Read Sehwi Ɛksadɔso 15 Bible Online

Ɛksadɔso 15 - Sehwi bible

Ɛksadɔso 15

¹Afei Mose ne Yisraelfoɛ tole edwein he yele AWURADE ayɛ kyɛ, “Ngɔto dwein ngɔye AWURADE ayɛ, ofikyɛ wama ye nwo so ngonim nu; wagyi pɔngɔ ne pɔngɔhanɛniɛ ne wagua ɛpo nu.

²AWURADE te m’anwoserɛ ne me dwein, na wayɛ me ngoadefoɛ. Ɔte me Nyameɛ, na ngɔye ye ayɛ, me baba Nyameɛ ɛne, na ngɔma ye so.

³AWURADE te koɛhonɛniɛ; ye dumaa li AWURADE.

⁴Ogyili Faro teaseɛnam mɔ ne ye asraafoɛ guale ɛpo nu; na Ɛpo Kɔkorɛ afa ye koɛhonɛfoɛ atitire nemɔ.

⁵Buma ne akata bɛ so, na bamono bahɔ ye bo kyɛ nyɔboɛ.

⁶O AWURADE, wɔ sa famaa ne te ngonim ne tumi, O AWURADE, wɔ sa famaa ne dworɔm pɔfoɛ ne.

⁷Ɛnate wɔ tumi piri ne aso ɛkã bɛ bɔ bɛko betia wɔ ɔ gua; Ɛsoma wɔ yaa piri ne, na ɔyera bɛ kyɛ ngyɛngyɛma.

⁸Wɔ bonyi anu nwomeɛ mane nzue ne boaboale ye noa, asorɔkye ne gyinane berɛ kyɛ ɛwaen; na buma ne bɔle kunguma wɔ ɛpo afia.

⁹Pɔfoɛ ne hane kyɛ, ‘Ngɔpo bɛ so, ngɔɔto bɛ, ngɔhyɛ koɛ nu nzesadeɛ ne, na me kra ko koyi. Ngɔhwe me ngrandɛ, na me sa kɔma bɛ boso konua.’

¹⁰Ɛmane wɔ nwomeɛ tuli mvrama, na ɛpo ne fale bɛ; na bɛmonone kyɛ kungumaboɔ wɔ buma ne anu.

¹¹O AWURADE, nyameɛ foforɛ nemɔ, bɛ nu nwa yeɛ ɔne wɔ bɛte pɛ ɔ? Nwa yeɛ ye krongronyɛlɛ totohyia te kyɛ wɔ ɔ, bɔ ye nwo yɛ suro wɔ ngonim nu, ná ɔyɛ anwanwadeɛ kyɛ wɔ ɔ?

¹²Ɛtengyɛle wɔ sa famaa nu, na aseɛ memene bɛ.

¹³Ɛnate w’anwumvoinnwunɛ so ɛyɛle mmenia bɔ ale bɛ ne taataa, na ɛnate w’anwoserɛ so ehyirele bɛ atee maa bɛhɔle nekaa krongron bɔ ɛte ne.

¹⁴Maen maen ate, na bɛ nwo wosowoso bɛ; na bɛ bɔ bɛte Filistia ne, ahunundetelɛ atɔ bɛ so.

¹⁵Afei Edom ahemvo mɔ babɔ fuin; ɛserɛ aha Moabo atitirefoɛ; na bɛ bɔ bɛte Kanaan amukoraa b’ahone atu.

¹⁶Ahunundetelɛ ne ɛserɛ atɔ bɛ so; ɔnate wɔ tumi asaa ne ati, bayɛ dinn kyɛ nyɔboɛ, kɔpem kyɛ, O AWURADE, wɔ mmenia kɔpɛ nu kɔhɔ ɔ, kɔpem kyɛ mmenia bɔ ale bɛ ne kɔpɛ nu kɔhɔ ɔ.

¹⁷Ɛkɔfa bɛ kɔwa, ná aabɔ bɛ atenaseɛ wɔ wɔ bɔbɔ wɔ bokaa ne aso, nekaa bɔ afa ayɛ w’atenaleɛ ne, O AWURADE, nekaa krongron bɔ afa wɔ sa asiesie ne, O AWURADE.

¹⁸AWURADE koli hene afebɔɔ.”

¹⁹Mmerɛ bɔ Faro mbɔngɔ mɔ, ye teaseɛnam mɔ ne ye pɔngɔhanɛfoɛ hɔle ɛpo ne anu nen, AWURADE mane ɛpo nzue ne sale ye si oobu fale bɛ so; nakoso Yisraelfoɛ de, bɛfale aseɛ wosee so wɔ ɛpo ne afia.

²⁰Afei ngɔmhyɛlɛniɛ Miriam bɔ ɔte Aarɔn aliɛma brasua ne, ɔfale akasaa tirale, na mmrasua ne amukoraa bɛwosole akasaa begole abilie befitele belili ye si.

²¹Na Miriam surole so kyɛ, “Ɛ́mɔto dwein bɛ́ye AWURADE ayɛ, ofikyɛ wama ye nwo so ngonim nu; wagyi pɔngɔ ne pɔngɔhanɛniɛ ne wagua ɛpo nu.”

²²Afei Mose mane Yisraelfoɛ tuli bɛ bo befili Ɛpo Kɔkorɛ ne anwo, na bɛfale bɛ nye behyirele Sure ɛserɛ ne aso. Bɛnatele ɛserɛ ne aso ɛlɛsa mumua bɔ bannwu nzue ɔ.

²³Na beedwuli Mara[19] nen, bangora Mara nzue ne no, ofikyɛ né ɔyɛ wee. Yiti bɛfrɛle berɛ Mara.

²⁴Na mmenia ne penepenene bɛ komvi beguale Mose so kyɛ, “Nzue beni yeɛ yɛ́nya ye yɛ́no ɔ?”

²⁵Yiti Mose sũ frɛle AWURADE, na AWURADE hyirele ye bakaa[20] bie. Ogyili bakaa ne tole nzue ne anu, na nzue ne yɛle fɛ. AWURADE yɛle ahyɛdeɛ ne nhyehyɛleɛ mane bɛ wɔ berɛ, na osole bɛ neane wɔ berɛ.

²⁶Na Mose hane kyɛ, “Sɛ ekotie AWURADE wɔ Nyameɛ dwirɛ, ná ayɔ bɔ ɔsɔ ye nye, ná ali ye mmeraa dwirɛ ne ye ahyɛdeɛ mukoraati so a, ye de anwonyerɛ bɔ nde nguale Misraimfoɛ so ne, mengɔte nu biala ngogua wɔ so; ofikyɛ me ole AWURADE, wɔ safoɛ ne.”

²⁷Afei beedwuli Elim, nekaa bɔ asue ti buru ne nyɔ ɔne ayee aburasoo wɔ ne, na bɛkyekyele asikyeleɛ wɔ nzue ne noa.