Read Sehwi Nehemia 7 Bible Online

Nehemia 7 - Sehwi bible

Nehemia 7

¹Mmerɛ bɔ besili fasue ne beyiele, ná nduatuale anoa nemɔ, ná nneaneane nu nyeyele pambim awɛmvoɛ, edweintolɛfoɛ ne Lewifoɛ nyiele ne,

²mvale Yerusalem nwurale nniɛma Hanani ɔne Hanania bɔ ɔnea abandenden ne aso ne, bɛ sa. Ofikyɛ né ɔte nahorɛniɛ bɔ osuro Nyameɛ tra kyɛbɔ mmenia pee besuro Nyameɛ ɔ.

³Na nga ngyirele bɛ kyɛ, “Yerusalem pambim nemɔ, onni kyɛ bebukye, sana eyia abɔ katekate koraka. Mmerɛ bɔ awɛmvoɛ nemɔ bɛwɛne ne, odi kyɛ bɛto pambim nemɔ anu bɛbrambram bɛ si. Ɛ́mɔnea Yerusalemfoɛ nemɔ anu bɛ́ye awɛmvoɛ bɔ bɛ nu bie kɔwɛne nekaa bɔ bafa bawura ye sa, ná bɛ nu bie koso bawɛne b’awuro ndendeneɛ so ɔ.”

⁴Né kuro ne ɔtrɛ, yeɛ ɔte piri, nakoso nu mmenia ne banzo, yeɛ afei né bennya bessisili sua mɔ wɔ nu.

⁵Yeɛ Nyameɛ maa nyane adwene kyɛ atitire nemɔ, mbanyi nemɔ ne maen ne, mma bɛbɔ dwaa maa bɛhyerɛ bɛ dumaa kyɛbɔ bɛ mmusua mmusua te ɔ. Na nwuni mmusua mmusua nwomaa bɔ bɛ bɔ belili moa bɛwale ne, bɛ dumaa wɔ nu ɔ. Na nwuni kyɛ bahyerɛ ɛhe wɔ nu:

⁶ Mmenia bɔ Babilɔn hene Nebukadenesa hyele bɛ nnure hɔle Babilɔn nen, bɛ bɔ befili mbɔtam mbɔtam nemɔ anu besa bɛwale Yerusalem ne Yuda, bɔ ebiala sa hɔle ye kuro nen, bɛ ɛhe.

⁷Mmenia hemɔ yeɛ belili bɛ nyunu bɛ ne bɛ wale ɔ: Serubabɛl, Yesua, Nehemia, Asaria, Raamia, Nahamani, Modekae, Bilsan, Mispere, Bigiwae, Nehum, yeɛ Baana. Yisrael mmienzua bɔ befili nnurehyelɛ nu bɛwale ne, bɛ somaa ɛhe:

⁸Parose boso ama te apee nyɔ ɛyaa ko ne aburasoo ne nyɔ.

⁹Sefatia boso ama te ɛyaa nza ne aburasoo ne nyɔ.

¹⁰Ara boso ama te ɛyaa nzia aburannu ne nyɔ.

¹¹Pahate Moabo boso ama, bɔ bɛte Yesua ne Yoabo abusua ne, bɛte apee nyɔ ɛyaa mmɔtwɛ ne buru ne mmɔtwɛ.

¹²Elam boso ama te apee ko ɛyaa nyɔ ne aburannu ne nna.

¹³Satu boso ama te ɛyaa mmɔtwɛ aburanna ne nnu.

¹⁴Sakae boso ama te ɛyaa nzoo ne aburasia.

¹⁵Binuyi boso ama te ɛyaa nzia ne aburanna ne mmɔtwɛ.

¹⁶Bebae boso ama te ɛyaa nzia ne aburanyɔ ne mmɔtwɛ.

¹⁷Asegade boso ama te apee nyɔ ɛyaa nza ne aburanyɔ ne nyɔ.

¹⁸Adonikam boso ama te ɛyaa nzia aburasia ne nzoo.

¹⁹Bigiwae boso ama te apee nyɔ aburasia ne nzoo.

²⁰Adin boso ama te ɛyaa nzia aburannu ne nnu.

²¹Atɛ boso ama, bɔ bɛte Hesekia abusua ne, bɛte aburahona ne mmɔtwɛ.

²²Hasum boso ama te ɛyaa nza aburanyɔ ne mmɔtwɛ.

²³Besae boso ama te ɛyaa nza aburanyɔ ne nna.

²⁴Harife boso ama te ɛyaa ko buru ne nyɔ.

²⁵Gibeon boso ama te aburahona ne nnu.

²⁶Afei koso, bɛ bɔ bɛ si fi nguro hemɔ aso ne, bɛ somaa ɛhe: Betlehem ne Netofa: ɛyaa ko aburawɔtwɛ ne mmɔtwɛ.

²⁷Anatote: ɛyaa ko aburanyɔ ne mmɔtwɛ.

²⁸Bete Asimawete: aburanna ne nyɔ.

²⁹Kiriate Yearim, Kefira ne Beerote: ɛyaa nzoo aburanna ne nza.

³⁰Rama ne Geba: ɛyaa nzia aburanyɔ ne ko.

³¹Mikimase: ɛyaa ko aburanyɔ ne nyɔ.

³²Betel ne Aye: ɛyaa ko aburanyɔ ne nza.

³³Nebo ko ne: aburannu ne nyɔ.

³⁴Elam ko ne: apee ko ɛyaa nyɔ aburannu ne nna.

³⁵Harim: ɛyaa nza aburanyɔ.

³⁶Yeriko: ɛyaa nza aburanna ne nnu.

³⁷Lode, Hadidi ne Ono: ɛyaa nzoo aburanyɔ ne ko.

³⁸Senaa: apee nza ɛyaa ngona ne aburasa.

³⁹Asɔfo bɔ besa bɛwale ne, bɛ somaa ɛhe: Yedaya boso ama bɔ bɛte Yesua awuro ama ne: ɛyaa ngona aburasoo ne nza.

⁴⁰Yimere boso ama te apee ko aburannu ne nyɔ.

⁴¹Pasure boso ama te apee ko ɛyaa nyɔ aburanna ne nzoo.

⁴²Harim boso ama te apee ko buru ne nzoo.

⁴³Lewifoɛ bɔ besa bɛwale ne, bɛ somaa ɛhe: Hodewa boso ama Yesua ne Kadimiɛl b’awuro ama: aburasoo ne nna.

⁴⁴Edweintolɛfoɛ mɔ: Asafe boso ama te ɛyaa ko aburanna ne mmɔtwɛ.

⁴⁵Asɔneyɛɛ sua anoa awɛmvoɛ nemɔ bɛte mmenia hemɔ boso ama: Salum, Atɛ, Talmon, Akubo, Hatita, yeɛ Sobae. Bɛte ɛyaa ko aburasa ne mmɔtwɛ.

⁴⁶Asɔneyɛɛ sua nu somvoɛ nemɔ bɛte mmenia hemɔ bɛ boso ama: Siha, Hasufa, Tabayote,

⁴⁷Kerose, Sia, Padon,

⁴⁸Lebana, Hagaba, Salmae,

⁴⁹Hanan, Gidel, Gahare,

⁵⁰Reaya, Resin, Nekoda,

⁵¹Gasam, Yusa, Pasea,

⁵²Besae, Meyunim, Nefusesim,

⁵³Bakebuke, Hakufa, Hahure,

⁵⁴Baslite, Mehida, Hasa,

⁵⁵Bakose, Sisera, Tema,

⁵⁶Nesia ne Hatifa.

⁵⁷Solomon somvoɛ hemɔ, bɛ koso bɛ boso ama besa bɛwale: Sotae, Soferete, Perida,

⁵⁸Yaala, Dakon, Gidel,

⁵⁹Sefatia, Hatile, Pokerete Hasebaim, yeɛ Amon.

⁶⁰Asɔneyɛɛ sua nu somvoɛ amukoraa, bɛ ne Solomon somvoɛ mɔ bɛ boso ama nemɔ, bɛte ɛyaa nza aburahona ne nyɔ.

⁶¹Mmeni kure hemɔ fili Tel Mela, Tel Hasa, Kɛrubo, Adon ne Yimere bɛwale, nakoso bangora bangyire bɛ si, yeɛ bangora bangyire abusua bɔ befi nu ɔ, yeɛ bangora bangyire kyɛ bɛte Yisraelfoɛ ɔ.

⁶²Bɛte mmenia hemɔ bɛ bosofoɛ: Delaya, Tobia ne Nekoda. Bɛ somaa te ɛyaa nzia aburanna ne nyɔ.

⁶³Ebiemɔ koso bɛte asɔfo mɔ bɛ bosofoɛ: Bɛ ole Hobaya, Hakose, yeɛ Basilae (bɔ ogyale Gileadeniɛ Basilae ye mma mmrasua nemɔ nu ko, bɔ ɔnate so maa ɔfale bɛ dumaa ne bie ne).

⁶⁴Sɔ mmenia nemɔ penane bɛ dumaa wɔ mmusua ngrataa nemɔ anu, nakoso né bɛ dumaa nne nu. Ye sɔ ne ati, bebuli bɛ kyɛ bɛ nwo nde, na bɛyele bɛ befili sɔfolilɛ adwuma ne anu.

⁶⁵Na amrado ne sele bɛ kyɛ nnɛmaa bedi aleɛ krongron paa ne bie, kɔpem kyɛ ɔsɔfo bie kɔfa Yurim ne Tumim kobisa (konwu bɔ Nyameɛ kã fa bɛ nwo) ɔ.

⁶⁶Mmenia bɔ besa bɛwale Yuda ne, bɛ mukoraa bɛte apee aburanna ne nyɔ ɛyaa nza aburasia,

⁶⁷asora bɛ ngoaa ne b’afaneɛ mɔ, bɔ bɛ somaa te apee nzoo ɛyaa nza aburasa ne nzoo ne. Né besa bele edweintolɛfoɛ mmienzua ne mmrasua ɛyaa nyɔ aburanna ne nnu.

⁶⁸Né bele mbɔngɔ ɛyaa nzoo aburasa ne nzia, afunum mbiri ɛyaa nyɔ aburanna ne nnu,

⁶⁹afupɔngɔ ɛyaa nna aburasa ne nnu, yeɛ afunum apee nzia ɛyaa nzoo ne aburanyɔ.

⁷⁰Afei bɛ nana mɔ sasofoɛ mbanyi nemɔ, bɛ nu biemɔ bɛbokale adwuma ne yɔlɛ wɔ esikaa nu. Amrado ne yɛle ndoboa he maa bɛfa beguale fotoɛ ne anu: esikaa kɔkorɛ kilo ngona, ayaa aburannu ne asɔfo ndaadeɛ ɛyaa nnu aburasa.

⁷¹Na bɛ nana mɔ sasofoɛ mbanyi nemɔ bie tuale ɛhe beguale adwuma ne nwo fotoɛ ne anu: esikaa kɔkorɛ kilo ɛyaa ko aburasoo, yeɛ ɛdwetɛ kilo apee ko ɛyaa nyɔ aburannu.

⁷²Na maen ne ngaa ne tuale ɛhe bɛfa bɛbokale: esikaa kɔkorɛ kilo ɛyaa ko aburasia ne mmɔtwɛ, ɛdwetɛ kilo ɛyaa ko aburanna, yeɛ asɔfo ndaadeɛ aburasia ne nzoo.

⁷³ Yiti asɔfo nemɔ, Lewifoɛ nemɔ, anoa awɛmvoɛ nemɔ, edweintolɛfoɛ, mmenia nemɔ anu bie, asɔneyɛɛ sua nu somvoɛ nemɔ ne Yisraelfoɛ amukoraa, bɛtenatenane bɛ nguro mɔ so.