Read Sehwi Ɛsra 8 Bible Online

Ɛsra 8 - Sehwi bible

Ɛsra 8

¹Mbanyi bɔ bɛlela bɛ mmusua nemɔ noa, bɔ bɛ ne me fili Babilɔn wale wɔ Nana Atasɛsɛse aberɛ so ne, b’aworɛ ndoatoasoɛ ɛhe:

²Gɛsɔn bɔ ofi Finehase bosofoɛ nu, Daniel bɔ ofi Yitama bosofoɛ nu, Hatuse bɔ ofi Dawide bosofoɛ nu,

³Sekania bosofoɛ: Sakaria bɔ ofi Parose bosofoɛ nu, bɔ bɛhale mmienzua ɛyaa ko aburannu bɛbokale ye so ne.

⁴Pahate Moabo bosofoɛ nu: Serahia awa Eliehonae, bɔ mmienzua ɛyaa nyɔ boka ye so ɔ.

⁵Satu bosofoɛ nu: Yahasiɛl awa Sekania, bɔ mmienzua ɛyaa nza boka ye so ɔ.

⁶Adin bosofoɛ nu: Yonatan awa Ebede, bɔ mmienzua aburannu boka ye so ɔ.

⁷Elam bosofoɛ nu: Atalia awa Yehyaya, bɔ mmienzua aburasoo boka ye so ɔ.

⁸Sefatia bosofoɛ nu: Mikayɛl awa Sebadia, bɔ mmienzua aburawɔtwɛ boka ye so ɔ.

⁹Yoabo bosofoɛ nu: Yehiel awa Obadia, bɔ mmienzua ɛyaa nyɔ ne buru ne mmɔtwɛ boka ye so ɔ.

¹⁰Bani bosofoɛ nu: Yosifia awa Selomite, bɔ mmienzua ɛyaa ko aburasia boka ye so ɔ.

¹¹Bebae bosofoɛ nu: Bebae awa Sakaria, bɔ mmienzua aburanyɔ ne mmɔtwɛ boka ye so ɔ.

¹²Asegade bosofoɛ nu: Hakatan awa Yohanan, bɔ mmienzua ɛyaa ko ne buru boka ye so ɔ.

¹³Adonikam bosofoɛ nu, bɛ bɔ bɛwale nziɛ ye ne, bɛ dumaa ɛhe: Elifɛlɛte, Yeyiɛl ne Semaya, bɔ mmienzua aburasia boka bɛ so ɔ.

¹⁴Bigiwae bosofoɛ nu: Yutae ne Sakure, bɔ mmienzua aburasoo boka bɛ so ɔ.

¹⁵Mmoaboale bɛ noa wɔ asue bɔ ɔtengyɛ kɔ Ahawa ne anoa, na yɛkyekyele asikyeleɛ yɛlili berɛ ɛlɛsa. Nneaneane mmenia nemɔ ne asɔfo nemɔ nu, nakoso mannwu Lewi bosoniɛ biala berɛ.

¹⁶Yiti nzomane maa bɛɛfrɛle mbanyi Eliesa, Ariɛl, Semaya, Elnatan, Yaribo, Elnatan, Natan, Sakaria ne Mesulam, yeɛ akyerɛkyerɛfoɛ Yoaribo ne Elnatan.

¹⁷Na Yido bɔ ɔte panyi wɔ Kasifia ne, nzomane bɛ maa bɛhɔle ye berɛ. Mvale ngraa mane bɛ kyɛ beese Yido ne oliɛma mɔ asɔneyɛɛ sua nu somvoɛ nemɔ bɔ bɛwɔ Kasifia ne kyɛ, asɔfo mɔ bɔ bɛkɔyɔ ɛsɔnenɛ adwuma wɔ Nyameɛ awuro ne, bɛma bɛbra yɛ wa.

¹⁸Na ɔnate kyɛ yɛ Nyameɛ lole yɛ ne ati, bɛmane biaa bie bɔ oli Serebia wale. Ɔte Yisrael awa Lewi ɔwa Maheli ye bosoniɛ. Ɔne ye mma mɔ ne ye mmango Lewifoɛ, bɛte buru ne mmɔtwɛ.

¹⁹Besa bɛmane Hasabia ne Yehyaya bɔ bɛte Merari bosofoɛ ne bɛwale. Bɛ ne bɛ mmango Lewifoɛ ne bɛ mma mɔ, bɛte aburanyɔ.

²⁰Asa koso, asɔneyɛɛ sua nu somvoɛ mɔ ɛyaa nyɔ ne aburanyɔ bɔ Dawide ne ye mbanyi betuli bɛ besiele berɛ kyɛ bɛbokaboka Lewifoɛ mɔ ne, bɛ koso bɛmaa bɛwale. Bɛ mukoraa bɛhyerɛle bɛ dumaa.

²¹Yeɛ mva ndole dwaa wɔ asue Ahawa noa berɛ, kyɛ ɔsɛ kyɛ ebiala yɛ akɔngyere ɔbrɛ ye nwo ase wɔ Nyameɛ nyunu, ná yɛsrɛ ye maa ɔbɔ yɛ ne yɛ mma mɔ ne yɛ nningyein mukoraa nwo waen wɔ y’ateetulɛ ne anu.

²²Na ɔyɛle me nya kyɛ ngɔsrɛ Nana Atasɛsɛse kyɛ ɔma yɛ koɛhonɛfoɛ ne pɔngɔhanɛfoɛ bɔ bɛkɔbɔ yɛ nwo waen bekofi yɛ pɔfoɛ mɔ sa nu wɔ atunu ɔ, ofikyɛ né yali moa yahã yahyire ye kyɛ, “Sona biala bɔ ɔpena yɛ Nyameɛ si atee ne, Nyameɛ do ye ɔbɔ ye nwo waen. Nakoso ebiala bɔ ɔpo Nyameɛ nen, Nyameɛ tumi ne ye yaafɛlɛ ko tia ye.”

²³Yiti yɛyɛle akɔngyere yɛfale sɔ dwirɛ ne yɛtole yɛ Nyameɛ nyunu, na otiele yɛ mbaeɛ ne.

²⁴Afei, asɔfo mbanyi nemɔ, nneaneane nu nyele bɛ nu buru ne nyɔ. Bɛ ole: Serebia, Hasabia, yeɛ bɛ mmango Lewifoɛ buru bɔ bɛboka bɛ so ɔ.

²⁵Na Nana Atasɛsɛse ne ye foɛtulɛfoɛ ne ye mbanyi ne Yisraelfoɛ bɔ bɛwɔ berɛ amukoraa ne, ɛdwetɛ ne sikaa kɔkorɛ ne nningyein bɔ bɛfa bɛbɔle afɔleɛ kyɛ yɛfa yɛyɔ yɛ Nyameɛ awuro ne anwo adwuma ne, ngarili mva nwurale asɔfo nemɔ sa.

²⁶Bɔ ngarili mva nwurale bɛ sa ɛhe: ɛdwetɛ kilo apee aburanyɔ ne nyɔ, ɛdwetɛ nningyein kilo apee nza ɛyaa nna, sikaa kɔkorɛ kilo apee nza ɛyaa nna,

²⁷sikaa kɔkorɛ kulie mɔ bɔ nu nonɛ te kilo mmɔtwɛ ne bue, yeɛ kɔɔbere nningyein hyɛmhyɛm nyɔ bɔ bedi mu te kyɛ sikaa kɔkorɛ ɔ.

²⁸Na nga ngyirele bɛ kyɛ, “Ɛmɔte krongron ma AWURADE, nningyein nemɔ te nningyein krongron, yeɛ ɛdwetɛ ne ne sikaa kɔkorɛ ne, bɛte akyɛdeɛ afɔleɛ ma AWURADE ɛmɔ nana mɔ Nyameɛ ne.

²⁹Odi kyɛ ɛmɔfa besie yé kɔpem kyɛ ɛmɔkɔkari bɛ wɔ asɔfo mbanyi ne Lewifoɛ ne Yisrael mmusua mbanyi nyunu, wɔ AWURADE awuro berɛ pumbu ne anu wɔ Yerusalem ɔ.”

³⁰Na asɔfo nemɔ bɛ ne Lewifoɛ nemɔ belele ɛdwetɛ, sikaa kɔkorɛ ɔne nningyein bɔ ngarili mane bɛ ne, kyɛ bɛkɔfa bɛkɔwa yɛ Nyameɛ awuro wɔ Yerusalem.

³¹Bosome bɔ oli moa ne, ye kyẽa bɔ ɔtɔ so buru ne nyɔ ne, yeɛ yɛtuli yɛ bo yɛfili asue Ahawa noa kyɛ yɛkɔ Yerusalem ɔ. Yɛ Nyameɛ gyinane yɛ si, na ɔpepɛ lele yɛ fili pɔfoɛ mɔ ne mmenia bɔ bɛɛtetɛle yɛ atunu nemɔ sa nu.

³²Yɛɛdwuli Yerusalem, na yɛlili berɛ ɛlɛsa.

³³Ye ɛlɛnna ne aso, yɛkarili ɛdwetɛ ne, sikaa kɔkorɛ ne, ɔne nningyein ne wɔ yɛ Nyameɛ awuro berɛ, na yɛfa yɛwurale Yuria awa ɔsɔfo Meremote sa. Né Finehase awa Eleasa boka ye so wɔ berɛ. Né Yesua awa Yosabade ne Binuyi awa Noadia bɔ bɛte Lewifoɛ ne koso bɛboka bɛ so wɔ berɛ.

³⁴Ye mukoraa, ye somaa ne nu nonɛ ne, bɛhyerɛle ye sɔ mmerɛ ne ala.

³⁵Sɔ mmerɛ ne, bɛ bɔ befili nnurehyelɛ nu besa bɛwale ne, bɛbobɔle naen yeralɛ afɔleɛ bɛmane Yisrael Nyameɛ. Begyinane Yisrael amukoraa gya nu bɛfale ɛhemɔ bɛbɔle afɔleɛ: nandwie nyii buru ne nyɔ, mmoaen nyii aburahona ne nzia, yeɛ mmoaen mmaa aburasoo ne nzoo. Besa bɛfale mbɔngye buru ne nyɔ bɛbɔle bɔne nwo afɔleɛ. Bɛfale ye mukoraa bɛbɔle naen yeralɛ afɔleɛ bɛmane AWURADE.

³⁶Asa koso, Nana Atasɛsɛse mmeraa bɔ ɔhyerɛle ye krataa nu ne, bɛye bɛmane ye mbɔtam mbanyi mɔ ne amrado mɔ bɔ begyi ye gya nu wɔ asue Yufreti si dɔ mbɔtam ne. Na bɛ koso bɛfale bɛ mmokalɛ bɛtale maen ne ne Nyameɛ awuro ne si.