Read Sehwi Ɛsra 9 Bible Online

Ɛsra 9 - Sehwi bible

Ɛsra 9

¹Yɛyɔle ɛhemɔ amukoraa yɛyiele nen, Yisrael mbanyi wale me berɛ beesele kyɛ, “Yisraelfoɛ, bɔ asɔfo ne Lewifoɛ mɔ boka so ɔ, bande bɛ nwo bamvi mmenia bɔ bɛwɔ aseɛ nemɔ aso bɔ bɛ yɔleɛ te akyiwadeɛ ne anwo. Sɔ mmenia nemɔ ole: Kanaanfoɛ, Hitifoɛ, Perisifoɛ, Yebusifoɛ, Amonfoɛ, Moabofoɛ, Misraimfoɛ ne Amorifoɛ.

²Ofikyɛ bagyigya bɛ mma mmrasua nemɔ bie, yeɛ bagyigya bie koso bama bɛ mma mmienzua mɔ. Ɔnate sɔ ati, mmenia krongron mɔ ne aseɛ nemɔ so ama bali afra. Na mbɔtam mbanyi ne mbanyi bɔ bɛla yɛ noa nemɔ po yeɛ bapɛ sɔ esaa tɛɛ ne bato berɛ ɔ.”

³Ndele sɔ dwirɛ nen, nzunzuale m’ataadeɛ ne m’ataadeɛ aguasoɛ nu, ndutuli me ti nwiaa ne me kanza nwiaa, na mvale aworabɔlɛ mbofole aseɛnwo berɛ.

⁴Bɛ bɔ befili nnurehyelɛ nu bɛwale ne, ɔnate bɛ mvomsoɛ ne ati, mmenia mukoraa bɔ Yisrael Nyameɛ dwirɛ ne mane bɛ nwo dwirili bɛ ne, bɛɛtenatenane me nwo berɛ, na mvale aworabɔlɛ mbofole berɛ toonn maa oodwuli mmerɛ bɔ bɛbɔ nɔsoa afɔleɛ ne ɔ.

⁵Odwuli mmerɛ bɔ bɛbɔ nɔsoa afɔleɛ nen, mvili nekaa bɔ né maatena medi aworabɔlɛ ne ndwɔsole, bɔ né masunzua m’ataadeɛ ne m’ataadeɛ aguasoɛ nu ɔ. Mmuli ndwerɛ, ndrɛle me sa nu mɔle mbaeɛ ngyirele AWURADE me Nyameɛ,

⁶na nzele kyɛ, “O me Nyameɛ, ɔyɛ me nya paa, na mafɛre kyɛ ngɔpagya me nye ngɔnea wɔ ɔ. Ofikyɛ me Nyameɛ, y’amumuyɛɛ wasone pee, na yɛ mvomsoɛ wadwu nyameɛso.

⁷Fite yɛ nana mɔ aberɛ so toonn bɔ ɔbaadwu ɛnɛ ɔ, mvomsoɛ ali yɛ ti. Na ɔnate yɛ ne y’ahemvo mɔ ne y’asɔfo mɔ amumuyɛɛ ti, yeɛ Amaenmaensofoɛ ahemvo mɔ bɛ sa ahã yɛ bɔ beku yɛ, bɛkye yɛ nnure, bɛfẽ yɛ nningyein bɛfa, ná begua yɛ nyunu ase, kyɛbɔ kekesaala ye ɔte ye.

⁸Nakoso mmerɛ kãa ye anu de, AWURADE yɛ Nyameɛ walo yɛ. Wama yɛ ngaa ne yanya yɛ ti yadidi nu, na wabɔ yɛ atenaseɛ wɔ ye nekaa krongron berɛ, kyɛ ɔfa kyekye yɛ wora ná ɔma yɛ nwo tɔ yɛ kãa fi nganga tebea bɔ yahɔ nu ne anu.

⁹Ɔwɔ nu kyɛ yayɛ nganga de, nakoso yɛ Nyameɛ anye ye sa wamvi yɛ bo wɔ yɛ ngangayɛlɛ ne anu. Mmom, wama Pɛsia ahemvo banwu yɛ anwumvoin. Na ɔnate so bama yɛ ate kyɛ yɛsa yɛsi yɛ Nyameɛ awuro ne, kyɛ yɛhyehyɛ ye nekaa bɔ wabubu ne, na wabɔ yɛ nwo waen wɔ Yuda ne Yerusalem.

¹⁰“O afei yɛ Nyameɛ, ɛhemɔ asi ye, nzikyɛ dwirɛ bieku koraa yeɛ yɛhã ɔ? Yapo wɔ mmeraa dwirɛ

¹¹bɔ ɛnate wɔ somvoɛ mɔ so ɛhyɛle kyɛ, ‘Aseɛ bɔ ɛmɔkwaafa bɛtena so ne, ɔte aseɛ bɔ so ama nemɔ bafa bɛ bra fiɛ ne b’akyiwadeɛ yɔleɛ bahã ye ɔ. Bafa bɛ yɔleɛ fiɛ bayi ye tɛkyɛ fi ye ti kɔka ye ti.

¹² Yiti nnɛma ɛmɔfa ɛmɔ mma mmrasua bɛma bɛ mma mmienzua mɔ begya, yeɛ nnɛma ɛmɔgyigya bɛ mma mmrasua bɛma ɛmɔ mma mmienzua. Nnɛma ɛmɔpena bɛ ne asomdwee anaa paa, amaa ɔnate so ɛmɔ nwo ayɛ se, ná ɛmɔali aseɛ ne aso nningyein paa, ná ɛmɔafa bayakyi ɛmɔ mma mɔ maa wayɛ agyapadeɛ afebɔɔ.’

¹³Yɛ bɔne ne y’amumuyɛɛ kandinga ne ati yeɛ ɛhemɔ atoto yɛ ɔ. Nakoso ɛhe asi ye po, wɔ, yɛ Nyameɛ, y’amumuyɛɛ nwo asohwenɛ bɔ afa ama yɛ ne ɔte kãa, na ama yɛ ngaa ne yanya yɛ ti yadidi nu.

¹⁴Aso odi kyɛ yɛbu wɔ mmeraa dwirɛ ne aso bieku, bɔ yɛne mmenia bɔ bɛbɔ sɔ akyiwadeɛ bra ne yagyigya yɛ nwo ɔ? Aso ɛngɔfɛ yɛ so yaa toonn kɔpem kyɛ ekohũhũ yɛ bɔ yɛ nu biala ngɔha anaa ongonya ye ti ngodidi nu ɔ?

¹⁵O AWURADE Yisrael Nyameɛ, ɛtengyɛ, ofikyɛ ama yɛ ngaa ne yanya yɛ ti yadidi nu, kyɛbɔ kekesaala ye ɔte ye. Yɛ amumuyɛɛ nu yeɛ yɛwɔ wɔ nyunu ɔ, ɔwɔ nu kyɛ ebiala ngɔhora ngɔfa sɔ amumuyɛɛ ne ngogyina wɔ nyunu.”