Read Sehwi Nehemia 4 Bible Online

Nehemia 4 - Sehwi bible

Nehemia 4

¹Mmerɛ bɔ Sanbalate tele kyɛ yɛsi fasue ne, ye ahone huli, na ɔfɛle yaa paa. Ɔhane Yudafoɛ nemɔ anyinga,

²na ɔhane wɔ ye mmango nemɔ ɔne Samaria koɛhonɛfoɛ nemɔ anyunu kyɛ, “Yudafoɛ bɔ bɛ nwo anwumvoin hemɔ, nzikyɛ yeɛ bɛyɔ ye? Aso bekosa bɛkɔtoto nningyein ye anaa? Aso bɛkɔbɔ afɔleɛ anaa? Aso bekoyie adwuma ye ɛlɛho? Nyɔboɛ bɔ wadwiri wagua wahonhɔn wahɔ anwuro bɔ see ayera ye ye, aso bekonya nyɔboɛ bekofi nu?”

³Né Amonniɛ Tobia gyi Sanbalate nwo berɛ, na osele kyɛ, “Nyɔboɛ fasue bɔ besi ye, sɛ safuboa po fo so a, okodwiri kogua ase!”

⁴(Na mmɔle mbaeɛ kyɛ), “Yɛ Nyameɛ, tie, ofikyɛ bemmu yɛ kyɛ yɛte mmenia po. B’anyinga bɔ bɛkã yɛ ne, maa ɔbɔ bɛ bɔbɔ bɛ ti so, na maa ebiemɔ bɛfa bɛ kyɛ koɛ nu nzesadeɛ bɛhye bɛ nnure bɛhɔ maen foforɛ aso.

⁵Nnebu wɔ nye gua b’amumuyɛɛ so. Nnɛma bɛ bɔne kyikyi fi wɔ nyunu, ofikyɛ bagyina suasilɛfoɛ nemɔ nyunu bawura wɔ apue maa afɛ yaa.”

⁶Yiti yɛsili fasue ne, na yɛtoatoale ye mukoraa so maa ɔhã sili, na kyɛbɔ odi kyɛ ɔkɔ anwuro ne, yɛsili maa odwuli ye afia, ofikyɛ mmenia ne yele bɛ kunu bɛyɔle adwuma ne.

⁷Nakoso Sanbalate ne Tobia yeɛ Arabofoɛ, Amonfoɛ ne Asedɔdefoɛ bɛtele kyɛ Yerusalem fasue ne silɛ ɔkɔ so, ná yahyɛ ye bo yɛtuatua nu ndokuro nen, bɛfɛle yaa paa,

⁸na bɛ mukoraa bɛbɔle porɛ kyɛ bɛkwaafa koɛ bɛteta Yerusalem ná bɛyɛ basabasa wɔ kuro ne anu.

⁹Yiti yɛbɔle mbaeɛ yɛhyirele yɛ Nyameɛ, na yɛyele awɛmvoɛ kyɛ bɛbɔ yɛ nwo waen befi bɛ sa nu eyia ne kɔngɔen.

¹⁰Nakoso Yudafoɛ sele kyɛ, “Bɛ bɔ bɛsesa kungumaboɔ ne befi berɛ ne, b’anwoserɛ so ate, na kungumaboɔ ne somaa ti, yɛngora yɛnyɔ fasue ne nwo adwuma.”

¹¹Na yɛ pɔfoɛ nemɔ hane kyɛ, “Bɛ nye kɔwa bɛ nwo so ne, né yahɔ bɛ so yahũhũ bɛ maa adwuma ne bo apɛ.”

¹²Yudafoɛ bɔ bɛte bepingye pɔfoɛ nemɔ ne, bɛwale bɛɛbɔle yɛ amaneɛ pɛen buru kyɛ, “Bekofi nekaa bɔ bɛtete ne amukoraa bɛkɔfa koɛ bɛkɔɔtoa yɛ.”

¹³Yiti fasue ne nekaa bɔ ɔwɔ ase ne, ye si dɔ, nekaa bɔ ndokuro lela nu ne, mmane mmenia beegyinane dɔ mmusua mmusua bɔ né betiratira bɛ ngrandɛ, bɛ pealɛɛ ne b’agyaen ɔ.

¹⁴Na nneane bɔ ɔkɔ so ne, ndwɔsole nga ngyirele atitire nemɔ, mbanyi nemɔ ne maen ne ngaa ne kyɛ, “Nnɛma ɛmɔsuro bɛ. Ɛ́mɔkaye AWURADE bɔ ɔte piri bɔ ye nwo yɛ suro ne, ná ɛ́mɔho bɛpepɛ bele ɛmɔ abusuafoɛ, ɛmɔ mma mmienzua, ɛmɔ mma mmrasua, ɛmɔ aye mɔ ɔne ɛmɔ awuro ama.”

¹⁵Na yɛ pɔfoɛ mɔ tele kyɛ yate bɛ porɛ bɔ babɔ ne, na afei Nyameɛ ama bɛ nzusuleɛ ayɛ mbaen ne, yɛ mukoraa yɛsa yɛhɔle fasue ne anwo, na ebiala ɔɔtoale ye adwuma so.

¹⁶Ofi sɔ kyẽa ne, me somvoɛ nemɔ, bɛ bue bɛyɔle fasuesilɛ adwuma ne, yeɛ bɛ bue koso betiratirale pealɛɛ, akokyɛm, agyaen ne akodeɛ mɔ, na mbanyi nemɔ beegyinagyinane Yuda awuro ama amukoraa bɛ si.

¹⁷Sɔ Yudafoɛ nemɔ yeɛ né besi fasue ne ɔ. Bɛ bɔ né bɛsoasoa ne, sɔa yeɛ bɛyɔle adwuma ne ɔ: bɛ nu biala fale ye sa ko yɔle adwuma, yeɛ ɔfale ko koso tirale akodeɛ nu.

¹⁸Adwumayɔlɛfoɛ ne, begu so besi sua nen, né ebiala wafa ye ngrandɛ wasi. Biaa bɔ ohu totorobɛndo ne, né ogyi me nwo berɛ.

¹⁹Na nga ngyirele atitire nemɔ, mbanyi nemɔ ne maen ne ngaa ne kyɛ, “Adwuma ne te piri, na ɔtrɛ paa, na yɛ koso yɛmbingyembingye yɛ nwo wɔ fasue ne anwo; yɛ nu atete.

²⁰Yiti nekaa biala bɔ ɛmɔkɔte totorobɛndo nga ne, ɛmɔhã bɛ nwo bɛbra yɛ nwo berɛ. Yɛ Nyameɛ kɔho kɔma yɛ.”

²¹Yiti yɛyerele yɛ nwo yɛyɔle adwuma ne, na yɛ nu bue betiratirale pealɛɛ fi alebahyene maa oodwuli mmerɛ bɔ nzramaa fite ɔ.

²²Afei koso sɔ mmerɛ ne, nga ngyirele maen ne kyɛ, “Odi kyɛ bienzua biala ne ye somvoɛ bɛda Yerusalem kɔngɔen biala, amaa bawɛne yɛ kɔngɔen, ná bayɔ adwuma eyia.”

²³Yiti me oo, nniɛma nemɔ oo, me somvoɛ nemɔ oo, awɛmvoɛ bɔ beli me si nemɔ oo, yɛ nu biala wanye ye ndaadeɛ wangua berɛ le. Na ebiala fale ye akodeɛ tirale.