Read Sehwi Nehemia 5 Bible Online

Nehemia 5 - Sehwi bible

Nehemia 5

¹Sɔ mmerɛ ne anu, mmenia ne pee ne bɛ ye mɔ, bɛfɛle yaa bɛhane kyɛ edwirɛ bɔ b’eliɛma mɔ Yudafoɛ bɛfa bedi bɛ ne, ɔnyɛ bɛ fɛ.

²Ofikyɛ bɛ nu biemɔ hane kyɛ, “Yɛ ne yɛ mma mmienzua ne yɛ mma mmrasua, yɛsone. Odi kyɛ yɛnya aleɛ yɛdi ná yanya ngoa.”

³Yeɛ bɛ nu biemɔ koso hane kyɛ, “Ɔnate ɛhɔen kandinga ne ati, yafa yɛ boo mɔ, yɛ bobe boo mɔ, yeɛ y’awuro mɔ yasi awowaa yapena yɛ noa aleɛ.”

⁴Na né ebiemɔ koso bɛkekã kyɛ, “Ɛtoɔ bɔ odi kyɛ yɛtua yɛma Nana wɔ y’aseɛ ne yɛ bobe boo nwo ne, ɔyɛ a yɛbɔ bosea koraka né yatua.

⁵Yɛne y’eliɛma Yudafoɛ ne, yɛ mukoraa yɛte sona ko. Yɛ mma te kyɛ bɛ mma deɛ mɔ ala. Nakoso yɛhyɛ yɛ mma mmienzua ne yɛ mma mmrasua mɔ maa bɛyɛ nganga, na yɛ mma mmrasua nemɔ bie de yali moa yatɔne bɛ. Yɛyɔ ye nwo hwee a ɔnyɛ ye, yeɛ y’aseɛ ne yɛ bobe boo mɔ ayɛ ebiemɔ deɛ.”

⁶Ndele bɛ kwaadu ne sɔ dwirɛ bɔ ɔha bɛ ne, mvɛle yaa paa.

⁷ Na ndwene ye nwo alaa nen, mmɔle atitire ne mbanyi nemɔ kwaadu nzele bɛ kyɛ, “Ɛmɔde nzihoɛ befi ɛmɔ bɔbɔ deinn ɛmɔ aliɛma mɔ berɛ!” Na mmɔle dwaa kandinga kyɛ mene bɛ koli,

⁸na nzele bɛ kyɛ, “Y’eliɛma Yudafoɛ bɔ batɔne bɛ bama Amaenmaensofoɛ mɔ ne, yabɔ mmɔden bɔ yɛkɔhora biala yapɔ bɛ. Nakoso afei de ɛmɔtɔne ɛmɔ bɔbɔ ɛmɔ aliɛma Yudafoɛ bɛma Yudafoɛ maa yɛsa yɛkɔpɔ bɛ!” Bɛyɛle konn, na né bennwu dwirɛ bɔ bɛhã ɔ.

⁹Yiti ngane kyɛ, “Nikyee bɔ ɛmɔyɔ ne, ɔtte mayee. Aso onni kyɛ ɛmɔsuro yɛ Nyameɛ, amaa ɔnate so maen maen mɔ bɔ bɛte yɛ pɔfoɛ ne, bangoro yɛ nwo ɔ?

¹⁰Afei koso, mene nniɛma mɔ ne me somvoɛ mɔ yɛma bɛ esikaa ne aleɛ. Ɛ́mɔma yɛyakyi nzihoɛlelɛ ne.

¹¹B’aseɛ mɔ, bɛ bobe boo mɔ, bɛ olive boo mɔ, b’awuro mɔ, bosea nwo nzihoɛ, aburoo, nzaa ne ngoo bɔ ɛmɔale bafi bɛ berɛ ne, ɛnɛ deinn ɛ́mɔsa bɛfa bɛma bɛ.”

¹²Na bebuale kyɛ, “Yɛkosa yɛkɔfa sɔ nningyein nemɔ yɛkɔma bɛ. Yɛngole nzihoɛ ko, yeɛ yɛngɔma bɛngɔfa hwee bengosi awowaa ko. Yɛkɔyɔ kyɛbɔ ahã ne ala.” Yeɛ mvrɛle asɔfo nemɔ maa bɛtale ndaen bɛfoale bɔ bahyɛ bɔ kyɛ bɛkɔyɔ ne aso.

¹³Asa koso, esikaa abɔsoɛ bɔ ɔbɔ m’ataadeɛ ne anu ne, nye mboroporole nu. Na ngane kyɛ, “Ebiala bɔ wanni bɔhyɛ he aso ne, Nyameɛ ole ye sua ne ye agyapadeɛ ofi ye sa nu. Sɔaa yeɛ okole b’agyapadeɛ kofi bɛ sa nu maa bɛkɔbɔ hwea ɔ.” Yeɛ maen ne amukoraa sele kyɛ, “Yɛde yɛto nu”, na bɛyele AWURADE ayɛ. Na maen ne yɛle nikyee biala kyɛbɔ bahyɛ bɔ ne ala.

¹⁴Afei koso, ofi mmerɛ bɔ bɛfale me bɛyɛle Yuda aseɛ so amrado nen, ofi Nana Atasɛsɛse ahennie afoɛ bɔ ɔtɔ so aburanyɔ bɔ ɔkwaadwu ye afoɛ aburasa ne nyɔ ne aso ne, sɔ afoɛ buru ne nyɔ ne, me oo, nniɛma nemɔ oo, yɛ nu biala wanne aleɛ ndɔ bɔ odi kyɛ mmenia bɛfa bɛma amrado ne.

¹⁵Amrado mɔ bɔ belili me nyunu moa ne de, bɛfale anwokyere kandinga paa yeɛ bɛtole maen ne aso ɔ. Bedidele aleɛ ne nzaa befili mmenia ne berɛ, asora ɛdwetɛ sekel aburanna ne koso. Bɛ somvoɛ nemɔ po, bɛyɛle maen ne aso abakomasɛm. Nakoso me de, manyɔ sɔ, ofikyɛ mesuro Nyameɛ.

¹⁶Susu amba, nduli me nwo nziele berɛ mane fasue tolɛ adwuma ne, na mambena me ti anwo aseɛ biala. Me somvoɛ nemɔ amukoraa, mmaa bɛɛsɔle adwuma ne anu bie.

¹⁷Afei koso, Yudafoɛ mbanyi bɔ me yeɛ né mema bɛ bɛ noa aleɛ ne, bɛte ɛyaa ko aburannu, asora bɛ bɔ befili maen maen bɔ bapɛ yɛ nwo bayia ne aso ne.

¹⁸Nandwie nyii ko ne mmoaen bɔ balɔ ɔ nzia yeɛ né mefa meyɛ aleɛ daa biala ɔ. Né beku ngokɔ bɛboka so, na eleburu biala, nzaa ahoroɔ ngomvo pee boka so. Nakoso manne amrado aleɛ ndɔ ne, ofikyɛ adesoa bɔ ɔla maen ne aso ne, né ɔte piri.

¹⁹Ao me Nyameɛ, kaye paa amukoraa bɔ mayɔ mama maen he ɔ.