Read Sehwi Nehemia 2 Bible Online

Nehemia 2 - Sehwi bible

Nehemia 2

¹Nana Atasɛsɛse lili bia ne, ye afoɛ bɔ ɔtɔ so aburanyɔ ne anu, bosome bɔ bɛfrɛ ye Nisan ne anu, ɛlɛho bie, né nzaa gyi Nana nyunu, na nzuli ye. Sɔ mmerɛ ne, né Nana Atasɛsɛse onnwuni kyɛ me wora abɔ wɔ ye nyunu le.

²Yiti Nana bisale me kyɛ, “Ɛte apɔ, nakoso nzu ati yeɛ wɔ nyunu ayɛ bosaa ye? Ɛhe de nna hwee ɔ, wɔ wora mmom yeɛ wabɔ ɔ.” Na ɛhe mane ɛserɛ hane me paa.

³ Na nzele Nana kyɛ, “Nana, wɔ ngoa so oo! Ɔkɔyɛ sɛɛ bɔ me wora ngɔbɔ ɔ, wɔ aberɛ bɔ kuro bɔ me nana mɔ asieleɛ wɔ so ne, wabɔ bɔ bafa see bayera ye pambim mɔ ɔ?”

⁴Yeɛ Nana bisale me kyɛ, “Nzikyɛ yeɛ ɛpena kyɛ meyɔ mema wɔ ɔ?” Yiti mmɔle mbaeɛ ngyirele nyameɛso Nyameɛ bɔ ɔwɔ nyameɛso ne.

⁵Yeɛ mmuale Nana kyɛ, “Nana, sɛ ɛpene so, ná anya alo wɔ somvoɛ de a, ye de mesrɛ kyɛ ma me ate maa ngɔ Yuda, kuro bɔ me nana mɔ b’asieleɛ wɔ so ne aso, ná nza ngɔngyekye kuro ne.”

⁶Na Nana Atasɛsɛse bisale me kyɛ (sɔ mmerɛ ne, né ɛhemmaa ne ɔte ye nwo berɛ), “Ekoli ɛlɛnyɛɛ, ná kyinzu yeɛ ekosa kɔwa ɔ?” Yiti Nana Atasɛsɛse mane me ate, na nhyɛle kyẽa bɔ ngosa ngɔwa ɔ.

⁷Yeɛ nzele Nana Atasɛsɛse kyɛ, “Nana, sɛ ɛpene so a, maa bɛhyerɛ ngrataa maa ngɔmva mma Asue si dɔ mbɔtam amrado nemɔ, maa bɛma me ate maa mbɛ nu ngɔ kɔpem kyɛ ngodwu Yuda ɔ.

⁸Afei, Nana, kyerɛ krataa maa ngɔma Asafe bɔ ɔnea wɔ ɛhɔayeɛ ne aso ne, kyɛ ɔma me mmakaa maa mva nyɔ asɔneyɛɛ sua abandenden pambim mbuna nemɔ, kuro berɛ fasue pambim nemɔ ɔne awuro bɔ mekwaatena nu ne anoa nemɔ.” Na nningyein bɔ nzrɛle ne, Nana Atasɛsɛse fa mane me, ofikyɛ né me Nyameɛ bɔ ɔdo sona ne, né ogyi me si.

⁹Yeɛ amrado mɔ bɔ bɛnea asue ne asi dɔ mbɔtam nemɔ aso ne, ngondwuli bɛ berɛ, na mvale Nana ngrataa nemɔ mmane bɛ. Né Nana Atasɛsɛse watu koɛhonɛfoɛ mbanyi ne pɔngɔhanɛfoɛ kyɛ bɛboka me so bɛ ne me bra.

¹⁰Nakoso Horonniɛ Sanbalate ne Amonniɛ Tobia bɔ ɔte somvoɛ ne, bɛtele bɔ ɔkɔ so ne, ɔyɛle bɛ yea paa kyɛ ebie awa bɔ ɔbaapena Yisraelfoɛ bɛ yeeyɛlɛ ɔ.

¹¹Yiti mmandwuli Yerusalem, na nnili berɛ ɛlɛsa.

¹²Ɛhe asi ye, ndwɔsole kɔngɔen. Né mmenia kãa bie yeɛ bɛboka me so ɔ. Na nikyee bɔ Nyameɛ akanyane me kyɛ nyɔ ma Yerusalem ne, mangã mangyire ebiala. Né kaka biala ɔbboka me so, sana kaka bɔ nde ye so ne ala.

¹³Nzili nu kɔngɔen mvale Bɔnza Pambim ne anu ndrale Sasrabɔnzam mbombonzue ne anwo ngɔle Fofoɛ Pambim ne anwo, na ngɔneane Yerusalem fasue mɔ bɔ badwiri bɛ bagua ase, ɔne ye pambim mɔ bɔ bafa see bayerayera bɛ nemɔ.

¹⁴Yeɛ ndoale so ngɔle Abura Pambim ne anwo ne Ɛhene Ɛkwaa ne anwo, na kaka bɔ nde so ne wanya nekaa fee wamva.

¹⁵Yiti mvo mvale bɔnza ne anwo kɔngɔen ngɔneaneane fasue ne. Afei ngakyili me nwo mmamvale Bɔnza Pambim ne anu, na nzale me si.

¹⁶Né mbanyi nemɔ, bɛnze nekaa bɔ ngɔle ɔ, yeɛ bɛnze nikyee bɔ ngɔnyɔle ɔ. Yudafoɛ, asɔfo nemɔ, atitirefoɛ nemɔ, mbanyi nemɔ, bɛ ne mmenia ngaa nemɔ bɔ odi kyɛ bɛyɔ adwuma ne, né nya mmɔle bɛ amaneɛ.

¹⁷Yeɛ nga ngyirele bɛ kyɛ, “Ɛmɔanwu edwirɛ bɔ wato yɛ ye: kyɛbɔ Yerusalem wakakyi kurofoen, bɔ ye pambim nemɔ koso bato nu see ɔ. Ɛ́mɔdwɔso maa yɛsa yɛkyekye Yerusalem fasue ne, amaa yɛ nyunu wangɔ so wangua ase.”

¹⁸Ngane kyɛbɔ me Nyameɛ walo me wagyina me si, ɔne edwirɛ bɔ Nana Atasɛsɛse wahã wahyire mene ngyirele bɛ. Na bɛhane kyɛ, “Ɛ́mɔma yɛdwɔso yɛsi!” Yiti bɛfale bɛ nwo belele sɔ adwuma paa ne anu.

¹⁹Nakoso Horonniɛ Sanbalate, Amonniɛ Tobia bɔ ɔte somvoɛ ne, yeɛ Araboniɛ Gesem bɛtele bɔ ɔkɔ so nen, bɛserele yɛ bɛgorole yɛ nwo kyɛ, “Na nzikyɛ yeɛ ɛmɔkyire ye? Ɛmɔyɛ Nana nwo lɔen anaa?”

²⁰Yeɛ mmuale bɛ kyɛ, “Nyameɛso Nyameɛ, ye yeɛ ɔkɔmaa yɛkoli ngonim ɔ. Yɛte ye ngoaa mɔ, na yɛkodwɔso yɛkosi. Nakoso ɛmɔ de, ɛmɔlle kyɛfa anaa agyapadeɛ anaa ngayeɛ biala wɔ Yerusalem nu.”