Read Sehwi Ɛksadɔso 19 Bible Online

Ɛksadɔso 19 - Sehwi bible

Ɛksadɔso 19

¹Yisraelfoɛ tuli bɛ bo befili Misraim aseɛ so ne, ye bosome bɔ ɔtɔ so nza ne anu, kyẽa bɔ oli moa ne yeɛ bedwuli Sinai ɛserɛ ne aso ɔ.

²Betuli bɛ bo befili Refidim nen, beedwuli Sinai ɛserɛ ne aso, na bɛkyekyele asikyeleɛ wɔ berɛ; na Yisrael kyekyele asikyeleɛ wɔ bokaa ne nyunu.

³Mose fo hɔle Nyameɛ berɛ. AWURADE frɛle ye fili bokaa ne aso sele ye kyɛ, “Edwirɛ he yeɛ ka kyire Yakob bosofoɛ ɔ. Ka kyire Yisraelfoɛ kyɛ,

⁴Ɛmɔ bɔbɔ ɛmɔanwu bɔ mva nyɔle Misraimfoɛ ɔ, ɔne kyɛbɔ nnodole ɛmɔ wɔ kɔleɛ ndaa so, ná mvale ɛmɔ mmale me berɛ ɔ.

⁵ Na afei de, sɛ ɛmɔkoli me dwirɛ so, ná ɛmɔali m’apam ne aso a, ye de, ɛmɔkɔyɛ me bɔbɔ deinn me deɛ wɔ mmenia mukoraati nu, ofikyɛ aseɛ mukoraati te me deɛ.

⁶Ɛmɔkɔyɛ m’asɔfo ahennie maen ɔne maen krongron. Na edwirɛ bɔ ɔsɛ kyɛ ɛkã kyire Yisraelfoɛ hɔ ɛne.”

⁷Yiti Mose wale ɔɔfrɛfrɛle Yisrael mbanyi, na ɔfale edwirɛ amukoraa bɔ AWURADE ahyɛ ye kyɛ ɔha ne tole bɛ nyunu.

⁸Yisraelfoɛ amukoraa bɛ noa yɛle ko, na bebuale kyɛ, “Bɔ AWURADE aha ne amukoraa, yɛkɔyɔ.” Na Mose fale mmenia nemɔ mmuayɛɛ ne tole AWURADE nyunu.

⁹Na AWURADE sele Mose kyɛ, “Tie, mebaafa munungum kumɔnn nu meba wɔ berɛ, amaa sɛ me ne wɔ dwudwo a, mmenia ne ate, ná daa biala bale wɔ bali.” Afei Mose hane mmenia nemɔ noa dwirɛ hyirele AWURADE.

¹⁰Na AWURADE sele Mose kyɛ, “Kɔ mmenia nemɔ berɛ, ná pete bɛ nwo ɛnɛ ne ɛhema. Maa bɛpo bɛ nwo nningyein,

¹¹ná bɛboaboa bɛ nwo besie ɛhema si, ofikyɛ AWURADE kodwu kɔwa Sinai bokaa ne aso ɛhema si, bɔ mmenia ne amukoraa bɛ nye tua ɔ.

¹² To ɛwɛen fa bokaa ne anwo bɔ mmenia ne ngɔbɔ ngɔtra ɔ, ná ka kyɛ, ‘Ɛ́mɔnea yé ná ɛmɔamvo bangɔ bokaa ne aso, anaakyɛ ɛmɔandra ɛwɛen ne. Ebiala bɔ ɔkɔfa ye nwo kɔha bokaa ne nen, ɔsɛ kyɛ beku ye.

¹³Nnɛma ebiala fa ye sa ka sɔ sona ne; bɛkɔboro ye nyɔboɛ anaa bɛkɔto agyaen bɛkɔwɔ ye. Kaka oo, sona oo, ɔsɛ kyɛ beku ye.’ Na sɛ behu totorobɛndo ne anu tendetende a, ye de ɔsɛ kyɛ bɛfo bokaa ne aso.”

¹⁴Yiti Mose fili bokaa ne aso dwu hɔle mmenia nemɔ anwo berɛ, ɔpetene bɛ nwo, na bɛpole bɛ nwo nningyein.

¹⁵Na osele mmenia ne kyɛ, “Ɛ́mɔboaboa bɛ nwo bésie ɛhema si, nnɛma ɛmɔfa bɛ nwo bɛka brasua.”

¹⁶Ye ɛlɛsa ne aso, ngyerɛmɔ, wɔ bokaa ne aso: agralaa tetele, Nyameɛ ne bobɔle nu kurudududu, munungum kumɔnn wale, na totorobɛndo ne teane nu serɛserɛ. Yiti mmenia mukoraati bɔ né bɛwɔ asikyeleɛ berɛ ne, bɛ nwo wosowosole bɛ.

¹⁷Afei Mose fale mmenia ne fili asikyeleɛ berɛ fitele kyɛ bɛkwaayia Nyameɛ; na beegyinagyinane bokaa ne nye abo berɛ.

¹⁸Nwosina katale Sinai bokaa ne aso amukoraati, ofikyɛ AWURADE natele see nu dwu wale so. So nwosina ne tu hɔle anwuro kyɛ foonoo nu nwosina, na bokaa ne amukoraa wosole kikikikikiki.

¹⁹Na mmerɛ bɔ totorobɛndo hulɛ ne noa yɛle se nen, Mose dwudwole, na Nyameɛ buale ye wɔ agralaa nu[26]

²⁰Na AWURADE dwu wale Sinai bokaa ne aso, wɔ bokaa ne ti afia. AWURADE frɛle Mose kyɛ ɔbra bokaa ne ti afia, na Mose fo hɔle.

²¹Na AWURADE sele Mose kyɛ, “Dwu kɔ aseɛnwo dɔ kɔbɔ mmenia ne kɔkɔ, ná bandra ɛwɛen ne bamma kyɛ bɛbaanea AWURADE, ná bɛ nu pee anwuwu.

²²Asɔfo mɔ po bɔ bɛba AWURADE nyunu ne, maa bɛte bɛ nwo, ná AWURADE andete bɛ nu pasapasa.”

²³Na Mose buale AWURADE kyɛ, “Mmenia ne ngɔhora bokaa ne aso dɔ ba, ofikyɛ wɔ bɔbɔ deinn abɔ yɛ kɔkɔ kyɛ, ‘To ɛwɛen fa bokaa ne anwo, ná maa ɔyɛ krongron.’ ”

²⁴Na AWURADE sele ye kyɛ, “Dwu kɔ aseɛnwo dɔ, ná ɛne Aarɔn bɛfo bɛbra. Nakoso asɔfo nemɔ ne mmenia ne de, nnɛmaa bɛtra ɛwɛen ne bɛfo bɛba AWURADE berɛ, ná wamvɛ bɛ so yaa.”

²⁵Yiti Mose dwu hɔle mmenia ne berɛ ɔɔbɔle bɛ amaneɛ.