Read Sehwi Ɛseta 7 Bible Online

Ɛseta 7 - Sehwi bible

Ɛseta 7

¹Nana Ahasuro ne Haman bɛhɔle Nana hemmaa Ɛseta ɛpoentolɛ ne abo kyɛ bɛ ne ye bɛkwaadidi.

² Ye elenyɔ ne aso, bɛwɔ ɛpoentolɛ ne abo ne, Nana Ahasuro bisale Ɛseta bieku kyɛ, “Nana hemmaa Ɛseta, w’abisadeɛ ne ole nzu? Ka, na ngɔfa ngɔma wɔ. Nzu yeɛ ɛpena ɔ? Sɛ m’ahennie ye bue po a, wɔ sa kɔha ye.”

³Yeɛ Nana hemmaa Ɛseta buale kyɛ, “O, Nana, sɛ anwu me anwumvoin, yeɛ sɛ ɛpene so a, maa nya me ti nnidi nu. M’abisadeɛ ne, ye ɛne; yeɛ bɔ mepena koso ole kyɛ, me mmenia konya bɛ ti bekodidi nu ɔ.

⁴Ofikyɛ bayɛ me ne me mmenia atɔen kyɛ beli yɛ awue, behũ yɛ, ná benua yɛ boso. Na sɛ bɛtɔnene yɛ maa yɛyɛle ngoaa ne afaneɛ mɔ po a, ahaa mengɔtɛ me noa nu, ofikyɛ ahaa ye nwo ngohia kyɛ ngɔfa sɔ dwirɛ kaaba he ngɔha Nana adwene ɔ.

⁵Yeɛ Nana Ahasuro bisale Nana hemmaa Ɛseta kyɛ, “Sona beni ɛne, ɔwɔ nisua, nwa yeɛ wabɔ sɔ porɛ he ne?”

⁶Na Ɛseta buale kyɛ, “Sɔ Haman he, ɔte busueniɛ, okyi yɛ, na osa te yɛ pɔfoɛ.” Na sɔ dwirɛ ne mane Haman kunu tele ye wɔ Nana Ahasuro ne Nana hemmaa Ɛseta bɛ nyunu berɛ.

⁷Yeɛ Nana Ahasuro le ɛyaa dwɔsole fili ɛpoentolɛ ne abo, na ɔhɔle ahemvie turo ne anu, nakoso Haman de, ɔhale berɛ srɛle Nana hemmaa Ɛseta kyɛ onwu ye anwumvoin ole ye ngoa, ofikyɛ onwuni kyɛ Nana Ahasuro wayɛ ye adwene kyɛ ɔkɔma edwirɛ piri paa kɔto ye.

⁸Mmerɛ bɔ Nana Ahasuro fili ahemvie turo ne anu sa wale ɛpoentolɛ ne abo nen, né Haman ato ye nwo waatɔ nnamu bɔ Ɛseta la nu ne aso, na Nana Ahasuro sele kyɛ, “Eh, me nyunu wa po, wɔ m’awuro wa, yeɛ ɛbaato Nana hemmaa mmɔnaa ye!” Na Nana Ahasuro noa ambe, yeɛ bɛkyekyele Haman nye ɔ.

⁹Yeɛ Nana sayɛɛ nemɔ nu ko bɔ oli Habona ne sele kyɛ, “Modekae bɔ ye noa dwirɛ yeɛ olele Nana ngoa ne, bakaa bɔ Haman fa penane berɛ kyɛ bɛkɔbɔ Modekae kɔme wɔ so ne, ye yeɛ ɔpena Haman awuro dɔ ne. Ye tendenn te agyirɛ aburannu.” Na Nana Ahasuro sele kyɛ, “Ɛmɔɔbɔ ye kɔme wɔ so!”

¹⁰Yiti bakaa bɔ Haman fa penane berɛ kyɛ bɛbaabɔ Modekae kɔme wɔ so ne, so yeɛ bɛbɔle Haman kɔme ɔ. Na afei Nana Ahasuro ahone tɔle nzue nu.