Read Sehwi Nehemia 9 Bible Online

Nehemia 9 - Sehwi bible

Nehemia 9

¹Sɔ bosome ne ala, ye kyẽa bɔ ɔtɔ so aburanyɔ ne nna ne aso, Yisrael maen bɔle dwaa bɛyɔle akɔngyere. Bɛherale ɛsɛen tena bɛfale mbaen beguale bɛ ti so.

²Na Yisraelfoɛ ne, bɛhwene bɛ nwo befili amanvrafoɛ amukoraa anwo, na begyinane bɛ gya so bɛhane bɛ bɔne ne bɛ nana mɔ b’amumuyɛɛ.

³Bɛhɔle so begyinane bɛ gya so bɛkengale AWURADE bɛ Nyameɛ mmeraa nwomaa ne dɔnhwere nza, yeɛ bɛfale dɔnhwere nza bieku bɛhane bɛ bɔne, na bɛsɔnene AWURADE bɛ Nyameɛ.

⁴Afei Yesua, Bani, Kadimiɛl, Sebania, Buni, Serebia, Bani ne Kenani begyinane Lewifoɛ b’atweleɛ ne aso, na bele komviɛ piri bɛteane nu bɛsrɛle AWURADE bɛ Nyameɛ.

⁵Yeɛ Lewifoɛ hemɔ: Yesua, Kadimiɛl, Bani, Hasabeneya, Serebia, Hodia, Sebania ne Petahia besele kyɛ, “Ɛ́mɔdwɔso bɛye AWURADE ɛmɔ Nyameɛ ayɛ ofi ɛnɛ bɔ ɔkwaadwu afebɔɔ. W’animnyam dumaa bɔ ɔbo animnyam ne ayɛyelɛ amukoraa so ne, yɛye ye ayɛ.”

⁶Na Ɛsra sele kyɛ, “Wɔ ngome yeɛ ɛte AWURADE ɔ. Wɔ yeɛ abɔ nyameɛso, nyameɛso bɔ ɔwɔ anwuro ne nu abɔdeɛ amukoraa; aseɛ ɔne so nningyein amukoraa; ɛpo ne nu nningyein amukoraa. Ɛma bɛ mukoraa ngoa, na nyameɛso abɔdeɛ amukoraa bɛsɔne wɔ.

⁷ Wɔ yeɛ ole AWURADE Nyameɛ bɔ ɛneaneane nu yele Abram fili Kaldeafoɛ kuro Yure so, ná ɛtole ye dumaa Abraham ɔ.

⁸ Enwuni kyɛ ye ahone nu te wɔ wɔ nyunu, na ɛne ye bɛyɛle apam kyɛ ɛkɔfa Kanaanfoɛ, Hitifoɛ, Amorifoɛ, Perisifoɛ, Yebusifoɛ ne Gɛgasifoɛ b’aseɛ kɔma ye boso ama; na wɔ bɔhyɛ bɔ ɛhyɛle ne, ali so, ofikyɛ ɛtengyɛ.

⁹ “Yɛ nana mɔ bɔ né bɛwɔ Misraim ne, enwuni amaneɛ bɔ né bɛwɔ nu ɔ, na etiele bɛ sufrɛ wɔ Ɛpo Kɔkorɛ noa.

¹⁰ Ɛyɔle nzɛngyerɛnneɛ ne anwanwadeɛ tiale Faro ne ye mbanyi amukoraa ne ye aseɛ ne aso ama mukoraa, ofikyɛ enwuni kyɛ bɛyɔle aniammɔwoho betiale yɛ nana mɔ. Elele dumaa, na sɔ dumaa ne watena berɛ maa waadwu ɛnɛ ye.

¹¹ Na ɛpakyele ɛpo ne anu wɔ bɛ nyunu, amaa ɔnate so bɛfale aseɛ wosee so bɛpɛle ɛpo ne, nakoso mmenia bɔ né bɛfoa yɛ nana mɔ ne de, egyili bɛ guale buma ne anu kyɛ nyɔboɛ bɔ bagyi bagua asue piri nu ɔ.

¹² Afei koso, ɛfale munungum ningɔnn lili bɛ nyunu eyia, yeɛ ɛfale see ningɔnn lili bɛ nyunu kɔngɔen maa ɔtale maa benwuni ase bɛhɔle nekaa bɔ bɛkɔ ɔ.

¹³ Edwu wale Sinai bokaa ne aso, na ɛne bɛ dwudwole fili nyameɛso, na ɛmane bɛ tenenee nhyehyɛleɛ, mmeraa turoloo, yeɛ ahyɛdeɛ ne mmeraa dwirɛ bɔ ɔte paa ɔ.

¹⁴Ɛmaa benwuni w’afofikyẽa krongron ne, yeɛ ɛnate wɔ somvoɛ Mose so mane bɛ ahyɛdeɛ ne nhyehyɛleɛ ne mmeraa.

¹⁵ Ɛmane bɛ aleɛ fili nyameɛso kyɛ bɛfa bɛho bɛ hɔen, yeɛ ɛmane bɛ nzue fili nyɔbotaen ne anu kyɛ bɛfa bɛho bɛ nzuhɔen, na ɛhã hyirele bɛ kyɛ aseɛ bɔ ɛtale ndaen kyɛ ɛkɔfa kɔma bɛ ne, bɛhɔ bɛɛfa.

¹⁶ “Nakoso bɛ ne yɛ nana mɔ bɛyɛle anwomasoɛ ne asoserɛ, na banni wɔ mmeraa dwirɛ ne aso.

¹⁷ Bɛyɛle b’adwene kyɛ bengoli so, na anwanwadeɛ bɔ ɛyɔle mane bɛ ne, bangaye, na mmom bɛyɛle asoserɛ, yeɛ bɛyele sona maa ɔlale bɛ noa kyɛ besa bɛkɔ ngoaasolɛ nu wɔ Misraim. Nakoso ɛte Nyameɛ bɔ ɛfa bɔne kyɛ, ɛdo mmenia, yeɛ ɛse anwumvoin, w’ahone nhu ndɛ, wɔ ɔdɔ bɔ onni ngasi sone, na anye wɔ sa amvi bɛ bo.

¹⁸ Ye po, mmerɛ bɔ behurole nikyee bɛyɔle nandwie ba amoen bɛfale ná besele kyɛ, ‘Wɔ Nyameɛ bɔ ɔyele wɔ fili Misraim wale ne, ye ɛhe’, ná bɛbɔle musue mbiri mbiri nen,

¹⁹ ɔnate w’anwumvoinnwunɛ kandinga ne ati, anyakyi bɛ nu wɔ ɛserɛ ne aso. Munungum ningɔnn bɔ olili bɛ nyunu wɔ atee ne aso ne, wanyakyi bɛ nu eyia; yeɛ see ningɔnn bɔ ɔtale kɔngɔen ne, ɔmaa benwuni ase bɛhɔle nekaa bɔ bɛkɔ ɔ.

²⁰Ɛfale wɔ Sunzum paa ne mane bɛ kyɛ ohyirehyire bɛ mmeraa ne. Na mana bɔ ɛfa maa belili ne, anyakyi bɛ ye manɛ, yeɛ nzuhɔen ku bɛ ne, ɛmane bɛ nzue maa bɛnone.

²¹Ɛneane bɛ wɔ ɛserɛ so afoɛ aburanna maa ɔnate ye sɔ ti, hwee anhia bɛ. Bɛ ndaadeɛ andete, yeɛ bɛ gya bo anwunwu.

²² Ɛfale ahennie ne maen maen mɔ mane bɛ, na ɛmane wɔ mmenia tenane aseɛ ne aso nekaa biala, maa ɔnate so bɛho bɛfale Hesebon hene Sihon aseɛ ne, yeɛ Basan hene Ogo aseɛ ne.

²³Ɛmane bɛ boso ama bɛtale kyɛ ewienu nzramaa, na aseɛ bɔ ɛhã hyirele bɛ nana mɔ kyɛ bɛɛfa bɛyɛ bɛ deɛ ne, ɛfale bɛ wale so.

²⁴ Yiti bɛ boso ama nemɔ, bɛhɔle aseɛ ne aso bɛɛfale, na Kanaanfoɛ bɔ bɛ yeɛ né bɛte aseɛ ne aso mmenia ne, ɛfale bɛ wurale Yisraelfoɛ bo. Na ɛfale bɛ ne b’ahemvo ne aseɛ ne aso ama wurale Yisraelfoɛ sa kyɛ bɔ bekuro ne, bɛfa bɛyɔ bɛ.

²⁵ Na bɛho bɛfale nguro bɔ bato bɛ nwo fasue ne aseɛ bɔ ɔkye aleɛ ɔ. Na bɛfale awuro mɔ bɔ nningyein paa ayi bɛ tɛkyɛ ɔ, abura mɔ bɔ batutu ɔ, bobe boo mɔ, olive boo mɔ ne mmakaa bɔ basu biribiraa ɔ bɛyɛle bɛ deɛ. Yiti bedidili ma bɛ ko yili na bɛyɛle mbiri, na wɔ paa kandinga bɔ ɛyɛle bɛ ne ati bɛgyele bɛ nye.

²⁶ “Nakoso bɛyɛle asoserɛ, na bɛyɛle wɔ nwo lɔen, bɛfale wɔ mmeraa ne bɛtole ahameɛ, na wɔ ngɔmhyɛlɛfoɛ bɔ bɛbɔle bɛ kɔkɔ kyɛ besa beeli wɔ si ne, behuhuni bɛ maa ɔnate so bɛbɔle musue mbiri mbiri paa.

²⁷Yiti ɛfale Yisraelfoɛ wurale bɛ pɔfoɛ mɔ sa maa bɛhyɛle bɛ so. Na b’amaneɛnwunɛ nu ne, besu bɛfrɛle wɔ, na etiele bɛ mbaeɛ fili nyameɛso. Na kyɛbɔ w’anwumvoinnwunɛ piri ne te ne, ɛyele defoɛ mɔ mane bɛ maa bɛpepɛ belele bɛ befili bɛ pɔfoɛ mɔ sa nu.

²⁸Nakoso bɛ nwo tɔle bɛ ne, besa bɛyɔle bɔne betiale wɔ, na ɛfale bɛ wurale bɛ pɔfoɛ mɔ sa maa belili bɛ so. Na bɛsesane b’adwene besa besu bɛfrɛle wɔ ne, etiele bɛ fili nyameɛso, na kyɛbɔ w’anwumvoinnwunɛ te ne, ɛpepɛ lele bɛ mmerɛ pee.

²⁹ Na ɛbɔle bɛ kɔkɔ bɔ ɔnate so bekosa bekooli wɔ mmeraa ne aso ɔ. Nakoso bɛyɛle anwomasoɛ, yeɛ banni wɔ mmeraa dwirɛ so, na mmom wɔ nhyehyɛleɛ bɔ sona di so a onya ngoa ne, bɛyɔle bɔne bebuli so. Bɛpemone b’awaen beguale wɔ so, bɛsoale bɛ kɔm so kyeinn, na bandie wɔ dwirɛ.

³⁰ Afoɛ pee yeɛ enyane bɛ nwo aboterɛ ɔ, na ɛnate wɔ Sunzum so fale wɔ ngɔmhyɛlɛfoɛ so bɔle bɛ kɔkɔ; nakoso bandie. Yiti ɛfale bɛ wurale aseɛ nemɔ aso ama bɛ sa.

³¹Nakoso ɔnate w’anwumvoinnwunɛ kandinga ne ati, annua bɛ boso, yeɛ anye wɔ sa amvi bɛ bo, ofikyɛ ɛte Nyameɛ bɔ ɛdo sona ná ɛse anwumvoin ɔ.

³² “Yiti afei, yɛ Nyameɛ bɔ ɛte piri bɔ wɔ nwo yɛ suro, bɔ edi apam so ná ekyire ɔdɔ bɔ onni ngasi ɔ, amaneɛ amukoraa bɔ wato yɛ ne y’ahemvo, yɛ mbanyi mɔ, y’asɔfo mɔ, yɛ ngɔmhyɛlɛfoɛ, yɛ nana mɔ, ɔne wɔ mmenia amukoraa, ofi Asiria ahemvo mɔ aberɛ so bɔ ɔbaadwu ɛnɛ ye, nnebu ye nikyee ba.

³³Amaneɛ bɔ wato yɛ ne amukoraa, edi be, ofikyɛ edi nahorɛ, na yɛ de yayɔ bɔne.

³⁴Yɛ ahemvo mɔ, yɛ mbanyi mɔ, y’asɔfo mɔ ne yɛ nana mɔ banni wɔ mmeraa ne aso, yeɛ wɔ mmeraa dwirɛ ne wɔ dwirɛ bɔ ɛfa mane bɛ ne, banni so.

³⁵Mmerɛ bɔ né bɛ bɔbɔ bɛ hene mɔ di bɛ so ne po, ɔwɔ nu kyɛ ehyirele ɔdɔ kandinga hyirele bɛ, na ɛmane bɛ aseɛ kandinga bɔ ɔkye aleɛ de, nakoso banzo wɔ, yeɛ banyakyi bɛ bɔne bɔ bɛyɔ ne koso.

³⁶Bɔ wato yɛ ɛhe oo! Ɛne de yayɛ nganga. Aseɛ bɔ ɛfa mane yɛ nana mɔ kyɛ bɛfa so aleɛ ne so nningyein paa ne, yayɛ nganga wɔ so.

³⁷Ahemvo mɔ bɔ ɔnate yɛ bɔne bɔ yayɔ ti amaa bali yɛ so ne, bɛ mmom yeɛ bedi aseɛ ne aso aleɛ paa ne ɔ. Bele yɛ nipadua ne y’ayɛmmoa mɔ so tumi. Bɔ bekuro yeɛ bɛfa bedi yɛ ɔ, na edwirɛ piri paa yeɛ wato yɛ ɔ.”

³⁸“Ɔnate ɛhe amukoraa ti, yahyɛ bɔ kitii yahyerɛ yagua nwomaa so. Sɔ nwomaa ne, yɛ mbanyi mɔ, yɛ Lewifoɛ mɔ ne y’asɔfo mɔ yeɛ bafa bɛ nzɔanoɛ basɔ ye noa ɔ.