Read Sehwi Ɛksadɔso 14 Bible Online

Ɛksadɔso 14 - Sehwi bible

Ɛksadɔso 14

¹Afei AWURADE sele Mose kyɛ,

²“Ka kyire Yisraelfoɛ kyɛ besa bɛ si beesi asikyeleɛ wɔ Pi Hahirote nyunu, wɔ Migidol ne ɛpo ne b’afia, wɔ Baal Sefon nyunu. Ye ndendeneɛ so yeɛ ɔsɛ kyɛ ɛmɔsi asikyeleɛ ne ɔ, wɔ ɛpo ne anoa.

³Ofikyɛ Faro kɔha kɔfa Yisraelfoɛ nwo kyɛ, ‘Baaha aseɛ ne aso, na ɛserɛ ne amaa basota berɛ.’

⁴Ngɔma Faro kobubu mmakaa kotua ye so. Ɔkɔpo bɛ so, nakoso ɔnate Faro ne ye lɔen amukoraa so ngɔhyɛ me nwo animnyam; na Misraimfoɛ konwu ye kyɛ me ole AWURADE.” Na sɔ ala yeɛ Yisraelfoɛ yɔle ɔ.

⁵Mmerɛ bɔ bɛha behyirele Misraim hene kyɛ mmenia nemɔ anwati nen, ɔne ye mbanyi mɔ benyane adwene foforɛ wɔ mmenia nemɔ anwo, na besele kyɛ, “Nzikyɛ nikye yeɛ yayɔ ye, bɔ yama Yisraelfoɛ ayakyi yɛ solɛ ná bahɔ ye?”

⁶Yiti osiesiele ye teaseɛnam, na ɔfale ye asraafoɛ bokale ye nwo so.

⁷Ɔfale teaseɛnam paa paa ɛyaa nzia, ɔne Misraim teaseɛnam amukoraati, bɔ né safohene mɔ tete ye mukoraa nu ɔ.

⁸ Na AWURADE mane Misraim hene Faro bubuli mmakaa tuale ye so, yiti ɔpole Yisraelfoɛ so, wɔ mmerɛ bɔ né Yisraelfoɛ nate atunu bɛ́kɔ ngonimlilɛ so ɔ.

⁹Misraimfoɛ pole bɛ so: Faro mbɔngɔ mɔ ne teaseɛnam amukoraa, ye pɔngɔhanɛfoɛ ne ye asraafoɛ amukoraa, na bɛɛtole bɛ kyɛ basi asikyeleɛ wɔ ɛpo ne noa wɔ Pi Hahirote, wɔ Baal Sefon nyunu.

¹⁰Na mmerɛ bɔ Faro pingyele bɛ ne, Yisraelfoɛ mane bɛ nye so, na benwuni kyɛ Misraimfoɛ bɛ́po bɛ so; yiti ɛserɛ piri hane Yisraelfoɛ nemɔ, na besu bɛfrɛle AWURADE.

¹¹Na besele Mose kyɛ, “Asieleɛ mɔ nne Misraim hɔ ɔ, bɔ yiti yeɛ afa yɛ awa kyɛ yɛɛwuwu yɛgua ɛserɛ ye aso ye? Ɛɛyele yɛ fili Misraim ne, bɔ amaa wato yɛ hɔ ɛne?

¹² Anaa yanga yangyire wɔ wɔ Misraim kyɛ, “Yakyi yɛ konn ma yɛso Misraimfoɛ’? Ofikyɛ, sɛ yɛso Misraimfoɛ mmom a, ahaa ɔte paa tra kyɛ yɛkowuwu ɛserɛ so ɔ!”

¹³Na Mose sele mmenia ne kyɛ, “Nnɛma ɛmɔsuro, ɛ́mɔgyina pindinn, ná ɛ́mɔnea ngoalelɛ bɔ AWURADE kole ɛmɔ ɛnɛ ɔ; ofikyɛ Misraimfoɛ bɔ ɛmɔnwu bɛ ɛnɛ ye, ɛmɔngonwu bɛ ko le.

¹⁴AWURADE kɔho kɔma ɛmɔ, yiti ɛmɔ de, ɛ́mɔyɛ konn.”

¹⁵Na AWURADE sele Mose kyɛ, “Nzu ati yeɛ esu frɛ me ye? Ka kyire Yisraelfoɛ kyɛ bɛhɔ bɛ nyunu.

¹⁶Ma wɔ pɔmaa ne aso, ná tengyɛ wɔ sa ɛpo ne aso ma nu hyɛ nyɔ, amaa ɔnate so Yisraelfoɛ afa aseɛ wosee so bapɛ ɛpo ne.

¹⁷Me de, ngɔma Misraimfoɛ kobubu mmakaa kotua bɛ so, amaa ɔnate so bapo Yisraelfoɛ so. Na ɔnate Faro ne ye asraafoɛ amukoraa so, ye teaseɛnam mɔ ne ye pɔngɔhanɛfoɛ so, ngɔhyɛ me nwo animnyam.

¹⁸Na sɛ ɔnate Faro ne ye teaseɛnam mɔ, ɔne ye pɔngɔhanɛfoɛ so mehyɛ me nwo animnyam a, Misraimfoɛ konwu ye kyɛ me ole AWURADE.”

¹⁹Afei Nyameɛ abɔfo bɔ né oli Yisrael ɛlɔen ne nyunu ne, ɔse oolili bɛ si. Na munungum ningɔnn ne fili bɛ nyunu oolili bɛ si,

²⁰na oogyinane Misraim ɛlɔen ne Yisrael ɛlɔen b’afia. Na kɔngɔen ne amukoraa, munungum ne yɛle awosii mane bue ko, yeɛ ɔtale mane bue ko; yiti bue ko ne angora ambingye obiɛngo kɔngɔen ne.

²¹Afei Mose tengyɛle ye sa ɛpo ne aso. Na AWURADE mane eyia afiteleɛ mvrama piri bie tuli, na oopiane ɛpo ne sale nziɛ kɔngɔen ne. Ɔmane ɛpo ne kakyili aseɛ wosee, na nzue ne anu hyɛle.

²²Na Yisraelfoɛ fale aseɛ wosee so pɛle ɛpo ne; na nzue ne yɛle ɛwaen mane bɛ wɔ bɛ famaa so ne bɛ bɛen so.

²³Misraimfoɛ pole bɛ so. Faro mbɔngɔ mɔ, ye teaseɛnam ne ye pɔngɔhanɛfoɛ amukoraa belili bɛ si bɛhɔle ɛpo ne afia.

²⁴Na alebahyene ne, AWURADE tole ye nye fale see ningɔnn ne munungum ne anu neane Misraim asraafoɛ ne, na ɔmane Misraim asraafoɛ nemɔ nye so tanene bɛ.

²⁵Ɔmane bɛ teaseɛnam nemɔ gya sɛkyesɛkyele bɔ né bɛngora ndɛ kɔ ɔ. Yiti Misraimfoɛ sele kyɛ, “Ɛ́mɔma yɛ́nwati yɛ́fi Yisraelfoɛ mɔ nwo wa, ofikyɛ AWURADE gyi bɛ si ɔko tia Misraim.”

²⁶Na AWURADE sele Mose kyɛ, “Tengyɛ wɔ sa wɔ ɛpo ne aso ma nzue ne sá ha bɔ nu, ná obu fa Misraimfoɛ ne bɛ teaseɛnam mɔ ne bɛ pɔngɔhanɛfoɛ so.”

²⁷Yiti Mose tengyɛle ye sa wɔ ɛpo ne aso, na aleɛ baahye ne, ɛpo nzue ne sá wale ye boso. Na Misraimfoɛ bɛ́nwati bɛ́kɔ nen, AWURADE hane bɛ guale ɛpo ne anu wɔ asufia.

²⁸Nzue ne ha tuale, na ɔfale teaseɛnam nemɔ, pɔngɔhanɛfoɛ nemɔ, ɔne Faro ɛlɔen amukoraa bɔ bɛpole Yisraelfoɛ so wɔ ɛpo ne anu ne. Bɛ nu ko po anga.

²⁹Nakoso Yisraelfoɛ de, bɛfale aseɛ wosee so bɛpɛle ɛpo ne wɔ ye afia; na nzue ne yɛle ɛwaen mane bɛ wɔ bɛ famaa so ne bɛ bɛen so.

³⁰Yiti AWURADE lele Yisraelfoɛ fili Misraimfoɛ sa nu sɔ kyẽa ne; na Yisraelfoɛ nwuni Misraimfoɛ kyɛ bawuwu bagua mboanoa berɛ.

³¹Yisraelfoɛ nwuni tumi piri bɔ AWURADE fa ho tiale Misraimfoɛ ne. Yiti Yisraelfoɛ surole AWURADE, na belele AWURADE ne ye somvoɛ Mose belili.