Read Sehwi Ɛksadɔso 17 Bible Online

Ɛksadɔso 17 - Sehwi bible

Ɛksadɔso 17

¹Yisrael ɛlɔen ne amukoraa tuli bɛ bo befili Sin ɛserɛ ne aso, na belili tutena, kyɛbɔ AWURADE mmeraa dwirɛ te ne; na bɛkyekyele asikyeleɛ wɔ Refidim. Nakoso né nzue bɔ bɛkɔno ɔ nne berɛ.

²Yiti ɛlɔen ne ne Mose nyane dwudwolɛ, na besele kyɛ, “Ma yɛ nzue ma yɛno.” Na Mose buale bɛ kyɛ, “Nzu ati yeɛ ɛmɔbɔ me somoɛ ɔ? Nzu ati yeɛ ɛmɔso AWURADE bɛnea ɔ?”

³ Nakoso nzuhɔen huni mmenia ne wɔ berɛ, na bɛpenepenene bɛ komvi beguale Mose so. Bɛhane kyɛ, “Nzu ati yeɛ ɛɛyele yɛ fili Misraim ɔ, kyɛ ɛbaama nzuhɔen ku yɛ ne yɛ mma ne yɛ ngaka ɔ?”

⁴Yiti Mose sũ frɛle AWURADE kyɛ, “Nzikyɛ yeɛ nyɔ mma mmenia ye mɔ ɔ? Bɛ́pena bɛboro me nyɔboɛ.”

⁵Na AWURADE buale Mose kyɛ, “Fa Yisrael mbanyi nemɔ bie boka wɔ nwo so, ná se di mmenia ne nyunu. Fa pɔmaa bɔ ɛfa fini asue Naele nu ne tira, ná kɔ.

⁶Tie, ngoogyina wɔ nyunu wɔ dɔ, wɔ nyɔbotaen ne aso wɔ Horebo. Fa fĩ nyɔbotaen ne aso, na nzue kofi nu kɔwa kɔma mmenia ne konya bie kɔno.” Na Mose yɔle sɔ wɔ Yisrael mbanyi nemɔ nyunu.

⁷Ɔfrɛle berɛ Masa ne Meriba,[23] ɔnate kyɛ Yisraelfoɛ bɔle somoɛ, na besole AWURADE bɛneane. Bɛhane kyɛ, “Aso AWURADE wɔ yɛ nu wa, anaakyɛ ɔnne yɛ nu wa?”

⁸Afei Amalɛkefoɛ wale bɛ ne Yisraelfoɛ bɛɛhone wɔ Refidim.

⁹Na Mose sele Yosua kyɛ, “Yeye yɛ nu mmienzua ne bie, ná ɛne Amalɛkefoɛ bɛɛho. Ngɔfa Nyameɛ pɔmaa ne ngotira ɛhema, na ngɔhɔ ngoogyina bokaa ne ti afia.”

¹⁰Yiti Yosua ne Amalɛkefoɛ mɔ bɛɛhone, kyɛbɔ Mose ha hyirele ye ne ala. Na Mose, Aarɔn ne Hure bɛfo bɛhɔle bokaa ne ti afia.

¹¹Na sɛ Mose ma ye sa so a, né Yisraelfoɛ bédi ngonim; yeɛ sɛ ɔka ye sa ase a, né Amalɛkefoɛ bédi ngonim.

¹²Nakoso Mose sa nyane; yiti bɛfale nyɔboɛ bie bɛtole ye gya si berɛ deinn, na ɔtenane so. Na Aarɔn ne Hure pagyale ye sa ne hɔle anwuro, ko gyinane ye bue faen, yeɛ ko wora gyinane ye bue dɔ. Yiti ye sa ne hora gyinane berɛ toonn mane eyia tɔle.

¹³Na Yosua mane Amalɛke ne ye mmenia bɛtotɔle ngrandɛ noa.

¹⁴ Na AWURADE sele Mose kyɛ, “Kyerɛ he wɔ nwomaa bie aso ma ɔyɛ ngayeɛ nikye, ná kenga kyire Yosua kyɛ, ngonua Amalɛke ye boso ngofi aseɛ ye aso.”

¹⁵Yeɛ Mose sili afɔleɛ bokyea, na ɔtole ye dumaa: AWURADE te me frangaa.

¹⁶Na ɔhane kyɛ, “Odi kyɛ ebiala ma AWURADE frangaa ne aso, ofikyɛ AWURADE ne Amalɛke bɛkɔho koɛ wɔ aworɛ ndoatoasoɛ mukoraati nu.”