusalem ne nyunu.

²⁰Wɔ Nyameɛ awuro ne, nikyee biala bɔ waha bɔ ekohia kɔfa kɔyɔ ye nwo adwuma ne, de fi ahemvie fotoɛ ne anu.

²¹“Me Nana Atasɛsɛse, mahyɛ mmeraa he mama fotoɛsoneafoɛ amukoraa bɔ bɛwɔ asue Yufreti si mbɔtam kyɛ, nikyee biala bɔ ɔsɔfo Ɛsra bɔ ɔte nyameɛso Nyameɛ ye mmeraa ahyerɛlɛniɛ ne okobisa kofi ɛmɔ berɛ ne, ɛ́mɔnea kyɛ ɛmɔkɔma ye sa kɔhã ye ndɛndɛ ɔ;

²²sɛ ye somaa te ɛdwetɛ kilo apee nza ɛyaa nna, atokoɔ olonka apee ko, nzaa galɔn ɛyaa nnu ne aburannu, ngoo galɔn ɛyaa nnu ne aburannu, yeɛ ngyee buburugyaa po a.

²³Nyameɛso Nyameɛ ne, ahyɛdeɛ biala bɔ ɔkɔhyɛ kɔfa ye awuro ne anwo ne, odi kyɛ ɛmɔyɔ ye pɛpɛɛpɛ bɛma nyameɛso Nyameɛ ne. Anyɔ a, ɔkɔfɛ me Nana Atasɛsɛse, me ne me mma y’ahennie so yaa.

²⁴Yɛ́ma ɛmɔte kyɛ, sɛ ɛmɔde asɔfo nemɔ, anaa Lewifoɛ, anaa edweintolɛfoɛ, anaa anoa wɛmvoɛ, anaa asɔneyɛɛ sua nwo awɛmvoɛ, anaa Nyameɛ awuro he anwo somvoɛ biala toɔ, anaa ndɔ, anaa aseɛ nwo toɔ a, otia mmeraa.

²⁵“Na wɔ, Ɛsra, wɔ Nyameɛ nworɛ bɔ wafa wama wɔ ne, gyina so yeye edwirɛlilɛfoɛ ne maenbulɛfoɛ bɔ bɛse wɔ Nyameɛ mmeraa ne, bɔ bɛkɔla mmenia amukoraa bɔ bɛwɔ asue Yufreti si mbɔtam noa bɛkɔtoto nikyee biala pɛpɛɛpɛ ɔ. Bɛ bɔ bɛnze mmeraa ne koso, ɔsɛ kyɛ ɛmɔkyirekyire bɛ.

²⁶Na sona biala bɔ wanni wɔ Nyameɛ mmeraa ne aso, ɔne me, Nana Atasɛsɛse me mmeraa so ne, ɔsɛ kyɛ bebua ye fɔ bɛtwe ye so ndɛndɛ: kyɛ bekobua ye ewue foɛ oo, anaa bɛkɔpɛ ye asue oo, anaa bekole ye nwo nningyein oo, anaa bɛkɔto ye kuku nu oo.”

²⁷(Yeɛ Ɛsra sele kyɛ,) “AWURADE, yɛ nana mɔ Nyameɛ bɔ wafa sɔ adwene paa he wawura Nana Atasɛsɛse ti anu, kyɛ ɔfa siesie AWURADE awuro bɔ ɔwɔ Yerusalem maa ɔyɛ nyemene ne, animnyam hã ye,

²⁸ofikyɛ walo me wamaa manya animnyam wɔ Nana Atasɛsɛse ne ye foɛtulɛfoɛ ne ye mbanyi amukoraa bɛ nyunu. AWURADE me Nyameɛ lole me gyinane me si, na ɛhe hyɛle me nguraen. Na mmoaboale mbanyi bɔ bɛlela Yisrael noa maa yɛsa yɛwale.”