Read Sehwi Nehemia 8 Bible Online

Nehemia 8 - Sehwi bible

Nehemia 8

¹ Bosome bɔ ɔtɔ so nzoo ne dwuli, bɔ né Yisraelfoɛ baatenatena bɛ nguro nemɔ aso nen, Yisraelfoɛ amukoraa bɛbɔle nu bɛɛbɔle dwaa wɔ nekaa bɔ bɛbɔ dwaa wɔ Nzue Pambim ne anyunu. Na besele ahyerɛlɛniɛ Ɛsra kyɛ Mose mmeraa nwomaa bɔ AWURADE afa ama Yisrael ne, ɔfa bra.

²Yiti ɔsɔfo Ɛsra fale mmeraa ne wale badwa ne anyunu, wɔ mmienzua ne mmrasua ne ngwadaa amukoraa bɔ bɛte dwirɛ a, bɛkɔhora bɛkɔte ye bo ɔ, bɛ nyunu, wɔ kyẽa bɔ oli moa wɔ bosome bɔ ɔtɔ so nzoo ne anu.

³Ɛsra fale ye nye hyirele nekaa bɔ bɛbɔ dwaa ne wɔ Nzue Pambim ne anyunu berɛ, na ɔkengale nwomaa ne fili ngyerɛmɔ tutuutu oodwuli eyiagyina. Ɔkengale ye wɔ mmienzua ne mmrasua ne ngwadaa bɔ bɛte dwirɛ bɛkɔhora bɛkɔte ye bo ɔ, bɛ nyunu. Na maen ne amukoraa bɛyɛle asoɛ betiele mmeraa nwomaa ne anu dwirɛ.

⁴Yeɛ ahyerɛlɛniɛ Ɛsra gyinane taboa simbini bie bɔ nyianu ne ati bahyɛ da babobɔ ɔ so. Na mmenia hemɔ gyinagyinane ye ngyɛnu: Matitia, Sema, Anaya, Yuria, Hilkia ne Maaseya gyinane ye sa famaa so, yeɛ Pedaya, Misael, Malkiya, Hasum, Hasbadana, Sakaria ne Mesulam koso begyinane ye sa bɛen so.

⁵Na Ɛsra bukyele nwomaa ne anu bɔ maen ne amukoraa bɛ nye tua ɔ, ofikyɛ né ogyi anwuro tra mmenia ne amukoraa. Na obukyele nwomaa ne anu nen, mmenia ne amukoraa bedwɔso begyinane.

⁶Na Ɛsra yele AWURADE, Nyameɛ piri ne ayɛ, na mmenia ne amukoraa bɛmomane bɛ sa so besurole so kyɛ, “Amen, Amen!” Na bɛfale bɛ nyunu bebutubutuli ase bɛsɔnene AWURADE.

⁷Afei koso Yesua, Bani, Serebia, Yamin, Akubo, Sabetae, Hodia, Maaseya, Kelita, Asaria, Yosabade, Hanan ne Pelaya bɔ bɛte Lewifoɛ ne, behyirehyirele mmeraa ne anu behyirele mmenia ne. Sɔ mmerɛ ne, né mmenia ne bɛtɛgyigyi berɛ.

⁸Yiti bɛkengale befili Nyameɛ mmeraa nwomaa ne anu, na behyirehyirele nu pefee mane mmenia ne tele bɔ bɛkengale ne abo.

⁹Yeɛ Nehemia bɔ né ɔte amrado ne, ɔne ɔsɔfo Ɛsra bɔ ɔte ahyerɛlɛniɛ ne, bɛ ne Lewifoɛ bɔ behyirehyirele edwirɛ ne anu behyirele mmenia nemɔ ne, besele maen ne amukoraa kyɛ, “Ɛnɛ kyẽa ye, ɔte krongron ma AWURADE ɛmɔ Nyameɛ; nnɛma ɛmɔdi aworabɔlɛ, yeɛ nnɛma ɛmɔsu.” Ofikyɛ maen ne amukoraa bɛtele mmeraa ne anu dwirɛ ne, besuni.

¹⁰Yeɛ osele bɛ kyɛ, “Ɛmɔhɔ beeli naen bɔ walɔ ɔ, ná ɛmɔno nzaa bɔ ɔyɛ fɛɛ ɔ. Bɛ bɔ belle bie ne, ɛmɔɔma bɛ bie, ofikyɛ ɛnɛ kyẽa ye, ɔte krongron ma y’AWURADE. Nnɛmɔma ɛmɔ wora bɔ, ofikyɛ AWURADE nu anigye yeɛ ɔte ɛmɔ anwoserɛ ɔ.”

¹¹Yiti Lewifoɛ nemɔ hane sɔ dwirɛ he mane mmenia ne b’ahone tɔle bɛ kunu, “Ɛ́mɔyɛ konn, ofikyɛ ɛnɛ kyẽa ye te krongron: nnɛmɔma ɛmɔ wora bɔ.”

¹²Yeɛ mmenia ne amukoraa bɛhɔle beedidili bɛnone, na bɛfale bie bɛhyehyɛle. Bɛgyele bɛ nye paa, ofikyɛ edwirɛ bɔ bɛkengale behyirele bɛ ne, bɛtele ye bo.

¹³Kyẽa bɔ ɔtɔ so nyɔ ne, bɛ bɔ bɛlela mmenia ne amukoraa bɛ nana mɔ bɛ sasofoɛ noa ne, bɛ ne asɔfo nemɔ ne Lewifoɛ ne, bɛbɔle nu bɛhɔle ahyerɛlɛniɛ Ɛsra berɛ kyɛ bɛkwaasua mmeraa ne anu dwirɛ ne.

¹⁴Na AWURADE mmeraa bɔ ɔnate Mose so hyɛle ne, benwuni kyɛ bahyerɛ ye wɔ nu kyɛ bosome nzoo aluolue ne anu, odi kyɛ maen Yisrael bɛtena asese nu,

¹⁵na afei odi kyɛ bɛbɔ ye dawure bɛfa bɛto dwaa wɔ bɛ nguro nemɔ amukoraa ne Yerusalem nu kyɛ, “Ɛmɔhɔ mmokaa nemɔ aso bɛɛfa olive mmaen, eburo olive mmaen, sesea mmaen, ɛberɛ ne mmakaa bɔ bebua kusuu ɔ bɛ mmaen, na ɛmɔɔfa besisi asese nemɔ, kyɛbɔ bahyerɛ ne.

¹⁶Yiti mmenia ne hɔle bɛɛfale mmaen nemɔ bɛwale, na besisili b’asese mɔ wɔ bɛ sua nemɔ mmɔsoɛ so, b’awuro aluo, yeɛ Nyameɛ awuro aluo berɛ, yeɛ Nzue Pambim ne anwo nekaa bɔ bɛbɔ dwaa ɔne Efraim Pambim ne anwo nekaa bɔ bɛbɔ dwaa ne.

¹⁷Na bɛ bɔ befili nnurehyelɛ nu besa bɛwale ne, besisili asese bɛtenatenane nu. Ofi Nun awa Yesua aberɛ so bɔ ɔkwaadwu sɔ kyẽa ne, né Yisraelfoɛ bɛyyɔle sɔ le. Na belili ahurusi paa.

¹⁸Na daa biala, ofi kyẽa bɔ oli moa ne kɔpem kyẽa bɔ ɔpɛ ye bo ne, ɔkengale Nyameɛ mmeraa nwomaa ne. Belili aluolue ne ɛlɛsoo. Na ɛlɛbɔtwɛ ne aso, bɛyɔle nyianu krongron kyɛbɔ nhyehyɛleɛ ne te ne.