Read Sehwi Ɛseta 6 Bible Online

Ɛseta 6 - Sehwi bible

Ɛseta 6

¹Sɔ kyẽa ne kɔngɔen, Nana Ahasuro angora da. Yiti ɔhyɛle kyɛ bɛfa abakɔsɛm nwomaa bɔ ɔte aberɛso dwirɛ ne bɛbra. Na bɛkengale behyirele ye.

² Benwuni kyɛ bahyerɛ ye wɔ nwomaa ne anu kyɛ, Bigitana ne Terese bɔ bɛte Nana Ahasuro sayɛɛ nemɔ anu nyɔ, bɔ bɛwɛne Nana pumbu nu anoa nemɔ, bɔ bɛbɔle Nana ti so porɛ kyɛ bekohu ye nen, Modekae yeɛ ɔtele bɛ bo ɔ.

³Yeɛ Nana Ahasuro bisale kyɛ, “Nzikyɛ yeɛ yafa yabɔ Modekae aba so anaa yafa yahyɛ ye animnyam wɔ ɛhe anwo ɔ?” Na Nana Ahasuro somvoɛ nemɔ buale ye kyɛ, “Yɛyyɔle hwee yɛmmane ye.”

⁴Na Nana Ahasuro bisale kyɛ, “Nwa yeɛ ɔwɔ ahemvie ne akunu berɛ ne?” Sɔ mmerɛ ne, né Haman adwu ahemvie aluo berɛ pato nu berɛ, kyɛ ɔbaahã kyire Nana kyɛ ɔ́pene so ma bɛbɔ Modekae kɔme wɔ bakaa bɔ wafa wapena berɛ wama Modekae ne aso.

⁵Yiti Nana Ahasuro somvoɛ nemɔ sele ye kyɛ, “Haman yeɛ waagyina ahemvie ne akunu berɛ ɔ?” Yeɛ Nana sele kyɛ, “Ɛ́mɔma ɔbra nu!”

⁶Yiti Haman wale nu, na Nana Ahasuro bisale ye kyɛ, “Sona bɔ me nye kɔgye kyɛ ngɔbɔ ye aba so ne, nzikyɛ yeɛ nyɔ ma ye ɔ?” Yeɛ Haman hane ye wɔ ye ti anu kyɛ, “Nwa koraa yeɛ Nana kɔbɔ ye aba so kɔtra me ɔ?”

⁷Na Haman sele Nana Ahasuro kyɛ, “Nana, sona bɔ ekuro kyɛ ɛbɔ ye aba so ne,

⁸maa bɛfa ahennie ataadeɛ bɔ awura ye le ɔ bɛbra, ɔne pɔngɔ bɔ atena ye so le ɔ, bɔ ahennie abotire bɔ ye ɔ bɛbra.

⁹Nana, ataadeɛ ne ne pɔngɔ ne, maa bɛfa bewura wɔ mbanyi nemɔ nu ko bɔ odi mu paa ɔ sa. Nana, maa ɔfa wura sona bɔ ekuro kyɛ ɛbɔ ye aba so ne, maa ɔfa ye tena pɔngɔ so, ná oli ye nyunu ɔfa ye fa kuro ne dwaaso ɔbɔ ye dawure kyɛ, ‘Sona bɔ Nana kuro kyɛ ɔbɔ ye aba so ne, sɔaa yeɛ odi kyɛ bɛyɛ ye hɔ oo.’ ”

¹⁰Yeɛ Nana Ahasuro sele Haman kyɛ, “Ka wɔ nwo kɔfa ataadeɛ ne pɔngɔ ne, kyɛbɔ aha ne ala, ná yɔ sɔ ma Modekae bɔ ɔtena ahemvie anoa nu berɛ ne. Edwirɛ biala bɔ aha ne, nnɛyɔ nu bie yakyi bie.”

¹¹Yiti Haman ɔɔfale ataadeɛ ne wurale Modekae, ɔfale ye tenane pɔngɔ ne aso, olili ye nyunu fale ye fale kuro ne dwaaso, na ɔbɔle ye dawure kyɛ, “Sona bɔ Nana kuro kyɛ ɔbɔ ye aba so ne, sɔaa yeɛ odi kyɛ bɛyɛ ye hɔ oo.”

¹²Na ɛhe asi ne, Modekae sa wale ahemvie anoa nu berɛ, nakoso Haman de, ɔfale aworabɔlɛ ne animguaseɛ hane ye nwo hɔle ye awuro.

¹³Edwirɛ bɔ wato Haman ne, ɔfale ye mukoraa bɔle ɔye Sɛrese ne ye damvo nemɔ amukoraa amaneɛ. Na ye foɛtulɛfoɛ nemɔ ne ɔye Sɛrese besele ye kyɛ, “Modekae bɔ ahyɛ ye bo agua wɔ nyunu ase wɔ ye nyunu ne, sɛ ɔte Yudaniɛ de a, ye de ɛngɔhora ye nyunu gyina, ekoli ngoguo wɔ ye nyunu.”

¹⁴Bɛ noa wɔ so bɔ bɛ ne ye bedwudwo ne, Nana Ahasuro sayɛɛ nemɔ wale berɛ, na bɛfale Haman ndɛndɛ so bɛhɔle ɛpoen bɔ Ɛseta ato ne abo.