Read Sehwi Ɛksadɔso 10 Bible Online

Ɛksadɔso 10 - Sehwi bible

Ɛksadɔso 10

¹Afei AWURADE sele Mose kyɛ, “Kɔ Faro berɛ, ofikyɛ me yeɛ mamaa ɔne ye mbanyi mɔ babubu mmakaa batuatua bɛ so ɔ, amaa ɔnate so mala me nzɛngyerɛnneɛ hemɔ ali wɔ bɛ berɛ.

²Na ɔnate so ɛkɔha kyɛbɔ masi magoro Misraimfoɛ nwo, ɔne nzɛngyerɛnneɛ bɔ mayɔ ye bɛ berɛ kohyire ɛwa ne w’anomaa. Na ɛhe kɔmaa ekonwu ye kyɛ me ole AWURADE.”

³Yiti Mose ne Aarɔn bɛhɔle Faro berɛ beesele ye kyɛ, “AWURADE, Hebrifoɛ Nyameɛ ne nwa nyoo, ‘Ɛkɔpo kyɛ ɛkɔbrɛ wɔ nwo ase wɔ me nyunu maa okoodwu kyinzu? Ma me mmenia nemɔ ate ma bɛhɔ, ná bɛɛsɔne me.

⁴Na sɛ ampene amma me mmenia nemɔ angɔ a, ɛhema ngɔma mmɛbɛ kɔwa wɔ maen ye anu,

⁵na bekoyi bɛkɔfa aseɛ ne, bɔ sona biala ngonwu aseɛ ne ɔ. Na nikyee biala bɔ ɔhale berɛ mane ɛmɔ, bɔ asukɔtwea nyɔboɛ ne anzɛkye ye ne, bekoli; yeɛ ɛmɔ mmakaa mukoraa bɔ begyigyi buro koso, bekoli.

⁶Bekoyi w’awuro mɔ nu tɛkyɛ, wɔ mbanyi mɔ awuro amukoraa, ɔne Misraimfoɛ awuro amukoraa nu tɛkyɛ; bɔ wɔ baba mɔ ne wɔ nana mɔ bennwuni bie le, fite kyɛ bɛwale aseɛ ye aso bɔ ɔbaadwu ɛnɛ ɔ.’ ” Afei ɔkakyili ye nwo yakyili Faro berɛ hɔle.

⁷Na Faro mbanyi mɔ sele ye kyɛ, “Kyinzu koraa yeɛ biaa he kosua yɛ ngaen maa ɔkɔɔpem ɔ? Ma mmienzua ne bɛhɔ bɛɛsɔne AWURADE bɛ Nyameɛ ne. Aso ennwu ye kyɛ Misraim abɔ ɔ?”

⁸Yiti bɛmane Mose ne Aarɔn sá wale Faro berɛ, na osele bɛ kyɛ, “Ɛmɔhɔ bɛɛsɔne AWURADE ɛmɔ Nyameɛ ne. Nakoso ɛmɔ nu nwa mɔ yeɛ bɛkɔhɔ ɔ?”

⁹Na Mose sele kyɛ, “Yɛ ne yɛ ngwadaa ne yɛ mbanyi, yɛ mma mmienzua ne mmrasua, yɛ mmoaen ne yɛ nandwie mɔ yeɛ yɛkɔhɔ ɔ, ofikyɛ, ɔsɛ kyɛ yɛdi aluolue yɛhyɛ AWURADE animnyam.”

¹⁰Na Faro sele bɛ kyɛ, “AWURADE óli ɛmɔ si, sɛ ɔba ye kyɛ mema ate maa ɛmɔ ne ɛmɔ mma mɔ bɛkɔ a! Yeɛ ɛmɔanwu ye kyɛ ɛmɔle adwene tɛɛ ɔ!

¹¹Ɔngɔyɛ yee! Ɛ́mɔma mmienzua nemɔ angome bɛhɔ bɛɛsɔne AWURADE, ofikyɛ bɔ ɛmɔpena hɔ ɛne.” Yiti bɛfoane Mose ne Aarɔn befili Faro nyunu.

¹²Na AWURADE sele Mose kyɛ, “Ma wɔ sa so kyire Misraim aseɛ ne ma mmɛbɛ beyi bɛfa aseɛ ne, ná beli aseɛ ne aso nyaanyaa mukoraa bɔ asukɔtwea akungumaboɔ ne anzɛkye ye ne.”

¹³Yiti Mose mane ye pɔmaa ne aso hyirele Misraim aseɛ ne. Na AWURADE mane eyia afiteleɛ mvrama tuli aseɛ ne aso sɔ kyẽa ne eyia ne kɔngɔen amukoraa. Na aleɛ hyene ngyerɛmɔ nen, né eyia afiteleɛ mvrama ne afa mmɛbɛ nemɔ wawa.

¹⁴Mmɛbɛ nemɔ wale Misraim aseɛ so amu, na beyi bɛfale Misraim maen ne amu. Na kyɛbɔ besi bɛyɛle manyamanya nen, ebie ɔwwale le, yeɛ ebie koso ngɔwa le.

¹⁵Beyili bɛfale aseɛ ne aso amukoraa mane aseɛ ne aso yɛle tunn. Na aseɛ ne aso nyaa mukoraa ne mmakaammaa mukoraa bɔ asukɔtwea akungumaboɔ ne anzɛkye bɛ ne, belili. Nikyee monɛ ko po anga wɔ eburo mmakaa ne ndire mɔ so, wɔ Misraim aseɛ so amukoraa.

¹⁶Afei Faro hane ye nwo tole ye sa frɛle Mose ne Aarɔn maa bɛwale, na osele kyɛ, “Mayɛ bɔne matia AWURADE ɛmɔ Nyameɛ ne, ɔne ɛmɔ.

¹⁷Yiti mesrɛ wɔ, ɛhe angome de, fa me bɔne kyɛ me; na ɛ́mɔsrɛ AWURADE ɛmɔ Nyameɛ ne ma ɔye ewue he fi me so.”

¹⁸Yiti Mose fili Faro nwo berɛ hɔle ɔɔsrɛle AWURADE.

¹⁹Na AWURADE mane eyia atɔleɛ mvrama piri bie tuli, na opiane mmɛbɛ nemɔ ooguale Ɛpo Kɔkorɛ nu. Abɛbɛ ko po anga berɛ wɔ Misraim aseɛ so nekaa biala.

²⁰Nakoso AWURADE mane Faro bubuli mmakaa tuale ye so, na wamma Yisraelfoɛ ate ma bangɔ.

²¹Afei AWURADE sele Mose kyɛ, “Tengyɛ wɔ sa fa kyire anwuro ma awosii bra Misraim aseɛ so, awosii bɔ sana bɛfa bɛ sa befuafua ɔ.”

²²Yiti Mose tengyɛle ye sa hyirele anwuro, na awosii kabii wale Misraim aseɛ so amukoraa ɛlɛsa.

²³Ɛlɛsa mumua, ebiala annwu obiɛngo, anaakyɛ wandu ye gya; nakoso nekaa bɔ né Yisraelfoɛ bɛte ne de, ewienu yɛle hyireinn.

²⁴Afei Faro frɛle Mose, na osele ye kyɛ, “Ɛmɔhɔ bɛɛsɔne AWURADE ɛmɔ ne ɛmɔ mma mɔ bɛhɔ; nakoso ɛmɔ mmoaen ne nandwie mɔ de, odi kyɛ bɛka wa.”

²⁵Nakoso Mose sele kyɛ, “Odi kyɛ ɛma yɛ sa ka nningyein bɔ yɛkɔfa kɔbɔ afɔleɛ ɔne naen yeralɛ afɔleɛ yɛkɔma AWURADE yɛ Nyameɛ ne ɔ.

²⁶Odi kyɛ yɛfa yɛ nyɛmmoa koso yɛkɔ; bɛ gya mbaboa ko po ngɔha wa, ofikyɛ bɛ nu bie yeɛ yɛkwaafa yɛsɔne AWURADE yɛ Nyameɛ ɔ. Na yɛngɔhora ngonwu nikyee bɔ yɛkɔfa yɛkɔsɔne AWURADE ɔ, sana yadwu dɔ koraka.”

²⁷Nakoso AWURADE mane Faro bubuli mmakaa tuale ye so, na wamma bɛ ate maa bangɔ.

²⁸Na Faro sele Mose kyɛ, “Fi me nyunu wa kɔ! Nea wɔ nwo yé, na nnɛmaa menwu wɔ nyunu ko; ofikyɛ kyẽa bɔ ɛkɔwa me nyunu ne, ngɔmaa bekohu wɔ.”

²⁹Na Mose buale kyɛ, “Yoo, ɛnwa nnɛmaa meba wɔ nyunu ko a, mate!”