Read Sehwi Nehemia 1 Bible Online

Nehemia 1 - Sehwi bible

Nehemia 1

¹Hakalia awa Nehemia, ye noa dwirɛ ɛhe. Afoɛ bɔ ɔtɔ so aburanyɔ ne, bosome bɔ bɛfrɛ ye Kislewi ne anu, ɛlɛho bie, né nwɔ Susa ahemvie.

²Na nniɛma nemɔ anu ko bɔ bɛfrɛ ye Hanani, ɔne mmenia biemɔ befili Yuda bɛwale. Mmisale bɛ Yudafoɛ bɔ baha dɔ bɔ bɛ de bangye bɛ nnure bangɔ bie ne, ɔne Yerusalem kuro ne, bɛ nwo dwirɛ.

³Na bɛbɔle me amaneɛ kyɛ, “Mmenia bɔ bangye bɛ nnure bangɔ bie, ná bɛwɔ maen ne anu ne, amaneɛ ne animguaseɛ kandinga paa ato bɛ. Pɔfoɛ nemɔ babubu Yerusalem fasue ne bagua, yeɛ ye pambim nemɔ koso bato nu see bayera bɛ.”

⁴Na ndele sɔ dwirɛ ne nen, ndenane ase nzuni, nnili aworabɔlɛ ngyẽa pee, na nyɛle akɔngyere mmɔle mbaeɛ wɔ nyameɛso Nyameɛ ne nyunu.

⁵Na ngane kyɛ, “Ao AWURADE, nyameɛso Nyameɛ, Nyameɛ piri bɔ wɔ nwo yɛ suro bɔ edi apam so ná ɛye ɔdɔ bɔ onni ngasi ali kyire bɛ bɔ bekuro wɔ dwirɛ ná bedi wɔ mmeraa dwirɛ ne aso ne,

⁶mesrɛ wɔ, yɛ asoɛ tie, ná fa wɔ nye nea, amaa ate w’akoaa me mbaeɛ bɔ mebɔ wɔ wɔ nyunu kekesaala ye mema wɔ ngoaa Yisraelfoɛ eyia ne kɔngɔen ne. Afei, Yisraelfoɛ, yɛ bɔne bɔ yayɔ yatia wɔ ne, mekã mekyire wɔ. Me ne me baba awuro ama amukoraa, nahorɛ nu, yayɔ bɔne.

⁷Yayɔ bɔne kandinga paa yatia wɔ, na mmeraa dwirɛ ne ahyɛdeɛ ne nhyehyɛleɛ bɔ ɛhyehyɛle mane wɔ somvoɛ Mose ne, yanni so.

⁸Kaye ahyɛdeɛ bɔ ɛfa mane wɔ somvoɛ Mose kyɛ, ‘Sɛ ɛmɔanni nahorɛ bamma me a, ngɔbɔ ɛmɔ ngɔsande ngɔhɔ maen maen nemɔ aso,

⁹ nakoso sɛ ɛmɔsa bɛba me berɛ, ná ɛmɔdi me mmeraa dwirɛ so a, ye de aseɛ ye aso nekaa biala bɔ mama ɛmɔ babɔ aya baagua ne, ngɔboaboa ɛmɔ noa ngofi dɔ; ná mafa ɛmɔ mawa nekaa bɔ maye masie berɛ mafa me dumaa mato so ne.’

¹⁰Bɛte wɔ somvoɛ mɔ ne wɔ maen bɔ afa wɔ tumi piri ne w’anwoserɛ kandinga ne apepɛ ale bɛ ɔ.

¹¹Ao AWURADE, wɔ somvoɛ ne wɔ somvoɛ mɔ bɔ bɛ nye gye kyɛ bɛkɔfa anidie bɛkɔma wɔ dumaa ne, mesrɛ wɔ tie yɛ mbaeɛ. Ma nningyein ɔhɔ so yé ɔma wɔ somvoɛ, ná ma biaa ye onwu me anwumvoin.” Sɔ mmerɛ ne, né nde Ɛhene ne, ye nzaasulɛniɛ.